فوتو: © Depositphotos
ساراپشىلار گادجەتكە انتيۆيرۋستىق باعدارلاما ورناتىپ, قورعالماعان جەلىلەر ارقىلى قارجىلىق ترانزاكتسيالاردى جاساماۋعا شاقىرادى.
IT سالاسى ماماندارى كيبەرشابۋىلشىلار الدىن الا تەگىن Wi-Fi-دى بۇزىپ, دايىن وتىراتىنىن جەتكىزدى. كوفەحانا, مەيرامحانا, قوناق ءۇي كليەنتتەرى ينتەرنەتكە قوسىلعاندا, قاسكويلەردىڭ بارلىق دەرەكتى قولدارىنا تۇسىرەتىن مۇمكىندىگى بار. سوندىقتان دا جەكە اقپاراتىڭىز جاريا بولىپ, ەسەپشوتىڭىزداعى قاراجاتقا قول سۇعۋ قاۋپى باسىم دەيدى كيبەرشابۋىلداردى تالداۋ جانە زەرتتەۋ ورتالىعى ساراشىلارى.
«ميتم-شابۋىل, دومەن اۋىستىرۋى مۇمكىن. سول سەبەپتى تەگىن Wi-Fi-لاردى قاۋىپسىز دەپ ايتۋعا بولمايدى. ينتەرنەت بانكينگ, الەۋمەتتىك جەلى قولدانباعان دۇرىس. قانداي دا ءبىر سەزىمتال دەرەكتەردى جىبەرمەۋ كەرەك. حابارلاما عانا جىبەرىپ, Wi-Fi قولجەتىمدىلىگىنەن شىعۋ كەرەك», دەدى كيبەرشابۋىلداردى تالداۋ جانە زەرتتەۋ ورتالىعىنىڭ جوبالىق ديرەكتسيا جەتەكشىسى ەرنات اتانباەۆ.
بۇدان بولەك حاكەرلەر زياندى باعدارلامانى جالپىعا ورتاق Wi-Fi ارقىلى پايدالانۋشىنىڭ گادجەتىنە ەنگىزە الادى. اتالعان باعدارلامالار تەگىن جەلىدەن اجىراتىلعاننان كەيىن دە, پايدالانۋشىنىڭ جەكە دەرەكتەرىن تاسىمالداعاننان كەيىن دە جۇمىس ىستەي بەرەدى. ەگەر قۇرىلعىڭىزدىڭ جۇمىس ىستەۋى باياۋلاپ, وزدىگىنەن قوسىلىپ-وشسە نەمەسە قىزىپ كەتسە, تەلەفونىڭىزعا ۆيرۋس كىردى دەگەن ءسوز. جارنامالار ءجيى پايدا بولىپ, مەگابايتىڭىز ادەتتەگىدەن تەزىرەك ازايسا, الاياقتاردىڭ شىرماۋىنا تۇسكەنىڭىزدىڭ بەلگىسى.
