فوتو: ءماجىلىس ءباسپاسوز قىزمەتى
وتىرىستى اشقان ەرلان قوشانوۆ وسى جىلدىڭ مامىر ايىندا مالايزيا پارلامەنتى سەناتىنىڭ توراعاسى مۋتانگ تاگالدىڭ مەزگىلسىز قايتىس بولۋىنا بايلانىستى كوڭىل ايتتى.
ءماجىلىس سپيكەرى ەكىجاقتى ىنتىماقتاستىق ماسەلەلەرىنە توقتالا وتىرىپ, مالايزيا قازاقستاننىڭ وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى ەكەنىن اتاپ ءوتتى. سونىمەن قاتار ەكى مەملەكەت باسشىلارى – پرەزيدەنت قاسىم-جومارت توقاەۆ پەن پرەمەر-مينيستر انۋار يبراگيمنىڭ ناتيجەلى ديالوگىنىڭ ارقاسىندا ەكى ەل اراسىندا دوستىق پەن ءوزارا سەنىمگە نەگىزدەلگەن بەرىك ارىپتەستىك بايلانىس ورناعانىنا ءمان بەردى.
«بيىلعى مامىردا پرەمەر-مينيستر انۋار يبراگيمنىڭ قازاقستانعا جاساعان رەسمي ساپارى شىن مانىندە تاريحي بولعانى انىق. بۇل ەكى ەل اراسىنداعى ىنتىماقتاستىقتىڭ جاڭا كەزەڭىنە جول اشاتىنىن قاسىم-جومارت كەمەل ۇلى دا ءوز سوزىندە اتاپ ءوتتى. ءبىز كوشباسشىلارىمىز سالىپ بەرگەن وسى سارا جولدى پارلامەنت دەڭگەيىندە دوستاس حالىقتارىمىزدىڭ يگىلىگى ءۇشىن ودان ءارى جالعاستىرامىز دەپ سەنەمىن», دەدى ەرلان قوشانوۆ.
ءماجىلىس توراعاسى قوناقتارعا مەملەكەت باسشىسىنىڭ باستاماسىمەن قازاقستاندا جۇزەگە اسىپ جاتقان ەكونوميكالىق جانە ساياسي رەفورمالار تۋرالى كەڭىنەن تارقاتىپ بەردى. سونىمەن قاتار ەكونوميكانى دامىتۋعا, قوعامداعى زاڭ مەن ءتارتىپتىڭ ۇستەمدىگىن قامتاماسىز ەتۋگە باعىتتالعان بارلىق اۋقىمدى وزگەرىس ءتيىستى زاڭداردى قابىلداۋدان باستالاتىنىنا نازار اۋداردى.
ءوز كەزەگىندە مالايزيا پارلامەنتى سەناتى توراعاسىنىڭ مىندەتىن اتقارۋشى قوناقجايلىق ءۇشىن العىسىن ءبىلدىرىپ, قازاقستاندا جۇرگىزىلىپ جاتقان ساياسي رەفورمالارعا قىزىعۋشىلىق تانىتتى.
«پارلامەنت مارتەبەسىن كوتەرۋ – بۇل پرەزيدەنتتەرىڭىزدىڭ وتە ماڭىزدى قادامى. ءويتكەنى ول قوعامداعى ساياسي مادەنيەتتىڭ ارتۋىنا ىقپال ەتەدى. بۇگىن سىزدەردىڭ پارلامەنتىڭىزدە كوپ پارتيا بار ەكەنىن كورىپ وتىرمىز. بىزدە دە وسىنداي جۇيە قالىپتاسقان. بۇل ەلدەرىمىزدەگى دەموكراتيالىق قاعيداتتار مەن سايلاۋدىڭ اشىقتىعىن ايقىن كورسەتەدى», دەدى نۇر دجازلان موحامەد.
سەنات باسشىسىنىڭ مىندەتىن اتقارۋشى سۋ تاسقىنىنا بايلانىستى قازاقستان حالقىنا قولداۋ ءبىلدىردى. ول مالايزيانىڭ سۋ اپاتتارىنا قارسى كۇرەستە مول تاجىريبەسى بار ەكەنىن جانە ونىمەن قازاقستانمەن بولىسۋگە دايىن ەكەنىن مالىمدەدى.
كەزدەسۋدە ساۋدا-ەكونوميكا, مادەني-گۋمانيتارلىق, ءبىلىم بەرۋ سالالارىنداعى ىقپالداستىق ماسەلەلەرى قوزعالدى. بۇل رەتتە نۇر دجازلان موحامەد قازاقستان ستۋدەنتتەرىن مالايزيا جوعارى وقۋ ورىندارىندا وقىتۋ ءۇشىن گرانتتار سانىن كوبەيتۋ تۋرالى باستاما كوتەردى. تاراپتار IT-تەحنولوگيا, ءوزارا ينۆەستيتسيا جانە تۋريزم سالاسىنداعى ىنتىماقتاستىق پەرسپەكتيۆالارىن, سونىڭ ىشىندە استانا مەن كۋالا-لۋمپۋر اراسىنداعى تىكەلەي اۋە قاتىناسىن ارتتىرۋ ماسەلەسىن تالقىلادى.
كەزدەسۋ قورىتىندىسى بويىنشا سپيكەرلەر پارلامەنتشىلەر اراسىندا زاڭ شىعارۋ تاجىريبەسىمەن الماسۋدى كۇشەيتۋ جانە ەكى ەلدىڭ پارلامەنتتىك دوستىق توپتارى باعىتىبويىنشا ىنتىماقتاستىقتى جانداندىرۋ تۋرالى كەلىستى.
