سۋ زاڭناماسىن بۇزعاندارعا ايىپپۇل سالىندى

سۋ رەسۋرستارى جانە يرريگاتسيا مينيسترلىگىنىڭ باسسەيندىك ينسپەكتسيالارى 6 ايدا سۋ زاڭناماسىن ساقتاۋ بويىنشا 55 تەكسەرىس جۇرگىزىپ, 103 قۇقىق بۇزۋشىلىق انىقتاعان, كەمشىلىكتەردى جويۋ بويىنشا 42 نۇسقاما بەرىلگەن.

جالپى سوماسى 12,9 ملن تەڭگەگە 143 اكىمشىلىك ايىپپۇل سالىنعان, ال 11,9 ملن تەڭگە كولەمىندە 127 اكىمشىلىك ايىپپۇل ءوندىرىلدى, 16 اكىمشىلىك ءىس سوتقا بەرىلدى.

«مينيسترلىكتىڭ باسسەيندىك ينسپەكتسيالارى سۋ زاڭناماسىنىڭ ساقتالۋىن قاداعالايدى. قۇقىق بۇزۋشىلىقتارعا قارسى كۇرەستى كۇشەيتۋ ءۇشىن ۆەدومستۆودا سۋ رەسۋرستارىن رەتتەۋ, قورعاۋ جانە پايدالانۋ جونىندە كوميتەت قۇرىلدى. بۇل سۋ رەسۋرستارىن زاڭسىز پايدالانۋدىڭ الدىن الۋعا مۇمكىندىك بەرەدى. جۋىردا جامبىل وبلىسىندا تەكسەرىس جۇرگىزىلىپ, ناتيجەسى بويىنشا ماتەريالدار باس پروكۋراتۋراعا جىبەرىلدى. سۋ سالاسىنداعى اشىقتىق مينيسترلىك جۇمىسىنىڭ باسىم باعىتتارىنىڭ ءبىرى. سونداي-اق كوميتەت سۋدى زاڭسىز پايدالانۋمەن, ونى ەسەپكە الۋ دەرەكتەرىنىڭ بۇرمالانۋىمەن جانە ەلىمىزدىڭ سۋ نىساندارىنداعى قۇقىققا قايشى شارۋاشىلىق قىزمەتپەن كۇرەسەتىن بولادى», دەدى سالا مينيسترلىگىنىڭ رەسمي وكىلى ءمولدىر ابدۋاليەۆا.