وتكەن جىلعى رەسپۋبليكالىق بيۋدجەتتى اتقارۋ قورىتىندىسى بويىنشا تۇسىمدەر 99,9%-عا ورىندالىپ, 19 ترلن تەڭگەگە, ال شىعىستار 99,6%-عا نەمەسە 22,4 ترلن تەڭگەگە اتقارىلعانى تۋرالى سەناتورلارعا حاباردار ەتىلدى. بيۋدجەتتىڭ يگەرىلمەۋىنە مەملەكەتتىك ساتىپ الۋدىڭ ساپاسىز جوسپارلانۋى, مەردىگەرلەر مىندەتتەمەسءىنءىڭ تيىسىنشە ورىندالماۋى جانە ساتىپ الۋ ناتيجەسىنە شاعىمدانۋى اسەر ەتءىپ وتىر. جاعدايدى جاقسارتۋ ءۇشىن تاپسىرىس بەرۋشى مەكەمەدەگى ءبىرىنشى باسشىعا ءبىر جەردەن ساتىپ الۋعا دەربەس جاۋاپكەرشىلىك ەنگىزىلدى. قابىلدانعان شارالاردىڭ ناتيجەسىندە 2023 جىلدىڭ قورىتىندىسى بويىنشا تىكەلەي شارت جاساسۋ جولىمەن ءبىر كوزدەن مەملەكەتتىك ساتىپ الۋ كولەمى 24%-عا دەيىن تومەندەتىلدى.
جوعارى اۋديتورلىق پالاتانىڭ وكىلى ءوز كەزەگىندە ورتالىقتان بەرىلەتىن سۋبۆەنتسيا وڭىرلەردىڭ الەۋمەتتىك-ەكونوميكالىق پروبلەمالارىن شەشۋدىڭ نەگىزگى كوزى بولىپ قالا بەرەتىنىن اتاپ ءوتتى. 2023 جىلى سۋبۆەنتسيا كولەمى 2022 جىلعى دەڭگەيدەن ەكى ەسەدەن استام اسىپ ءتۇستى. وڭىرلەرگە رەسپۋبليكالىق بيۋدجەتتەن بولىنەتىن ترانسفەرتتەردىڭ جالپى كولەمى 2022 جىلمەن سالىستىرعاندا 7%-عا ۇلعايىپ, ءوسءىپ كەلەدى. وڭىرلەردە 4,2 ترلن تەڭگە نەمەسە بولىنگەن كولەمنىڭ 92%-ى يگەرىلدى.
سەناتورلار قازاقستان رەسپۋبليكاسىنىڭ ۇكىمەتى مەن جوعارى اۋديتورلىق پالاتانىڭ 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قاراۋ قورىتىندىسى بويىنشا ەسەپتى پالاتانىڭ قاراۋىنا ەنگىزۋ تۋرالى شەشىم قابىلدادى.
