جيىنعا كونسۋلتاتيۆتىك-ساراپتامالىق توپتىڭ مۇشەلەرى, پرەزيدەنت اكىمشىلىگىنىڭ, ۇكىمەت اپپاراتىنىڭ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ لاۋازىمدى تۇلعالارى, «ازاماتتارعا ارنالعان ۇكىمەت «مەملەكەتتىك كورپوراتسياسى» كەاق, «ۇات» اق, سونداي-اق ورتالىق مەملەكەتتىك جانە جەرگىلىكتى اتقارۋشى ورگاندار بەينەكونفەرەنتسيا ارقىلى قاتىستى.
مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي مەملەكەتتىك باسقارۋدى دامىتۋدىڭ 2030 جىلعا دەيىنگى تۇجىرىمداماسىندا مەملەكەتتىك باسقارۋدىڭ سەرۆيستىك جانە «ادامعا باعدارلانعان» مودەلىن قالىپتاستىرۋ نەگىزگى تالاپ رەتىندە ايقىندالعانىن جەتكىزدى.
– مەملەكەتتىك قىزمەت كورسەتۋ ۇدەرىستەرىن ۇنەمى جەتىلدىرۋ – جۇمىسىمىزداعى نەگىزگى ۇستانىمداردىڭ ءبىرى. بۇل مىندەتتى جۇزەگە اسىرۋدا جەكە مۇددەدەن گورى قىزمەت الۋشىلاردىڭ زاڭدى قۇقىقتارى باستى نازاردا بولۋى قاجەت. وسىعان سايكەس ازاماتتار مەن ولاردىڭ ءال-اۋقاتى باستى قۇندىلىق سانالادى. بيىل «مەملەكەتتىك كورسەتىلەتىن قىزمەتتەر تۋرالى» زاڭنىڭ قابىلدانعانىنا 11 جىل تولىپ وتىر. ونىڭ جەكەلەگەن نورمالارىنىڭ جەتكىلىكتى ۋاقىت سىناقتان وتكەنىن, قۇقىق قولدانۋ تاجىريبەسى قالىپتاسقانىن ەسكەرە كەلە ەرەجەلەردى قايتا قاراۋ, جاڭا قۇقىقتىق ينستيتۋتتاردى ەنگىزۋ قاجەتتىگى تۋىنداعانىن اتاپ ءوتۋ كەرەك, – دەيدى دارحان جازىقباي.
وتىرىستا مەملەكەتتىك قىزمەت كورسەتۋ سالاسىنداعى زاڭنامانى جەتىلدىرۋدەگى جاڭا تاسىلدەر مەن قىزمەتتەردى ۇسىنۋ راسىمدەرىن ىلگەرىلەتۋ اياسىندا جۇرگىزىلگەن تالداۋ قورىتىندىلارى قارالدى. ەسەپكە كوز سالساق, مەملەكەتتىك قىزمەت كورسەتۋدە 59 مىڭعا جۋىق زاڭ بۇزۋشىلىق انىقتالعان. زاڭسىزدىقتاردىڭ باسىم بولىگى ارتىق قۇجاتتاردى تالاپ ەتۋ مەن قىزمەت كورسەتۋدەن نەگىزسىز باس تارتۋ سەبەبىنەن تىركەلگەن.
– بيۋروكراتيادان ارىلۋ دەگەنىمىز – ەڭ الدىمەن, نەگىزسىز كەدەرگىلەردى, قولايسىز مەرزىمدەردى, قاجەتسىز قۇجاتتاردىڭ بارلىعىن توپتاستىرىپ, وڭتايلاندىرىپ, ازاماتتارعا مەملەكەتتىك كورسەتىلەتىن قىزمەتتەردىڭ ساپاسى مەن قولجەتىمدىلىگىن ارتتىرۋ. بۇعان دەيىن, پرەمەر-ءمينيستردىڭ تاپسىرماسىمەن مەملەكەتتىك قىزمەت ىستەرى اگەنتتىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ, «ۇلتتىق اقپاراتتىق تەحنولوگيالار» اق جانە 29 ورتالىق ورگان وكىلدەرىنىڭ قاتىسۋىمەن تىزىمگە ەنگىزىلگەن بارلىق مەملەكەتتىك كورسەتىلەتىن قىزمەتتەرگە تىڭداۋلار ۇيىمداستىرعان بولاتىن. ارنايى قۇرىلعان كونسۋلتاتيۆتىك-ساراپتامالىق توپتىڭ نەگىزگى مىندەتى – قىزمەت تۇرلەرىن سارالاي وتىرىپ, مۇنى ودان ءارى جەتىلدىرۋگە ۇسىنىستار ازىرلەۋ. قازىرگى تاڭدا ەلىمىزدە 1 326 مەملەكەتتىك قىزمەتتىڭ ازىرشە 42-ءسى, ياعني 3%-ى پرواكتيۆتى, ال ء«بىر ءوتىنىش» نەگىزىندە ءوزارا بايلانىستى بىرنەشە مەملەكەتتىك قىزمەتتەردى الۋعا مۇمكىندىك بەرەتىن كومپوزيتتىك ادىستە 8%-ى, ەكساۋماقتىق تاسىلدەرمەن 68%-ى كورسەتىلەتىنى انىقتالدى, – دەيدى مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى سالاۋات مۇكسىموۆ.
