بىردەن ءۇش پەرزەنتتى بولعان انا بارلىق مەديتسينالىق قىزمەتكەرلەرگە شىنايى العىسىن ءبىلدىرىپ, بالالاردىڭ جاعدايى قالىپتى ەكەنىن جەتكىزدى. بۇدان بولەك ءۇش بالاسى بار وتباسى ەندى كوپ بالالى شاڭىراق بولىپ وتىر.
«مەن, ماقپال ءجۇنىسوۆا ۇشەم بوساندىم. جۇكتىلىك كەزىندە جانىمدا بولعان دارىگەرلەر مەن مەديتسينا قىزمەتكەرلەرىنە العىسىمدى بىلدىرگىم كەلەدى. جۇكتىلىكتىڭ 35 ايىندا بوساندىم, ءبارى قالىپتى ءوتتى. ارينە, سوڭعى ايدا قيىنداۋ بولدى. العاشىندا دارىگەرلەر ەگىز بولادى دەگەن. بىراق كەيىن ۇشەم بولاتىنىن ەستىگەندە جولداسىم ەكەۋىمىز قاتتى تاڭعالدىق. ۇيدە تاعى ەكى ۇلىم مەن ءبىر قىزىم بار. ەندى, مىنە, ميراس, گۇلنار جانە گاۋھار ەسىمدى ۇشەم ومىرگە كەلدى», – دەيدى ماقپال ءجۇنىسوۆا.
قازىرگى ۋاقىتتا بالالاردىڭ جاعدايى قالىپتى. دارىگەرلەر ۇشەمنىڭ اناسىنا بارىنشا كومەك بەرەتىنىن جەتكىزدى.
«ەڭ ۇلكەن بولعان ۇل بالا 2 كەلى 300 گرامم سالماقپەن تۋدى. قالعان ەكى قىز بالا 2 كەلى 200 گرامنان دۇنيەگە كەلدى. قازىرگى ۋاقىتتا بالالاردىڭ جاعدايى قاناعاتتانارلىق. بالالارعا ءبىزدىڭ مەديتسينالىق پەرسونال كومەك كورسەتىپ جاتىر. سابيلەر جەتىلمەي تۋعاندىقتان پەرزەنتحانادا بارلىق قاجەتتى مەديتسينالىق تەكسەرىستەر مەن مامانداردىڭ كونسۋلتاتسيالارى دا بىرگە جۇرگىزىلەتىن بولادى. بارىنشا كومەك بەرىلەتىن بولادى», – دەيدى كوكشەتاۋ قالالىق پەرزەنتحاناسىنىڭ نەوناتولوگ-دارىگەرى تاتيانا شافيگينا.
قازىرگى ۋاقىتتا انەستەزيادان كەيىن ەندى عانا ەسىن جيعان ۇشەمنىڭ اناسى سابيلەرىن باۋىرىنا العان.
