سۋرەتتى تۇسىرگەن – جەڭىس ىسقاباي
ءوندىرىس سالاسى وركەندەپ كەلەدى
قازىر وبلىس ورتالىعىنا ينۆەستيتسيا تارتۋ ماسەلەسى كۇن تارتىبىندە تۇر. شاھار باسشىسى اگرارلى وڭىرگە قارجى قۇيام دەگەن ينۆەستورلارعا بارىنشا كومەكتەسۋگە ءازىر. بىلتىر ەلەۆاتور, ءجۇن كورپە شىعارۋ تسەحى ىسكە قوسىلدى. «الماز كەراميكس» كەراميكالىق پليتالاردى شىعارۋ زاۋىتى كەڭەيتىلدى. ناتيجەسىندە, 113 جاڭا جۇمىس ورنى اشىلدى. وسىلايشا, وڭدەۋ ونەركاسىبىنە 9 ملرد تەڭگەگە جۋىق ينۆەستيتسيا تارتىلدى.
«ستاتسيونارلىق اككۋمۋلياتورلىق باتارەيالار زاۋىتى جوباسى جۇزەگە اسىرىلىپ جاتىر. جاقىندا ىسكە قوسىلاتىن جوبانىڭ جالپى قۇنى – 3,2 ملرد تەڭگە. وعان بيىل 700 ملن تەڭگە ينۆەستيتسيا تارتىلادى. ەڭ باستىسى, 120 جۇمىس ورنى قۇرىلادى. بىلتىر بيۋدجەت قاراجاتى ەسەبىنەن 1 كم كارىز جۇيەسى مەن 7,2 كم ەلەكتر جەلىلەرى سالىنعان, بيىل 0,7 كم گاز جەلىسىن تارتۋ جۇمىستارى جۇرگىزىلەدى. ءبىز ءوندىرىس سالاسىنا ەرەكشە ءمان بەرىپ وتىرمىز», دەيدى قالا اكىمى ەرنات ءبازىل.
بۇگىندە قالا يندۋستريالىق ايماعىنىڭ اۋماعىندا ورنالاسقان 8 نەگىزگى كاسىپورىن بار. اتاپ ايتساق, «Best يزولياتسيا» جشس, «Bars Technologies» جشس, «تالدىقورعان جولدارى» جشس, «امانات-قازىنا» جشس, «گازسپەتسنابيۋگ» جشس, «كاراماي» جشس, «Halyk Astyg Expo» جشس, «جەتىسۋ-ماي» جشس, «جەتىسۋ ماجيكو» اگروكەشەنى» جشس. ولاردىڭ ءبارى بۇگىندە مىڭداعان ادامعا جۇمىس ۇسىنىپ, ءوڭىر ەكونوميكاسىنىڭ دامۋىنا جول اشىپ وتىر.
كاسىپكەرلەردىڭ كوڭىلى توق
قالانىڭ شاعىن جانە ورتا بيزنەسىندە 17 مىڭنان اسا كاسىپكەرلىك سۋبەكتىسى جۇمىس ىستەيدى. ولار وتكەن جىلى بيۋدجەتكە 20,4 ملرد تەڭگە كولەمىندە ءتۇسىم تۇسىرگەن. ودان قالدى 263,7 ملرد تەڭگەنىڭ ءونىمى وڭدىرىلگەن. بۇگىندە اتالعان سالا 37 مىڭعا جۋىق ادامدى جۇمىسپەن قامتىپ وتىر.
كاسىپكەرلەرگە اقپاراتتىق-كونسۋلتاتسيالىق كومەك كورسەتۋ ءۇشىن پالاتا جانىندا كاسىپكەرلەرگە قىزمەت كورسەتۋ ورتالىعى بەلسەندى جۇمىس ىستەيدى. ول جەردەن 1 364 ادام كەڭەس الىپ, 1 391 قىزمەت كورسەتىلگەن.
