فوتو: kaz.inform.kz
كوميسسيانىڭ قۇرامىندا پارلامەنت ءماجىلىسىنىڭ دەپۋتاتتارى, عىلىم جانە جوعارى ءبىلىم مينيسترلىگىنىڭ, جوو قاۋىمداستىعىنىڭ, «اتامەكەن» ۇلتتىق كاسىپكەرلەر پالاتاسىنىڭ وكىلدەرى جانە قوعام قايراتكەرلەرى بار.
ەڭ الدىمەن, عىلىم جانە جوعارى ءبىلىم ءمينيسترى ساياسات نۇربەك كوميسسيا مۇشەلەرىن رەكتورلاردى ايقىنداۋ جونىندەگى ءتارتىپتىڭ جاڭا ەرەجەسىمەن تانىستىردى. ەرەجەگە سايكەس, ۇمىتكەرلەرگە قويىلاتىن تالاپتار كۇشەيتىلدى. ەڭ باستى مىندەت – ءتيىمدى مەنەدجمەنت ارقىلى جوعارى ءبىلىم ساپاسىن كوتەرۋگە ىقپال ەتۋ.
رەكتورلىققا ۇمىتكەردىڭ عىلىمي دارەجەسى, ءبىلىم جانە عىلىم سالاسىندا كەم دەگەندە 5 جىل باسقارۋ تاجىريبەسى بولۋى كەرەك. كانديداتتىڭ عىلىمي اتاعى (پروفەسسور, دوتسەنت) دا ەسكەرىلەدى. بۇل – رەكتورعا قويىلاتىن تالاپتاردىڭ ءبىر بولىگى عانا.
كەزەكتى وتىرىس بارىسىندا ەلدەگى 3 جوعارى وقۋ ورنىنىڭ باسشىلىعىنا ۇمىتكەرلەر تىڭدالدى.
رۋدنىي يندۋستريالدى ۋنيۆەرسيتەتى نەگىزىنەن تەحنيكالىق عىلىمدار مەن تەحنولوگيالار بويىنشا ماماندار دايىندايدى. وعان رەكتور بولۋدان ءۇمىتتى 4 ازامات باعدارلاماسىن قورعادى. ناتيجەسىندە, نۇربەك ساپارقوجاەۆتىڭ كانديداتۋراسى كوپشىلىك داۋىسپەن قولداۋ تاپتى.
قاراعاندى يندۋستريالدى ۋنيۆەرسيتەتى – كوبىنە تەحنيكالىق ماماندار دايارلاۋعا ماماندانعان جوعارى وقۋ ورنى. ونىڭ رەكتورى قىزمەتىنە 2 ۇمىتكەر ۇسىنىلعان بولاتىن. ولار ۋنيۆەرسيتەتتىڭ الداعى 5 جىلعا ارنالعان دامۋ جوسپارىن ۇسىندى. ناتيجەسىندە, كوپشىلىك داۋىسپەن باقىت جاۋتىكوۆتىڭ جوباسى ۇزدىك دەپ تانىلدى.
تەرىسكەيدەگى كونە وقۋ ورىندارىنىڭ ءبىرى – ماناش قوزىباەۆ اتىنداعى سولتۇستىك قازاقستان ۋنيۆەرسيتەتى بىرقاتار باعىتتا ماماندار دايىندايدى. مۇندا گۋمانيتارلىق, تەحنيكالىق, ينجەنەرلىك, اۋىل شارۋاشىلىعى سەكىلدى سالالار بويىنشا شاكىرتتەر وقىتىلۋدا. ىرگەلى وقۋ ورنىنىڭ رەكتورى بولۋعا ۇمىتكەر 2 ازامات ءوز باعدارلامالارىن ۇسىندى. كوميسسيا مۇشەلەرى ەربول يساقاەۆتىڭ كانديداتۋراسىن كوپشىلىك داۋىسپەن قولدادى.
«ەلىمىزدىڭ ەڭبەك نارىعىنا قاجەتتى ماماندار دايارلاۋ – اسا جوعارى جاۋاپتى مىندەت. بۇگىن كوميسسيا مۇشەلەرى ماقۇلداپ, تاعايىنداۋعا ۇسىنىلعان ازاماتتار ارتىلعان سەنىمدى اقتايدى دەپ ويلايمىن», دەپ اتاپ ءوتتى تامارا دۇيسەنوۆا.
