نۇرسۇلتاننىڭ كومانداسى جاسايتىن پارفيۋم قىتاي, وزبەكستان جانە كاتار مەملەكەتتەرىنە ەكسپورتتالادى. جاس بيزنەس ءۇشىن بۇل ايتارلىقتاي جاقسى ناتيجە. كاسىپتى ارىپتەسى دياسپەن بىرلەسىپ اشقان. سەرىكتەستەر قاراجاتتى بيزنەسكە تەڭ ءبولىپ سالۋ تۋرالى ۇيعارىمعا كەلىپتى. نۇرسۇلتان كەرەكتى قاراجاتتى تابۋ ءۇشىن پاتەرىن, باسقا مۇلكىن ساتقان.
«باستاپقىدا ءبىرشاما قارجىنى جوعالتىپ الدىق. ءوندىرىس ءۇشىن ساتىپ العان شيكىزاتىمىز ساپاسىز بولىپ شىقتى. وسىلايشا, ءا دەگەننەن ساتسىزدىككە ۇشىرادىق. بىراق بۇل بيزنەستىڭ باستاپقى كەزەڭى ەكەنىن تۇسىندىك. سول ساتسىزدىك ءبىزدى شاربولاتتاي شيرىقتىردى. جىگەرىمىز جاني ءتۇستى. تاۋەكەل ەتكەننەن كەيىن ءىستى اياعىنا دەيىن جەتكىزۋ تۋرالى شەشىم قابىلدادىق», دەيدى ول.
قازىر كومپانيا تاۋلىگىنە 5 000 داناعا دەيىن حوش ءيىستى پارفيۋم ونىمدەرىن جانە ۇيگە ارنالعان ديففۋزورلار مەن بالاۋىزدار وندىرەدى. «ەير استانا» كومپانياسىن ديففۋزورلارمەن قامتىپ وتىر. «Parfum de Vie» برەندى ەلىمىزدىڭ 13 قالاسىنداعى «Beautymania», «MonAmie», «التىن الما», «فرانتسۋز ءۇيى» سەكىلدى ءىرى-ءىرى ساۋدا ۇيلەرىندە ساتىلىپ جاتىر ەكەن. الداعى ۋاقىتتا ساۋدا نۇكتەلەرىنىڭ سانىن ارتتىرۋدى جوسپارلاپ وتىرعان جايى بار.
«ونىمدەرىمىزدىڭ باعاسى قولجەتىمدى. ءونىمنىڭ 70 پايىزى زاۋىت ارقىلى كوتەرمە باعامەن وتكەرىلىپ جاتسا, قالعان 30 پايىزى دۇكەندەر ارقىلى ساتىلىمعا شىعادى», دەيدى.
بىرنەشە جىل بەدەرىندە وتاندىق پارفيۋم ءونىمىن برەندكە اينالدىرعان سەرىكتەستىك وكىلى جىلدىق تابىسى تۋرالى ايتقىسى كەلمەدى. ايتكەنمەن, «Jambylinfo» اقپارات اگەنتتىگىندە كەلتىرىلگەن قىسقاشا دەرەككە جۇگىنسەك, «Parfumer Kazakhstan» جشس-نىڭ 2022 جىلعى جىلدىق تابىسى 237 ميلليون تەڭگەنى قۇراسا, 2023 جىلى كومپانيا 670 ميلليون تەڭگە كولەمىندە تابىس تاۋىپ ۇلگەرىپتى.
جاس كاسىپكەر ەندى «حوش» اتاۋىمەن كوسمەتيكانىڭ بىرنەشە ءتۇرىن شىعارۋعا كىرىسىپ جاتىر. ايتۋىنشا, كومپانيادا بۇگىندە 40-تان اسا ادام جۇمىس ىستەيدى. سونىمەن قاتار قىتاي ەلىنەن زاۋىت اشىپ, كاسىپتى ءارى قاراي وركەندەتۋدى كوزدەپ وتىر.
تارازدا تۋىپ, الماتىدا كاسىبىن دوڭگەلەتكەن نۇرسۇلتان مۇراتبەكوۆتىڭ ارمانى اسقاق. ول بولاشاقتا قازاق برەندىن مۇحيتتىڭ ارعى جاعىنا شىعارعىسى كەلەدى. سول ءۇشىن تىنىمسىز ەڭبەكتەنىپ جاتىر. كاسىپتىڭ كوزىن تاپقان ازاماتتىڭ بۇل ماقساتىنا دا جەتەرىنە سەنەمىز.
جامبىل وبلىسى
