ۇبت-دا ءتارتىپ بۇزۋشىلىق ازايدى

ۇلتتىق تەستىلەۋ ورتالىعى­نىڭ قوستاناي قالاسىنداعى فيليال باسشىسى نۇرگەلدى حاسەنوۆتىڭ ايتۋىنشا, بيىل تالاپكەرلەر نەگىزگى ۇبت-نى ەكى رەت تاپسىرىپ, سونىڭ ەڭ ۇزدىك ناتيجەسىمەن گرانت كونكۋرسىنا قاتىسا الادى. تالاپكەرلەر تەستىلەۋ كۇنىن, ۋاقىتىن جانە تەست تاپسىراتىن ورىندى وزدەرى تاڭدادى.

«بيىل بالالار ءۇش مىن­دەتتى جانە تاڭداۋ بويىنشا ەكى پاننەن تەست تاپسىرادى. «وقۋ ساۋاتتىلىعى» مەن «ما­تەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. بۇل بەيىندىك پاندەر بويىنشا سۇراقتار سانىن 40-قا دەيىن ارتتىرۋعا مۇمكىندىك بەردى. سونىمەن قاتار بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى. ۇبت تاپسىرمالارىنىڭ سانى – 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعى­نان» 10 تاپسىرما, «ماتەماتيكا­لىق ساۋاتتىلىقتان» 10 تاپسىرما جانە ەكى بەيىندىك ءپان بويىن­شا 40 تاپسىرما. جوعارى بالل – 140, ول دا وزگەرىسسىز قالدى», دەيدى نۇرگەلدى حاسەنوۆ.

ۇتو باسشىسىنىڭ ايتۋىنشا, تەستىلەۋدىڭ جالپى ۋاقىتى – 4 ساعات. سونىمەن قاتار ەرەكشە ءبىلىم بەرۋ قا­جەتتىلىكتەرى بار بالالارعا قوسىمشا 40 مينۋت ۋاقىت بەرىلەدى. ال كورۋ قابىلەتى بۇزىلعان بالالاردىڭ ىڭعايى ءۇشىن سىزبا جانە دياگراممالارسىز سۇراقتار ازىرلەنگەن.

«قازىر جالپى تەستىلەۋ قاڭ­تاردا, ناۋرىزدا, ماۋسىم, شىلدە, تامىز ايلا­رىندا – جالپى جىلىنا بەس رەت وتەدى. وسىعان بايلانىستى بالالار تەست تاپسىرۋعا پسيحولوگيالىق تۇرعىدان ابدەن دايىن بولىپ كەلەدى. سوندىق­تان 5 رەت تەست تاپسىرعان, ەڭ الدى­مەن, بالالاردىڭ وزدەرى ءۇشىن جاقسى. قازىر بالالار مەن اتا-انانىڭ بويىندا بۇرىنعى­داي قورقۋ, تولقۋ, قوبالجۋ جوق. ابدەن ۇيرەنىپ الدى», دەيدى ۇلتتىق تەستىلەۋ ورتالىعىنىڭ باسشىسى.

نۇرگەلدى ءسالىمجان ۇلى­نىڭ اي­تۋىنشا, سوڭعى جىلدارى ۇبت تاپسىرۋشىلار اراسىندا ءتارتىپ بۇزۋشى­لىق كوپ ازايعان. ماسەلەن, قوستا­ناي قالاسىنداعى ۇتو-دا وسى ۋاقىت­قا دەيىن ءتارتىپ بۇزۋ جاعدايى ەكى-اق رەت تىركەلگەن. ءبىر بالا قاعازعا جازىل­عان دايىن جاۋاپتى كوشىرمەك بول­عان, ەكىنشىسى تەستىلەۋ ورتالىعىنا ۇيالى تەلەفون الىپ وتپەك بولعان.

قوستاناي وبلىسى