سۋرەتتەردى تۇسىرگەن – ەرلان ومار, «ەQ»
ادەتتە, قالا تازالىعى – بارلىعىمىزعا ورتاق. مۇنى كەز كەلگەن ادام تۇسىنەتىنى انىق. وتىرعان ورنىمىز نەمەسە اۋلامىزدان بولەك, كوشە تازالىعىن ساقتاۋ دا ۇلكەن جاۋاپكەرشىلىك. ءبىز بىلەتىندەي, تازالىققا جاۋاپتى مەكەمەلەر ادامدارمەن قاتار, ءتۇرلى تەحنيكا كومەگىنە جۇگىنەدى.
ءارى ولاردىڭ اتقاراتىن مىندەتى دە ءارتۇرلى. ءبىرى قىس ايىندا قار تازالايدى, تايعاق بولدىرماۋ ءۇشىن تۇزدى قۇم سەبەدى, ەندى ءبىرى جاز ايىندا جول ءۇستىن سىپىرىپ, شاڭ باسۋ ءۇشىن سۋ شاشادى. ەندى ءبىرىنىڭ جۇگى تىپتەن اۋىر: ايتىپ وتىرعان كولىگىمىز قالا ىشىندەگى شاعىن اۋدانداردى تىنىمسىز شارلاپ, بەلگىلەنگەن جەردەگى قوقىس جاشىكتەرىن بوساتىپ جاتادى. دۇرىسى, ونداعى ءسىز بەن ءبىز تاستاعان ءتۇرلى قالدىقتى ءوز بۋنكەرىنە نىعىزداي تيەپ, قالا سىرتىنداعى ارنايى ورىنعا اپارىپ توگەدى. بۇل جۇمىستىڭ كۇندەلىكتى, تاۋلىك بويى دامىلسىز جۇرەتىنىن كوبىمىز بايقاي دا بەرمەيمىز. ال جوعارىدا ايتىپ كەتكەن «STAHLBAU» سەرىكتەستىگى يتاليالىق «IVECO» كومپانياسىمەن بىرلەسە وتىرىپ, جىلىنا 100-گە جۋىق ءدال وسىنداي «تازالىقشى» جۇك كولىگىن تاپسىرىسپەن قۇراستىرىپ كەلەدى.
«قوقىس تاسۋعا نەمەسە جالپى تازالىققا ارنالعان جۇك كولىكتەرىنىڭ بارلىق بولشەگى, ياعني قاڭقاسى, قوزعالتقىشى, ەلەكترلى جابدىقتارى – ءبارى-ءبارىن ارنايى ماماندارىمىز قابىلداپ, قۇراستىرۋ جۇمىستارىن باستايدى. ءبىر جاقسىسى, زاۋىتتاعى جىگىتتەردىڭ باسىم كوپشىلىگى – امبەباپ. ولار كولىك قۇراستىرۋشى دا, ەلەكتريك تە, دانەكەرلەۋشى دە بولا الادى. بارلىعى – 38 ادام. جالپى, ماشينا قۇراستىرۋ بويىنشا زاۋىت ىشىندە بەس پوست بار. ءار پوستىڭ وزىندىك مىندەتى بولادى. ءبىرى – قاڭقادان باستاپ الدىڭعى جانە ارتقى كوپىرلەرىن جيناپ, جۇرىستىك بولىگىن نىقتايدى. ەكىنشىسىندە پنەۆماتيكالىق جانە ەلەكترلى قۇرىلعىلار, ال ءۇشىنشى پوستا موتور مەن قوسالقى جابدىقتار ورناتىلادى. تورتىنشىسىندە شاناق قويىلىپ, وعان قاجەتتى زاتتىڭ بارلىعى بەكىتىلەدى», دەيدى زاۋىت ديرەكتورى ماكسيم سلومينسكي.
