قالالىق اكىمدىكتىڭ ءباسپاسوز قىزمەتىنىڭ دەرەگىنە سۇيەنسەك, قازىرگى كەزدە 35 جوعارى وقۋ ورنىندا 199 مىڭنان استام ستۋدەنت ءبىلىم الىپ جاتقان بولسا, ولاردىڭ ءجۇز مىڭنان استامىن قالا سىرتىنان كەلىپ وقيتىن ستۋدەنتتەر قۇرايدى. ال مەگاپوليستە 109 جاتاقحانادا تۇرىپ جاتقان ستۋدەنتتەر سانى 36 مىڭنان اسادى.
جاتاقحانا جەتىسپەۋشىلىگىنىڭ الدىن الۋ, ستۋدەنتتەردى دەر كەزىندە باسپانامەن قامتۋ ماقساتىندا بىلتىر ناۋرىز ايىندا قالالىق اكىمدىك عىلىم جانە جوعارى ءبىلىم مينيسترلىگىمەن بىرلەسىپ, جوبالىق كەڭسە اشقان بولاتىن. جوبالىق كەڭسە جاتاقحانالار سالۋ مەن ستۋدەنتتەردى تۇرعىن ۇيمەن قامتاماسىز ەتۋ جونىندەگى مەملەكەتتىك باعدارلامانى ىسكە اسىرۋ ءۇشىن قولايلى جاعداي جاساي وتىرىپ, قالالىق اكىمدىك پەن قارجى ورتالىعى تاراپىنان تۇرعىن ءۇي قۇرىلىسىنا مۇددەلى جوعارى وقۋ ورىندارى, الەۋەتتى ينۆەستورلارعا شۇعىل زاڭگەرلىك, كونسۋلتاتسيالىق, ساراپتامالىق كومەك كورسەتەدى. بۇگىندە جوبالىق كەڭسە قىزمەتىنە 120 ينۆەستور جۇگىنگەن. وسى ماقساتتا جاڭا وقۋ جىلىندا اشىلۋى جوسپارلانىپ وتىرعان Narxoz Housing ينكليۋزيۆتى ستۋدەنتتىك جاتاقحانا قۇرىلىسىن اتاپ كەتۋگە بولادى.
ۋنيۆەرسيتەت اۋماعىندا اكتسيونەردىڭ ءوز قاراجاتى ەسەبىنەن سالىنىپ جاتقان جاتاقحانا ءبىلىم بەرۋ گرانتى ءارى كوممەرتسيالىق نەگىزدە وقيتىن ستۋدەنتتەر ءۇشىن دە قولجەتىمدى. مۇندا ەرەكشە قاجەتتىلىكتەرى بار ستۋدەنتتەرگە ارنالعان ارنايى بولمەلەر دە قاراستىرىلعان. جوباعا سايكەس, 424 ورىندىق زاماناۋي جاتاقحانادا ينكليۋزيۆتى بولمەلەر, اسحانا, مەديتسينالىق ورتالىق, ينتەرنەتكە قولجەتىمدى كوۆوركينگ-ايماق, وقۋعا جانە دەمالۋعا ارنالعان بولمەلەر ستۋدەنتتەر ءۇشىن جايلى بولماق.
وسىلايشا, قالاداعى ورىن تاپشىلىعىن شەشۋدى ۋادە ەتىپ وتىرعان قالالىق اكىمدىك دەرەگىنە سۇيەنسەك, بىلتىر 3 969 توسەكتىك ورىنعا ارنالعان 14 نىسان پايدالانۋعا بەرىلىپ, جاتاقحانالاردا ورىن جەتىسپەۋشىلىگى 32,7 مىڭنان 28,7 مىڭعا ازايىپ وتىر. بيىلعى جوسپار بويىنشا جوسپارداعى كورسەتكىش 4 مىڭ توسەكتىك ورىندى قۇرايدى. جاڭا وقۋ جىلىندا 1 165 توسەكتىك ورىنعا ارنالعان 5 نىسان پايدالانۋعا بەرىلەتىن بولادى.
الماتى
