فوتو: Orda.kz
سالماقتى سامميت جۇمىسىنا وراي الەمگە بەلگىلى تاجىريبەگە سايكەس ۋاكىلەتتى مەملەكەتتىك ورگاندار كەلەتىن شەتەلدىك دەلەگاتسيالاردىڭ, ولاردىڭ ىشىندە مەملەكەت باسشىلارى مەن حالىقارالىق ۇيىمدار باسشىلارىنىڭ قاۋىپسىزدىگىن جوعارى دەڭگەيدە قامتاماسىز ەتۋگە تولىققاندى شارالار قابىلدايدى.
«تەرروريزمگە قارسى ءىس-قيمىل تۋرالى» زاڭنىڭ 12, 13 جانە 15-باپتارىنا سايكەس كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ بويىنشا كۇزەت ءىس-شارالارىن وتكىزۋ كەزىندە تەرروريزمگە قارسى كۇرەس جونىندەگى رەسپۋبليكالىق جەدەل شتابتىڭ باسشىسى رەتىندە قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ شەشىمى بويىنشا استانا, الماتى, قاراعاندى جانە كوكشەتاۋ قالالارىنىڭ جەكەلەگەن ۋچاسكەلەرىندە تەرروريزمگە قارسى وپەراتسيانىڭ قۇقىقتىق رەجيمىندە قۇقىقتىق ءتارتىپ پەن قوعامدىق قاۋىپسىزدىكتى قولداۋ ءىس-شارالارى وتەدى. قۇقىقتىق رەجيم 2 شىلدەنىڭ 00 ساعات 01 مينۋتىنان باستاپ 4 شىلدەنىڭ 23 ساعات 59 مينۋتىنا دەيىن شانحاي ىنتىماقتاستىق ۇيىمىنىڭ ءسامميتى وتكىزىلەتىن وبەكتىلەر اۋماعىنا جانە كۇزەتىلەتىن تۇلعالاردىڭ ءجۇرۋ باعىتتارىنا ورناتىلادى, دەلىنگەن ۇلتتىق قاۋىپسىزدىك كوميتەتىنىڭ حابارلاماسىندا.
كۇزەتىلەتىن تۇلعالار اقمولا, قاراعاندى وبلىسى مەن الماتى قالاسى اۋماعىنا بارعان جاعدايدا ولار كەلگەن كەزەڭگە جانە اتالعان وڭىرلەردە بولاتىن ورىنداردا تەرروريزمگە قارسى وپەراتسيانىڭ قۇقىقتىق رەجيمى ورناتىلادى.
تەرروريزمگە قارسى وپەراتسيا وتكىزۋ ايماقتارىندا كۇزەتىلەتىن تۇلعالار بولعان ۋاقىتتا اتالعان ايماقتاردا ادامداردىڭ جانە اۆتوكولىكتەردىڭ قوزعالۋىنا شەكتەۋ ەنگىزىلەدى.
كۇزەتىلەتىن تۇلعالاردىڭ جۇرەتىن ارنايى جولدارىندا قالالىق جولاۋشىلار كولىكتەرىنىڭ قوزعالىسى دا توقتاتىلادى. ال بۇل وزگەرىستەر تۋرالى استانا قالاسى اكىمدىگىنىڭ رەسمي اقپاراتتىق پورتالى حابارلادى.
«قازاقستان رەسپۋبليكاسى پرەزيدەنتىنىڭ 2013 جىلعى 9 تامىزداعى №611 جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىنا» سايكەس تەرروريزمگە قارسى وپەراتسيانىڭ قۇقىقتىق رەجيمى ەنگىزىلۋىن ەسكەرە وتىرىپ, استانا, الماتى, قاراعاندى جانە كوكشەتاۋ قالالارىنىڭ شانحاي ىنتىماقتاستىق ۇيىمىنىڭ ءسامميتىن وتكىزۋ وبەكتىلەرىندە 2 شىلدە 00 ساعات 01 مينۋتىنان باستاپ 4 شىلدە 23 ساعات 59 مينۋتىنا دەيىن تەرروريستىك قاۋىپتىلىكتىڭ بىرقالىپتى («سارى») دەڭگەيى بەلگىلەنەدى, دەپ جازدى ۇقك ءباسپاسوز قىزمەتى.
ال تەرروريستىك قاۋىپتىلىكتىڭ بىرقالىپتى («سارى») دەڭگەيى كەزەڭىندە مىناداي تارتىپ بەلگىلەنەدى:
- جەكەلەگەن اۋماقتاردا كولىك پەن جاياۋ جۇرگىنشىلەردىڭ قوزعالىستارىنا شەكتەۋ ەنگىزىلەدى;
- كينولوگيا قىزمەتىنىڭ ماماندارىن تارتا وتىرىپ, كوشەلەردە, الاڭداردا, ستاديونداردا, سكۆەرلەردە, ساياباقتاردا, ماگيسترالدى تەمىرجول جەلىلەرىندە, تەمىرجول ۆوكزالدارىندا, اۆتوۆوكزالداردا, اۋەجايلاردا, مەتروپوليتەن وبەكتىلەرىندە, بۇقارالىق جانە جاپپاي ءىس-شارالار وتەتىن ورىنداردا پاترۋلدەردى كۇشەيتەدى;
- جارىلعىش قۇرىلعىلاردى انىقتاۋ جانە جويۋ بويىنشا تەرروريستىك تۇرعىدان وسال وبەكتىلەرگە جانە ادامدار كوپ جينالاتىن ورىندارعا, بۇقارالىق جانە جاپپاي ءىس-شارالارعا قاتىسۋشىلاردىڭ قوزعالۋلارىنىڭ نەگىزگى باعدارلارىنا تەكسەرۋ جۇرگىزەدى;
- اۋەجايلاردا, مەتروپوليتەن وبەكتىلەرىندە, تەمىرجول ۆوكزالدارىندا جانە اۆتوۆوكزالداردا جەتە تەكسەرۋ ءىس-شارالارىن وتكىزۋ بارىسىندا ارنايى تەحنيكا قۇرالدارىن پايدالانۋ ارقىلى رەجيمدىك شارالاردى كۇشەيتەدى.
