فوتو: ile-tany.kz
ءىس-شارا كەزىندە كوميتەت توراعاسى نۇرلان بەكنازاروۆ سوت-مەديتسينالىق ساراپتاما سوت ىسىندەگى ءمان-جايدى وبەكتيۆتى انىقتاۋدا جانە سوت تورەلىگىنىڭ ساپاسىن قامتاماسىز ەتۋدە شەشۋشى ءرول اتقاراتىنىن اتاپ ءوتتى.
«سوت-ساراپتاما قىزمەتى سالاسىندا بىلىكتى مامانداردىڭ جەتىسپەۋشىلىگى سەزىلىپ وتىر, ال كەيبىر وڭىردە ماتەريالدىق-تەحنيكالىق قامتاماسىز ەتۋ دەڭگەيى وتە تومەن. وزەكتى ماسەلەلەردىڭ ءبىرى – مامان ساراپشىنىڭ جەتىسپەيتىنى, وعان جالاقىنىڭ ازدىعى, ەڭبەك جۇكتەمەسىنىڭ جوعارىلىعى جانە الەۋمەتتىك كەپىلدىكتىڭ كوڭىل كونشىتپەۋى سەبەپ بولىپ وتىر. قازىرگى ۋاقىتتا 140 بوس جۇمىس ورنى اشىلدى. اۋماقتىق بولىمشەلەر عيماراتىنىڭ توزۋى جانە ولاردىڭ قاجەتتى جابدىقپەن قامتاماسىز ەتۋدەگى كەمشىلىكتەر دە وزەكتى ماسەلەلەر قاتارىندا. بۇل قىلمىستىق ىستەردى تەرگەۋ ساپاسىنا, سوت تالقىلاۋىنا جانە ازاماتتاردىڭ قۇقىقتارىن قورعاۋعا كەرى اسەرىن تيگىزۋى ىقتيمال», دەدى نۇرلان بەكنازاروۆ.
ادىلەت ءمينيسترى ازامات ەسقاراەۆ سوت مەديتسيناسىن ودان ءارى دامىتۋ ماقساتىندا اۋداندىق جانە اۋدانارالىق سوت مەديتسيناسى بولىمشەلەرىن, سونداي-اق مولەكۋلالىق-گەنەتيكالىق زەرتحانالاردى اشۋ ءۇشىن قارجى ءبولۋ قاجەتتىگىن اتاپ ءوتتى. قىزمەتكەرلەردىڭ بىلىكتىلىگىن ارتتىرۋ اسا ماڭىزدى ەكەنى ايتىلدى. بۇل ماسەلەنى وبلىس اكىمدىكتەرىنەن سوت-مەديتسينالىق ساراپشىلاردى وقىتۋعا ارنالعان ماقساتتى گرانتتار الۋ ارقىلى شەشۋگە بولادى. سونىمەن قاتار سينتەتيكالىق ەسىرتكى مەن كيبەرقىلمىستىڭ جاڭا تۇرلەرىنىڭ ۇنەمى ءوسۋى سوت ساراپتاماسى قىزمەتىن ۇزدىكسىز جەتىلدىرۋدى تالاپ ەتەدى.
سەناتورلار حيميالىق جانە بيولوگيالىق زەرتتەۋلەر قىزمەتتەرىندە, سونداي-اق گيستولوگيالىق جانە حيميالىق-توكسيكولوگيالىق بولىمدەردە بولدى.