«كاسىپكەرلىكتى دامىتۋ جونىندەگى ۇلتتىق جوبا شەڭبەرىندە بىلتىر 3,6 ملرد تەڭگەگە 182 جوبا قامتىلدى. ونىڭ ىشىندە 2,5 ملرد تەڭگەگە 96 جوبا بويىنشا بانك نەسيەلەرىنىڭ پايىزدىق مولشەرلەمەسى سۋبسيديالانسا, 804,7 ملن تەڭگەگە 75 جوباعا كەپىلدىك بەرىلدى. جاڭا بيزنەس-يدەيالاردى ىسكە اسىرۋ ءۇشىن 5 ملن تەڭگەگە دەيىن قايتارىمسىز مەملەكەتتىك گرانت بەرۋ بويىنشا جالپى سوماسى 45 ملن تەڭگەگە 9 جوبا ماقۇلداندى. ودان بولەك, 226,5 ملن تەڭگەگە 2 جوبا بويىنشا ينفراقۇرىلىم جۇرگىزىلدى», دەيدى ە.ءبازىل.
سونىمەن قاتار قالا تۇرعىندارىن قولجەتىمدى باعامەن تاۋار قامتاماسىز ەتۋ ماقساتىندا ەركىن اۋلىندا, كوكتال تۇرعىن اۋدانىندا ەكى الەۋمەتتىك دۇكەن اشىلعان. بۇل دۇكەندەردە الەۋمەتتىك-ماڭىزدى تاۋارلارىنىڭ 18 اتاۋى ساتىلادى. ايتا كەتەيىك, وبلىستا بيزنەس ءۇشىن ەلەكتر ەنەرگياسىنا تاريفتەر تومەندەتىلگەن ەدى. «جەتىسۋ ەنەرگوترەيد» جشس تابيعي مونوپوليالاردى رەتتەۋ كوميتەتىنىڭ ءوڭىر بويىنشا دەپارتامەنتىنە زاڭدى تۇلعالار ءۇشىن ەلەكتر ەنەرگياسىنا ءتاريفتى 1 كۆت/ساعاتىنا 38,50 تەڭگەدەن 32,60 تەڭگەگە ازايتۋعا حابارلاما بەردى. بۇل باستاما 1 ماۋسىمنان باستاپ قولدانىسقا ەنگىزىلدى.
باسپانا جايى باستى نازاردا
تۇرعىن ۇيگە كەزەكتە تۇرعاندار سانى 15 مىڭنان اسادى. مۇندا حالىقتىڭ الەۋمەتتىك وسال توپتارى, مەملەكەتتىك قىزمەتشىلەر, بيۋدجەتتىك ۇيىمداردىڭ قىزمەتكەرلەرى, كوپبالالى وتباسىلار جانە جەتىم بالالار بار. بىلتىر 149,4 مىڭ شارشى مەتر تۇرعىن ءۇي پايدالانۋعا بەرىلگەن. بيۋدجەت قاراجاتى ەسەبىنەن وڭتۇستىك-باتىس اۋدانىندا 817 پاتەرلى 20 نەسيەلىك تۇرعىن ءۇي حالىققا تاپسىرىلدى. جەكە قۇرىلىس سالۋشى كومپانيالار قاراجاتى ەسەبىنەن 478 پاتەرلى 11 ءۇي, ونىڭ ىشىندە دەمەۋشى كومپانيالار ەسەبىنەن 180 پاتەرلى 3 ءۇي يەسىن تاپتى.
«اۋدانى 2,6 مىڭ شارشى مەتر مۋزىكالىق كوللەدج ءۇشىن 100 ورىندى جاتاقحانا پايدالانۋعا بەرىلدى. حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ ماقساتىندا 63 تۇرعىن ءۇي ساتىپ الىندى. «جەتىسۋ جاستارى» باعدارلاماسى اياسىندا «وتباسى بانك» اق ارقىلى 31 پاتەر جانە اپاتتىق ءۇي تۇرعىندارىنا 32 پاتەر بەرىلدى. سونىمەن قاتار كەزەكتە تۇرعان 36 كوپبالالى وتباسىنا كوتتەدج قالاشىعىندا پاتەر كىلتىن تابىستادىق. وتكەن جىلى 1 747 وتباسى باسپانا الدى», دەيدى قالالىق تۇرعىن ءۇي قاتىناستارى ءبولىمىنىڭ باسشىسى ايدوس جاقىپبەك.
بۇگىندە بيۋدجەت قاراجاتى ەسەبىنەن 693 پاتەرگە ارنالعان 21 ءۇيدىڭ قۇرىلىسى جۇرگىزىلىپ جاتىر. سونداي-اق جەكە قۇرىلىس سالۋشىلاردىڭ قاراجاتى ەسەبىنەن 226 پاتەرلى 4 ءۇيدىڭ قۇرىلىسى باستالعان.