تۇسىندىرە كەتسەك, مەملەكەتتىك قىزمەتتەردى كورسەتۋدىڭ پرواكتيۆتى ءتاسىلى ەنگىزىلگەن كەزدە مەملەكەتتىك ورگاندار ازاماتتارعا ولار ءوتىنىش بەرمەي-اق مەملەكەتتىك قىزمەتتەردى كورسەتۋگە ۇسىنىس جاسايتىن بولادى.
– 17 باعىت بويىنشا جۇرگىزىلگەن تالداۋ ناتيجەسىندە 30 مەملەكەتتىك كورسەتىلەتىن قىزمەتتى ەكساۋماقتىق, 251 مەملەكەتتىك كورسەتىلەتىن قىزمەتتى پرواكتيۆتى, 72 مەملەكەتتىك كورسەتىلەتىن قىزمەتتى كومپوزيتتىك فورماتقا اۋىستىرۋ تۋرالى, سونداي-اق مەملەكەتتىك قىزمەت كورسەتۋ مەرزىمىن قىسقارتۋ بويىنشا 273 ۇسىنىس ازىرلەندى. بۇل قاعيدالاردى مەملەكەتتىك قىزمەتتەر كورسەتۋدىڭ بيزنەس-ۇدەرىستەرىنە رەينجينيرينگ جۇرگىزۋ, ولاردى كورسەتۋ قاعيدالارىن ازىرلەۋ كەزىندە مەملەكەتتىك ورگاندار باسشىلىققا الادى. ىلكىمدى ءىس قۇجاتتاردىڭ مەرزىمدەرى مەن سانىن ازايتۋدى, انىقتامالىق قىزمەتتەردى, تولىققاندى ەمەس نەمەسە جارتىلاي كورسەتىلەتىن قىزمەتتەردى الىپ تاستاۋدى كوزدەيدى جانە وسى سالانىڭ سەرۆيستىلىگىن ارتتىرۋعا باعىتتالعان, – دەيدى مەملەكەتتىك قىزمەت ىستەرى اگەنتتىگى مەملەكەتتىك اپپاراتتى بيۋروكراتيادان ارىلتۋ, مەملەكەتتىك قىزمەتتەردىڭ كورسەتىلۋ ساپاسىن باعالاۋ جانە باقىلاۋ دەپارتامەنتىنىڭ ديرەكتورى اسحات يسكەنديروۆ.
سونداي-اق تالداۋ بارىسىندا قىزمەتتەردى كورسەتۋ مەرزىمدەرىن ەسەپتەۋ كەزىندە بىرىڭعاي ءتاسىل جوق ەكەندىگى انىقتالدى. ماسەلەن, نورماتيۆتىك قۇقىقتىق اكتىلەرگە سايكەس قىزمەتتەردى كورسەتۋ مەرزىمدەرى جۇمىس نەمەسە كۇنتىزبەلىك كۇندەردە ەسەپتەلۋى مۇمكىن. وسىعان وراي جيىندا اگەنتتىك تاراپىنان قىزمەتتەردى كورسەتۋ مەرزىمدەرىن بىركەلكى قولدانۋ ماقساتىندا, ياعني دەمالىس جانە مەرەكە كۇندەرىندە بەرىلۋ مۇمكىن (قاجەتتىلىگىنە بايلانىستى) مەملەكەتتىك كورسەتىلەتىن قىزمەتتەردى قوسپاعاندا, مەرزىمدەردى كۇنتىزبەلىك كۇندەردەن جۇمىس كۇندەرىنە اۋىستىرۋ ماسەلەسىن قاراستىرۋ تۋرالى ايتىلدى.
بۇدان وزگە ازاماتتاردىڭ مەملەكەتتىك قىزمەتتەردى الۋ راسىمدەرىن جەڭىلدەتەتىن «فورمالدى سەبەپتەرگە بايلانىستى باس تارتۋعا جول بەرمەۋ», «وزىڭقى وتىنىشتەر جۇيەسىنە» كوشۋ سياقتى جاڭا قۇقىقتىق ينستيتۋتتاردى ەنگىزۋ ۇسىنىلدى.
اگەنتتىك وكىلدەرى مەملەكەتتىك قىزمەت كورسەتۋ ۇدەرىسىنە ءتيىستى قورىتىندى نەمەسە كەلىسىم بەرەتىن وزگە دە مەملەكەتتىك ورگاندار مەن ۇيىمدار قاتىسا الاتىنىنا نازار اۋداردى. وسىعان سايكەس ولار ءۇشىن مەملەكەتتىك قىزمەتتەر كورسەتۋ بويىنشا قۇقىقتار مەن مىندەتتەردى ايقىنداۋ, كەلىسۋ مەرزىمدەرى مەن ءتارتىبىن بەلگىلەۋ ۇسىنىلدى, بۇل ولاردىڭ جاۋاپكەرشىلىگىن ارتتىرادى.
كونسۋلتاتيۆتىك-ساراپتامالىق توپ وتىرىسىنىڭ قورىتىندىسىندا ورتالىق جانە جەرگىلىكتى اتقارۋشى ورگاندارعا اتالىپ وتكەن ۇسىنىستاردى جۇزەگە اسىرۋعا قاتىستى بىرقاتار شەشىمدى شارالار قابىلداۋ, تسيفرلاندىرۋ باعىتىندا جۇرگىزىلىپ جاتقان جۇمىستاردى ەسكەرە وتىرىپ, مەملەكەتتىك قىزمەتتەر كورسەتۋ راسىمدەرىن ودان ءارى جەتىلدىرۋ جۇمىستارىن بەكىتۋ تاپسىرىلدى.
