فوتو: ن.بايبۋلين
ماۋلەن اشىمباەۆ مالايزيا قازاقستاننىڭ وڭتۇستىك-شىعىس ازياداعى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى. مالايزيا پرەمەر-ءمينيسترى انۋار يبراگيمنىڭ بيىلعى مامىردا قازاقستانعا جاساعان رەسمي ساپارى ەكىجاقتى بايلانىستى ودان ءارى دامىتۋعا تىڭ سەرپىن بەردى. بۇل ساپار 2014 جىلدان بەرى العاش رەت ۇيىمداستىرىلعانىن ايتا كەتكەن ءجون. قازاقستان پرەزيدەنتى قاسىم-جومارت توقاەۆ انۋار يبراگيممەن كەزدەسۋ كەزىندە اتالعان ساپاردى «تاريحي» دەپ باعالادى.
وسىعان بايلانىستى ماۋلەن اشىمباەۆ پەن نۋر دجازلان موحامەد كەزدەسۋدە ەكىجاقتى پارلامەنتارالىق ىنتىماقتاستىقتى نىعايتۋ ماسەلەلەرىنە باسا ءمان بەردى.
ء«بىز مالايزيامەن پارلامەنتارالىق قاتىناستاردى دامىتۋعا مۇددەلىمىز. ەكى ەلدىڭ پارلامەنتتەرىندە «قازاقستان-مالايزيا» دوستىق توپتارى جۇمىس ىستەيدى. بۇل توپتار – ىنتىماقتاستىقتىڭ ماڭىزدى تەتىگى. ءبىزدىڭ قارىم-قاتىناسىمىزدىڭ ءارتۇرلى اسپەكتىلەرىن تالقىلاۋ جانە ىلگەرىلەتۋ ءۇشىن بىرلەسكەن ءىس-شارالار ۇيىمداستىرۋدىڭ دا ماڭىزى زور», دەدى ماۋلەن اشىمباەۆ.
كەزدەسۋ بارىسىندا تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىق سالاسىنداعى جەتىستىكتەر مەن پەرسپەكتيۆالاردى دا تالقىلادى. سونداي-اق مادەني جانە ءبىلىم بەرۋ بايلانىستارىن كەڭەيتۋ, وسى باعىتتا بىرلەسكەن جوبالاردى ىسكە اسىرۋ جونىندە پىكىر الماستى.
«قازاقستان مالايزيامەن ساۋدا-ەكونوميكالىق ىنتىماقتاستىقتى ودان ءارى نىعايتۋدى كوزدەيدى. قىزمەت كورسەتۋ, قارجى, ءوندىرىس, اۋىل شارۋاشىلىعى, تاماق ونەركاسىبى جانە قۇرىلىس سالاسىنداعى بايلانىستىڭ مۇمكىندىكتەرى كەڭەيىپ كەلەدى. قازاقستان پارلامەنتىنىڭ سەناتى وسى ىنتىماقتاستىقتى زاڭنامالىق دەڭگەيدە ارتتىرۋ ءۇشىن قولداۋ كورسەتۋگە دايىن. پارلامەنتتەردىڭ بۇل باعىتتاعى بەلسەندى ءرولى ەكىجاقتى قارىم-قاتىناستى نىعايتۋعا ىقپال ەتەدى دەپ سەنەمىن», دەدى قازاقستان پارلامەنتى سەناتىنىڭ توراعاسى.
سونىمەن قاتار ماۋلەن اشىمباەۆ مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان رەفورمالاردىڭ ماڭىزىنا, ولاردىڭ ىسكە اسىرىلۋ بارىسىنا جانە ەلدىڭ جاڭا ەكونوميكالىق مودەلىن قالىپتاستىرۋ ءۇشىن قولعا الىنعان شارالارعا توقتالدى.
ءوز كەزەگىندە نۋر دجازلان موحامەد قازاقستانداعى ساياسي جانە الەۋمەتتىك-ەكونوميكالىق ترانسفورماتسيانىڭ تيىمدىلىگىنە نازار اۋدارىپ, پارلامەنتارالىق ىنتىماقتاستىقتى ودان ءارى دامىتۋعا مۇددەلى ەكەنىن ءبىلدىردى.
