فوتو: ۇكىمەتتىڭ ءباسپاسوز قىزمەتى
گۋربانگۋلى بەردىمۇحامەدوۆ العاش رەت وتكىزىلىپ وتىرعان «شىۇ پليۋس» فورماتىنداعى كەزدەسۋگە قاتىسادى, ول «كوپجاقتى ديالوگتى نىعايتۋ – ورنىقتى بەيبىتشىلىك پەن دامۋعا ۇمتىلۋ» ۇرانىمەن وتەدى. وتىرىسقا بايقاۋشى مەملەكەتتەردىڭ باسشىلارى, قۇرمەتتى قوناقتار, حالىقارالىق ۇيىمداردىڭ وكىلدەرى قاتىسادى.
قازاقستان مەن تۇرىكمەنستان اراسىنداعى ديپلوماتيالىق قاتىناستار دوستىق پەن ستراتەگيالىق ارىپتەستىك نەگىزىندە دامىپ جاتىر. ترانزيتتىك-كولىك سالاسىندا بىرلەسكەن ءوزارا ءتيىمدى جوبالار بار, گاز سالاسىنداعى ىنتىماقتاستىقتى دامىتۋ بويىنشا قادامدار بەلگىلەنگەن.
وتكەن جىلدىڭ قورىتىندىسى بويىنشا قازاقستان مەن تۇرىكمەنستان اراسىنداعى ءوزارا ساۋدا كولەمى $563 ملن قۇرادى, وسىلايشا 2022 جىلمەن سالىستىرعاندا 28%-عا ۇلعايدى. بيىل دا وڭ ءۇردىس ساقتالدى: 4 ايدا ءوزارا ساۋدا كولەمى ءوسىپ, $167,8 ملن-عا جەتتى.
