فوتو: senate.parlam.kz
قاتارداعى كىتاپحاناشىلاردىڭ ورتاشا جالاقىسى 125 000 تەڭگەنى قۇرايتىنىن جانە بۇل بىلىكتى كادرلاردىڭ اتالعان سالادان كەتۋىنە سەبەپ بولىپ وتىرعانىن ايتقان سەناتور: «كىتاپحانالار كومپيۋتەرلەر مەن كوشىرۋ-كوبەيتۋ تەحنيكاسىمەن ناشار جابدىقتالعان, كوبى ەسكىرگەن. كوپتەگەن كىتاپحانالاردىڭ عيماراتتارى ۇزاق جىلدار بويى كۇردەلى جوندەۋدەن وتپەگەن. ارناۋلى كىتاپحانالارداعى, بالالار, جاسوسپىرىمدەر, زاعيپ جانە ناشار كورەتىندەرگە ارنالعان كىتاپحانالاردىڭ جاعدايى كوڭىلدەن شىعا بەرمەيدى. مۇگەدەكتىگى جانە ەرەكشە قاجەتتىلىكتەرى بار ادامداردىڭ كىرۋى جانە ەركىن ءجۇرۋى وتە قيىن. پاندۋستار, امبەباپ كابيناسى بار سانيتارلىق توراپتار, كولىك قۇرالدارىنا ارنالعان تۇراق ورىندارى جوق», دەدى.
سونىمەن قاتار سەناتوردىڭ ايتۋىنشا, قولجەتىمدى كىتاپتاردىڭ كوبى ەسكىرگەن جانە وقىرمانداردىڭ زاماناۋي اقپاراتتىق سۇرانىسىنا سايكەس كەلمەيدى. قارجىلاندىرۋدىڭ جەتكىلىكسىزدىگىنە بايلانىستى كىتاپ قورىن جىل سايىن جاڭارتۋ ءىسى سوڭعى 20 جىلدا نەبارى 1,8%-دى قۇراپ وتىر. اۆتورلىق قۇقىق تۋرالى زاڭنىڭ نورمالارى قازىرگى اۆتورلاردىڭ شىعارمالارىن تسيفرلىق فورماتتا تولىق ۇسىنۋعا مۇمكىندىك بەرمەيدى, بۇل كىتاپتارعا قولجەتىمدىلىكتى شەكتەيدى.
«كوپشىلىك كىتاپحانالاردىڭ 60,7%-ى عانا ينتەرنەت جەلىسىنە تولىققاندى قول جەتكىزە الادى. وسىعان بايلانىستى, كىتاپحانا سالاسىن جاڭعىرتۋ, كىتاپحانالارعا قاتىستى مەملەكەتتىڭ جاۋاپكەرشىلىگى مەن مىندەتتەرىن ايقىنداۋ ءۇشىن «كىتاپحانا ءىسى» تۋرالى جەكە زاڭ قابىلداۋ قاجەت. بىلىكتى كادرلاردى تارتۋ جانە ۇستاپ قالۋ ءۇشىن كىتاپحاناشىلاردىڭ جالاقىسىن مەملەكەتتىك دەڭگەيدە كوتەرۋ كەرەك. وڭىرلىك كىتاپحانالار قورلارىن تولىققاندى جانە ۋاقىتىلى تولىقتىرۋ ءۇشىن كىتاپحانالىق بىرىڭعاي ورتالىق قۇرۋ كەرەك», دەدى سەنات دەپۋتاتى نۇرتورە ءجۇسىپ.
