فوتو: elements.envato.com
«1 شىلدەدەن باستاپ تەستىلەۋدىڭ ەكىنشى كەزەڭى باستالدى. كلينيكالىق سىناققا 3 مىڭعا جۋىق ادام قاتىسادى. بارلىعى 5 مىڭنان استام ونكولوگيالىق ناۋقاس سىناققا قاتىسۋعا نيەت ءبىلدىرىپ, تىركەلدى. قاراجات جوعارى عىلىمي-تەحنيكالىق كوميسسيانىڭ شەشىمىمەن قاراستىرىلعان. زەرتتەۋ توبىنا ەكىنشى كەزەڭدى جۇرگىزۋگە شامامەن 2 ملرد تەڭگە تامىز ايىندا اۋدارىلادى. جىل سوڭىنا دەيىن ءبىز بارلىق دەرەكتى وڭدەيمىز. كەلەسى جىلى ءدارى-دارمەكتى تىركەۋگە شىعارامىز دەگەن سەنىمدەمىز», دەدى ساياسات نۇربەك.
ونكولوگيانىڭ ەڭ اگرەسسيۆتى تۇرلەرىنىڭ ءبىرى − توق ىشەك قاتەرلى ىسىگىنىڭ IV ساتىسى انىقتالعان ناۋقاستار ەرىكتى رەتىندە قاتىسقان كلينيكالىق سىناقتاردىڭ ءبىرىنشى كەزەڭىنىڭ ناتيجەسى بويىنشا پرەپارات تيىمدىلىگىن كورسەتتى. ىسىكتىڭ قالىپتاسۋى ورتا ەسەپپەن 30%-عا ازايدى.
ەكىنشى كەزەڭ ءتۇرلى قاتەرلى ىسىگى بار ادامدارعا ءدارى-دارمەكتى تەكسەرىپ كورۋدى قامتيدى. سىناق استانا, الماتى, پاۆلوداردا وتكىزىلەدى.
ەسكە سالا كەتەيىك, بۇعان دەيىن Nazarbayev University-گە بارعان كەزدە پرەمەر-مينيستر ولجاس بەكتەنوۆ جاس عالىمداردىڭ, ونىڭ ىشىندە National Laboratory Astana زەرتتەۋ توبىنىڭ ازىرلەمەلەرىمەن تانىستى. قاتەرلى ىسىككە قارسى ءتيىمدى ءدارى جاساۋ — مامانداردىڭ ەڭ امبيتسيالى جوبالارىنىڭ ءبىرى.
