فوتو: سۋ رەسۋرستارى جانە يرريگاتسيا مينيسترلىگى
مينيستر ەڭ الدىمەن قىتاي ازاماتتىق ينجەنەرلىك-قۇرىلىس كورپوراتسياسىنىڭ ۆيتسە-پرەزيدەنتى تسزيان يگاومەن كەزدەستى. كومپانيا قازاقستاندا 2017 جىلدان بەرى جۇمىس ىستەيدى. قازىرگى ۋاقىتتا قايقك جامبىل وبلىسىنداعى يرريگاتسيالىق ارنالاردى, درەناج جۇيەلەرى مەن قۇرىلىستاردى رەكونسترۋكتسيالاۋدى قوسا العاندا, اۋقىمدى 5 جوبانى ىسكە اسىرىپ جاتىر.
تاراپتار سۋارۋ جۇيەلەرىن تسيفرلاندىرۋ جانە وسى باعىتتاعى ەكىجاقتى ىنتىماقتاستىقتى تالقىلادى. قايقك وكىلدەرى قازاقستاننىڭ سۋ سالاسىن تسيفرلاندىرۋ جانە اۆتوماتتاندىرۋ بويىنشا جاڭا جوبالارعا قىزىعۋشىلىق تانىتتى.
«تسيفرلىق تەحنولوگيالار داقىل تۇرلەرىنە, كليماتقا جانە اۋماققا بايلانىستى سۋدى ءدال جانە ۋاقتىلى ءبولۋدى قامتاماسىز ەتە وتىرىپ, سۋ رەسۋرستارىن باسقارۋدىڭ تيىمدىلىگىن ايتارلىقتاي ارتتىرۋعا مۇمكىندىك بەرەدى. بىرلەسكەن كۇش-جىگەر, رەسۋرستار مەن تاجىريبەنى پايدالانا وتىرىپ الدىمىزدا تۇرعان ماقساتتارعا قول جەتكىزە الاتىنىمىزعا سەنىمدىمىن», دەدى نۇرجان نۇرجىگىتوۆ.
سونداي-اق مينيستر CITIC Gonstruction كومپانياسىنىڭ پرەزيدەنتى تسزيانتسيان يانمەن كەزدەسىپ, سۋ ۇنەمدەۋ تەحنولوگيالارىن ەنگىزۋ ماسەلەسىن پىسىقتادى. قىتايلىق كاسىپكەرلەر قازاقستاندا سۋ ۇنەمدەۋ جۇيەلەرىن شىعارۋعا دايىن ەكەندىكتەرىن ءبىلدىردى.
نۇرجان نۇرجىگىتوۆ ءوز كەزەگىندە جاڭا سۋ قويمالارىن سالۋ جانە قولدانىستاعى سۋ قويمالارىن رەكونسترۋكتسيالاۋ, سونداي-اق الماتى مەن جەتىسۋ وبلىستارىنداعى سۋارۋ جۇيەلەرىن جاڭعىرتۋ جونىندەگى مينيسترلىكتىڭ جوسپارلارى تۋرالى ايتىپ بەردى.
سۋ رەسۋرستارى جانە يرريگاتسيا ءمينيسترى Power China كومپانياسىنىڭ پرەزيدەنتى تان سياوفەنمەن كەزدەستى. مينيسترلىك پەن Power China قازاقستاننىڭ سۋ شارۋاشىلىعى ماماندارىن قىتايدا بىلىكتىلىك ارتتىرۋ كۋرستارىنان وتەدى دەپ كەلىستى.
سونىمەن قاتار نۇرجان نۇرجىگىتوۆ قىتايلىق كومپانياعا «قازسۋشار» كاسىپورنىمەن ىنتىماقتاستىق تۋرالى مەموراندۋمعا قول قويۋدى ۇسىندى. Power China باسشىلىعى بولسا جاڭا سۋ قويمالارىنىڭ قۇرىلىسىنا قاتىسۋعا نيەت ءبىلدىردى. بۇل ماسەلەنى ەگجەي-تەگجەيلى تالقىلاۋ الداعى ۋاقىتتا جۇمىس توبى دەڭگەيىندە جالعاسادى.
«Power China قازاقستاندا بۇرىننان تابىستى جۇمىس ىستەپ كەلەدى. كومپانيا ءبىزدىڭ ەلىمىزدە بىرنەشە اۋقىمدى جوبانى جۇزەگە اسىردى, سوندىقتان ءبىز ءوزارا ءتيىمدى ىنتىماقتاستىققا نيەتتىمىز. بۇل ءبىزدىڭ بىرلەسكەن جوبالارىمىزدى عىلىمي سۇيەمەلدەۋدى تيىمدىرەك ەتەدى», دەدى ن.نۇرجىگىتوۆ.
ءمينيستردىڭ China Energy International Group كومپانياسىنىڭ باسقارما توراعاسى ليۋ تسزەسيانمەن كەزدەسۋىندە قازاقستاننىڭ سۋ قويمالارىندا سۋ ەلەكتر ستانتسيالارىنىڭ قۇرىلىسى تالقىلاندى. قىتايلىق كاسىپكەرلەر اتالعان جوباعا قىزىعۋشىلىق تانىتتى. تاراپتار بۇل ماسەلەنى تولىعىراق تالقىلاۋعا كەلىستى.
China Energy International Group وكىلدەرى قازاقستاننىڭ سۋ سالاسىن تسيفرلاندىرۋ جانە اۆتوماتتاندىرۋ جوبالارىنا قاتىسۋعا نيەت ءبىلدىردى. سونىمەن قاتار قىتايلىق كومپانيا ەلىمىزدە اعىندى سۋلاردى تازارتۋ قوندىرعىلارىن ورناتۋعا دايىن ەكەنىن جەتكىزدى.