ونىڭ ايتۋىنشا, بەسىنشى پوستا قۇراستىرىلىپ بولعان كولىككە قاجەتتى سۇيىقتىقتار (موتور مايى, توسول, ديزەل, ت.ب.) قۇيىلىپ, سوڭعى تەكسەرىستەن وتەدى. وسىلايشا, قاجەتتى كولىك ابدەن دايىن بولعان سوڭ زاۋىت باسشىلىعى تاپسىرىس بەرۋشىنىڭ قولىنا كىلت ۇسىنادى. ايتپاقشى, كاسىپورىن تسەحىن ارالاپ جۇرگەنىمىزدە ءوزىمىز «ساموسۆال» دەپ اتاپ كەتكەن اۋىر جۇك كولىگىن كوردىك. ەڭگەزەردەي ءارى قىپ-قىزىل تۇسكە بويالعان «اSTRA» دەپ اتالاتىن اۆتوماشينانىڭ تەك ارتقى جۇك تيەگىشى جوق. كەيىن بىلگەنىمىزدەي, ونىسى بوياۋ كامەراسىندا سىرلانىپ جاتىر ەكەن.
«اSTRA» دا – يتاليالىق ماركا. 30 تونناعا دەيىن جۇك تيەي الادى. كوبىنە-كوپ كەن قازۋ, قۇرىلىستا توپىراق, تاس تاسۋ جۇمىستارىنا تاپتىرماس تەحنيكا. قازىر ءبىز قۇراستىرعان مۇنداي ماشينالار ەلىمىزدىڭ ءبىرشاما قۇرىلىس جانە گەولوگيالىق كومپانياسىندا بار.
«بۇل دا يتاليادان بولشەك تۇرىندە كەلىپ, ءبىزدىڭ كاسىپورىندا تولىقتاي قۇراستىرىلادى. تەك ارتقى جۇك تيەيتىن قورابى عانا ەلىمىزدە جاسالادى. وسى №1 يندۋستريالىق پاركتە بىرلەسكەن ارىپتەس سەرىكتەسىمىز بار. ولار تەمىرتاۋداعى زاۋىتتان الىنعان شيكىزاتتى بولشەك تۇرىندە فورماعا كەلتىرىپ, وڭدەپ, بىزگە تابىستاسا, ءبىزدىڭ جىگىتتەر ونى دانەكەرلەپ, كولىك كولەمىنە ساي جۇك تيەگىش قوراپ ىستەيدى. ودان كەيىن قاجەتتى تۇسكە بوياپ, بىردەن قۇراستىرىلعان جۇك كولىگىنىڭ ۇستىنە ورنالاستىرامىز», دەيدى زاۋىتتاعى قۇراستىرۋ تسەحىنىڭ باسقارۋشىسى مەرەي بازاركەلدى.
زاۋىت ونىمدەرىنە تاپسىرىس ەلىمىزدىڭ ءار وڭىرىنەن ءتۇسىپ جاتادى. سۇرانىس كوشىن الماتى باستاپ تۇر. بىلتىر جەزقازعاننان دا مول تاپسىرىس تۇسكەن.
ء«بىز كولىكتى تاپسىرىس بەرۋشىنىڭ ۇسىنىسىنا قاراي دايىندايمىز. دايىن بولعان سوڭ, كولىكتى جەتكىزىپ, بارلىق جۇيەسىن ءتۇسىندىرىپ بەرەمىز. سونداي-اق 30 توننالىق اۋىر جۇك كولىكتەرىنەن بولەك, «IVECO» ماركالى قوقىس تاسيتىن جۇك كولىكتەرى دە بىركەلكى بولمايدى. كۋبتىق ەسەپپەن ولشەنىپ, 8-دەن 20 كۋبقا دەيىنگى ولشەمدەگى قوقىس جينايتىن اۆتوماشينالار دايىنداپ كەلەمىز. قار تازالايتىن نەمەسە جازدىگۇنى سۋ شاشىپ, جول سىپىراتىن كولىكتەرىمىز دە سونداي», دەيدى مەرەي.
تسەح باسقارۋشىسىنىڭ ايتۋىنشا, ماماندارعا ەڭ وڭايى «اSTRA» جۇك كولىگىن قۇراستىرۋ ەكەن. «تازالىقشى» كولىكتەردەگىدەي كوپفۋنكتسيالى ەمەس, بارلىعى جۇيەلى ءارى تەز جينالادى.
سىرتتان كەلگەن بولشەكتى قۇراستىرۋ جاڭالىق بولىپ پا دەرسىز. بىراق شەتەلدىك اۆتوونەركاسىپتەگى تىڭ جاڭالىقتى توسىرقاماي, ءسىڭىرىپ, ونى (برەندتىك تاڭبانى) ەلگە اكەلىپ, ءوزىمىزدىڭ جىگىتتەردىڭ ءبىر قولدان نارىققا شىعارۋى – ۇلكەن ەڭبەك.
