فوتو: almaty.kgd.gov.kz
«شىمكەنت قالاسىنىڭ قىلمىستىق ىستەر جونىندەگى اۋدانارالىق سوتى تۇركىستان وبلىسىنىڭ تسيفرلاندىرۋ, مەملەكەتتىك قىزمەت كورسەتۋ جانە مۇراعاتتار باسقارماسى باستىعىنىڭ ورىنباسارى م.مىرزاسەيىتوۆكە, وسى باسقارمانىڭ ءبولىم باسشىسى ا.جولسەيىتوۆكە جانە كاسىپكەر ە.يساكوۆكە قاتىستى ۇكىم شىعاردى», دەپ حابارلادى سىبايلاس جەمقورلىققا قارسى قىزمەت.
2022 جىلدىڭ تامىزىنان 2023 جىلدىڭ شىلدەسىنە دەيىنگى كەزەڭدە مەملەكەتتىك ورگانداردى اقپاراتتاندىرۋ جانە تسيفرلاندىرۋ جونىندەگى قىزمەتتەردى مەملەكەتتىك ساتىپ الۋ كەلىسىمشارتتارىن جاساسقانى, ولار بويىنشا اتقارىلعان جۇمىستاردىڭ اكتىسىنە قول قويۋ ءۇشىن جالپى سوماسى 14,6 ملن تەڭگەنى قۇرايتىن بىرنەشە رەت پارا العانى جانە بەرگەنى ءۇشىن, سونىمەن قاتار جولسەيىتوۆ بۇدان باسقا - پارا بەرۋگە جانە الاياقتىق جاساۋعا يتەرمەلەگەنى ءۇشىن كىنالى دەپ تانىلدى.
جولسەيىتوۆ تولەبي اۋدانىنىڭ تسيفرلاندىرۋ ءبولىمىنىڭ باسشىسى لاۋازىمىنا اۋىسقاننان كەيىن وسىنداي ارەكەتتەردى ورىنداعانى ءۇشىن جوعارى تۇرعان لاۋازىمدى تۇلعالارعا بەرۋ سىلتاۋىمەن يساكوۆتىڭ 903 مىڭ تەڭگە سوماسىنداعى اقشالاي قاراجاتىن الاياقتىق جولمەن يەمدەنگەنى انىقتالدى.
ءدال وسىنداي ۇكىممەن وتىرار اۋدانى اكىمى اپپاراتىنىڭ باسشىسى ا. ماۋلەن كونكۋرستىڭ جەڭىمپازىن انىقتاعانى جانە اۋداننىڭ اۋىلدىق وكرۋگتەرىنە IT-قىزمەتتەردى مەملەكەتتىك ساتىپ الۋ كەلىسىمشارتىن جاساعانى ءۇشىن يساكوۆتان 5 ملن تەڭگە سوماسىندا پارا العانى ءۇشىن كىنالى دەپ تانىلدى.
«سوت مىرزاسەيىتوۆتى 8 جىلعا, ىسقاقوۆتى 7 جىلعا, جولسەيىتوۆتى 4 جىلعا باس بوستاندىعىنان ايىرۋ تۋرالى ۇكىم شىعاردى. سونىمەن بىرگە اتالعان ادامدار مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويى ايىرىلدى», دەلىنگەن حابارلامادا.
سوت ماۋلەننىڭ ولىمىنە بايلانىستى وعان قاتىستى قىلمىستىق قۋدالاۋدى توقتاتتى. ۇكىمدى جاريالاۋ وبلىستىق تسيفرلاندىرۋ باسقارماسى ۇجىمىنىڭ قاتىسۋىمەن ءوتتى. ۇكىم زاڭدى كۇشىنە ەنگەن جوق.