كوگىلدىر وتىن كوپ كۇتتىرگەن جوق
قالاعا قاراستى اۋىل-اۋماقتارىن دامىتىپ, مارتەبەسىن كوتەرۋ دە نازاردان تىس قالمادى. اسىرەسە گازبەن تولىقتاي قامتۋ جۇمىستارى جۇيەلى ءجۇرىپ جاتىر. ماسەلەن, بىلتىر ءۇيتاس ساياجاي قوعامى جانە جاستار-2 تۇرعىن ءۇي اۋدانى تابيعي گازعا قوسىلدى. ىنتىماق اۋلىندا 113,5 كم گاز جەلىسى تارتىلدى. بيىل مويناق اۋلىندا 23,9 كم گاز جەلىلەرىن سالۋ جۇمىستارى باستالادى. قازىرگە دەيىن 32 593 ابونەنت كوگىلدىر وتىنعا قولجەتكىزگەن. ياكي, قالا ماڭايىنداعى ەلدى مەكەندەردىڭ 90 پايىزى گاز جەلىسىمەن قامتاماسىز ەتىلگەن.
«وتەناي اۋىلدىق وكرۋگىندە وتەناي, ەڭبەك, ىنتىماق ەلدى مەكەندەرىندە 16 كوشەنى جارىقتاندىردىق. ەڭبەك اۋلى گاگارين كوشەسىندەگى ساياباقتى ورناتۋ جۇمىستارى اياقتالدى. بيىل وتەنايدا جانسۇگىروۆ كوشەسىندەگى 1,7 كم اللەيالاردى اباتتاندىرۋ جۇمىستارى جالعاسادى. وتەناي اۋلىندا كوپتەن كۇتكەن دارىگەرلىك امبۋلاتوريا سالىنادى. ەركىن اۋلىندا بالالارعا ارنالعان فۋتبول الاڭى ورناتىلىپ, كوگالداندىرۋ جۇمىستارى جۇرەدى. 150 ورىندى مادەنيەت ءۇيىن سالۋ ءۇشىن جوبالىق-سمەتالىق قۇجاتتاما ازىرلەندى», دەيدى قالا اكىمى ە.ءبازىل.
تازا قالا
جاقىندا «جاڭا سانا» جشس كومپانياسى تۇرمىستىق قاتتى قالدىقتاردى تاسىمالداۋعا ارنالعان 8 جاڭا تەحنيكانى تانىستىردى. ولار كۇزگە دەيىن تاعى 3 تەحنيكا الۋدى جوسپارلاپ وتىر. وسىعان دەيىن قالا اۋماعىنداعى تۇرمىستىق قاتتى قالدىقتاردى بىرنەشە كومپانيا شىعارىپ كەلسە, ەندى «جاڭا سانا» جشس تولىق قامتيدى. مەكەمەنىڭ تاعى ءبىر ەرەكشەلىگى – الەۋمەتتىك وسال توپتاعى ازاماتتارعا, كوپبالالى وتباسىلارعا اتاۋلى الەۋمەتتىك كومەك الاتىندارعا دا جەڭىلدىك قاراستىرعان.
«قالادا 853 كوپقاباتتى جانە 24,5 مىڭ تۇرعىن ءۇي بار. ءبىز سولاردىڭ بارىنە قىزمەت كورسەتەمىز. بۇل ىسكە 300 ملن تەڭگە ينۆەستيتسيا قۇيدىق. جىل باسىندا قالا اكىمدىگىمەن 5 جىلعا كەلىسىمشارتقا وتىردىق. قازىر جۇمىسقا تولىق دايىنبىز. سونداي-اق 40-تان اسا قالا تۇرعىنىن تۇراقتى جۇمىسپەن قامتىپ وتىرمىز», دەيدى «جاڭا سانا» جشس EcoAla فيليالىنىڭ ديرەكتورى باۋىرجان قاسىمقان.
سىرتتان كەلگەن قوناقتار قالانىڭ دامۋ باعىتىنا جوعارى باعا بەرىپ ءجۇر. اگرارلى ءوڭىر بولاشاقتا ءتۋريزمنىڭ ءبىر تۇتقاسىنا اينالماق. ال وبلىس ورتالىعى سانالعان اسەم تالدىقورعان – رەسپۋبليكا كولەمىندە جىل سايىن تازا قالا مارتەبەسىنە يە بولىپ كەلە جاتقان بىردەن-ءبىر شاھار.
جەتىسۋ وبلىسى
