وبلىس پروكۋرورى بەرىك ءابىلوۆ ءوڭىردىڭ بىرەگەي تابيعي رەسۋرستار مەن بيوالۋانتۇرلىلىككە باي ەكەنىن, بىراق, وكىنىشكە قاراي, وسىنشاما يەن بايلىققا زاڭسىز قول سۇققان سۇعاناق كوز سۇر مەرگەندەردىڭ كوبەيىپ بارا جاتقانى الاڭداتىپ وتىرعانىن تىلگە تيەك ەتتى. پروكۋروردىڭ ايتۋىنشا, جانۋارلار الەمى مەملەكەتتىڭ قورعاۋىندا بولعانىنا قاراماستان, سوڭعى جىلدارى ايماقتا براكونەرلىك جاعدايلار جيىلەپ كەتكەن. سوڭعى 3 جىل ىشىندە وڭىردە جانۋارلار دۇنيەسىن پايدالانۋ تالاپتارى مەن اڭ اۋلاۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتىلعاندار قاتارى 17 پايىزعا ءوسىپ وتىر. ماسەلەن, 2021 جىلى 392 ادام تابيعات بايلىعىنا زاڭسىز قول سۇققانى ءۇشىن جازالانسا, 2022 جىلى 423, ال 2023 جىلى 459 قاسكوي اكىمشىلىك جاۋاپكەرشىلىككە تارتىلعان.
«قىزىل كىتاپقا» ەنگەن, ونسىز دا جويىلىپ بارا جاتقان سيرەك كەزدەسەتىن جانۋارلاردى زاڭسىز اۋلاعانى جانە زاڭسىز ۇستاعانى ءۇشىن 43 قىلمىستىق ءىس تىركەلدى, ونىڭ 20-سى سوتقا جىبەرىلدى», دەدى وبلىس پروكۋرورى.
مىسالى, 2023 جىلعى 22 جەلتوقساندا پوليتسيا قىزمەتكەرلەرى اۋليەكول تاس جولىنىڭ قوستاناي قالاسىنا جاقىن تۇسىندا جولاۋشى تاسىمالدايتىن شاعىن اۆتوبۋستى توقتاتادى. كولىكتى تەكسەرۋ بارىسىندا قۇنى 2,1 ملرد تەڭگە بولاتىن 300 كيىك ءمۇيىزى تابىلعان. قازىرگى تاڭدا اتالعان دەرەك بويىنشا قوزعالعان تەرگەۋ جۇمىستارى اياقتالىپ, قىلمىستىق ءىس سوتقا جىبەرىلدى.
جيىن بارىسىندا وڭىردەگى اڭشىلىق شارۋاشىلىقتارىنىڭ جانۋارلار دۇنيەسىن قورعاۋ, ولاردىڭ سانىن كوبەيتۋ جانە پايدالانۋ ماسەلەلەرى تۋراسىندا ءسوز بولدى. وسى باعىتتا جۇرگىزىلىپ جاتقان جۇمىستى ۇيلەستىرۋ جانە تيىمدىلىگىن ارتتىرۋ اياسىندا براكونەرلىككە قارسى ءىس-قيمىل جوسپارى بەكىتىلدى, شەكارا ماڭىنداعى وتكىزۋ پۋنكتتەرىندە جانۋارلار دۇنيەسى نىساندارى مەن تىيىم سالىنعان قۇرالدار, اۋلاۋ قۇرالدارىنىڭ كونترابانداسى فاكتىلەرىنە جول بەرمەۋ جونىندە ءوزارا ءىس-قيمىل الگوريتمى ايقىندالدى.
ۇيلەستىرۋ كەڭەسىنىڭ وتىرىسىندا, سونىمەن قاتار, جەر كولەمى جونىنەن ەلىمىزدە التىنشى ورىندا تۇرعان ۇلان-عايىر ءوڭىردىڭ ورمان القاپتارىن ورتتەن ساقتاۋ باعىتىندا اتقارىلىپ جاتقان ءىس-شارالار, وسى سالاداعى وزەكتى ماسەلەلەر تالقىلاندى.
وبلىس پروكۋرورى ورمان القاپتارىنىڭ قاۋىپسىزدىگى قازاقستان رەسپۋبليكاسى باس پروكۋرورىنىڭ تىكەلەي باقىلاۋىندا ەكەنىن, تاياۋدا تابيعات بايلىعىن قورعاۋمەن اينالىساتىن بارلىق ورمان مەكەمەلەرىنىڭ جۇمىسىنا تالداۋ جۇرگىزىلگەنىن اتاپ ءوتتى.
جيىنعا قاتىسۋشىلار 2022 جىلدىڭ قىركۇيەك ايىندا ورتكە ورانعان اۋليەكول اۋدانىنداعى ورمان القابىنىڭ قازىرگى جاعدايىن ءسوز ەتىپ, امانقاراعاي ورمانىن ساۋىقتىرۋ بارىسىندا زاڭسىز اعاش كەسۋگە جول بەرمەۋ, مەملەكەتكە كەلتىرىلگەن زالالدى وتەۋ شارالارىن تالقىلادى. سونىمەن قاتار, ۇيلەستىرۋ كەڭەسىندە ورمانعا جاقىن ورنالاسقان ەلدى مەكەندەر مەن تۇرعىن ۇيلەردىڭ ءورت قاۋىپسىزدىگىنە دايىندىعىن ارتتىرۋعا باعىتتالعان قوسىمشا شارالار قابىلداندى.
قوستاناي وبلىسى
