مەملەكەتتىك رامىزدەر كۇنىنە وراي وڭىردەگى ەڭ شالعاي جاتقان بوكەي ورداسى اۋدانىنىڭ ورتالىعى سايقىن اۋىلىندا «مەنىڭ تۋىم – مەنىڭ ماقتانىشىم» اۆتو-ۆەلو شەرۋى ۇيىمداستىرىلدى.
شەرۋگە قاتىسقان اۋدان تۇرعىندارى ورتالىق كوشەلەردە كوك تۋدى كوككە جەلبىرەتىپ, كوپشىلىكتى بىرلىككە, ىنتىماققا شاقىردى. اكتسياعا 20-دان استام كولىك پەن ۆەلوسيپەدشىلەر توبى قاتىستى.
ال ورال قالاسىندا مەملەكەتتىك مەكەمەلەردە, ساۋدا ۇيلەرىندە «مەنىڭ تۋىم – مەنىڭ ماقتانىشىم!» چەللەندجى ۇيىمداستىرىلىپ, قالا تۇرعىندارىنا جالاۋشالار تاراتىلدى.
قاراتوبە اۋدانىنداعى ورتالىق ساياباقتا رامىزدەر كۇنىنە وراي «مەملەكەتتىك رامىزدەر – ۇلتتىق ماقتانىشىم» اتتى سالتاناتتى شارا وتكىزىلدى.
الاڭعا جينالعان مەكەمە قىزمەتكەرلەرى, اۋىل تۇرعىندارى, بەلسەندى جاستار الدىندا تۋتۇعىرداعى مەملەكەتتىك تۋ جوعارى كوتەرىلىپ, جاندى داۋىستا مەملەكەتتىك گيمن ورىندالدى.
«مەملەكەتتىك رامىزدەر ۇلتتىق بىرەگەيلىكتىڭ قالىپتاسۋ تىرەگى جانە ءاربىر مەملەكەتتىڭ دامۋىنىڭ اجىراماس ءبىر بولىگى. ەلىمىزدىڭ دەربەستىگى مەن تاۋەلسىزدىگىن الەمگە جاريا ەتۋشى ءارى مەملەكەتىمىزدىڭ بۇگىنى مەن بولاشاعى اراسىنداعى ساباقتاستىقتى جالعايتىن جارقىن بەينە ول – مەملەكەتتىك رامىزدەر. ۇلتتىڭ باستى قۇندىلىعى ۇلتتىق نىشاندارمەن تىعىز بايلانىستى. اتاپ وتەر بولساق, ءانۇران, ەلتاڭبا, تۋ بۇل بارلىعى مەملەكەتتىك رامىزدەردى ايقىنداۋشى كۇش. بارشاڭىزدى رامىزدەر كۇنى مەرەكەسىمەن شىن جۇرەكتەن قۇتتىقتايمىن!», دەدى قاراتوبە اۋدانىنىڭ اكىمى قادىرجان ورىنباسار ۇلى جينالعاندار الدىندا.
سالتاناتتى جيىندا كوكتەمگى سۋ تاسقىنى كەزىندە قۇتقارۋ جۇمىسىنا بەلسەندى اتسالىسقان بىرقاتار جاستارعا العىس حات تابىستالدى.
ءدال وسى كۇنى ءبورلى اۋداندىق مادەنيەت ۇيىندە دە «رامىزدەرگە قۇرمەت - ەلگە قۇرمەت» اتتى سالتاناتتى جيىن ءوتتى. ءبورلى اۋدانىنىڭ اكىمى ەركەبۇلان يحسانوۆ بورلىلىكتەردى مەرەيلى مەرەكەمەن قۇتتىقتاپ, ەل ىسىندە ەڭبەگى سىڭگەن بىرقاتار ازاماتقا قۇرمەت كورسەتتى. ماراپاتتالعان ازاماتتار قاتارىندا كاسىپكەرلەر, ءبىلىم مەكەمەلەرىنىڭ باسشىلارى, قۇقىق قورعاۋ سالاسىنىڭ ماماندارى, قوعامدىق بىرلەستىك وكىلدەرى جانە جاستار بولدى. بارشاسىنا قيىن كەزەڭدە ەلدىڭ قىزمەتىندە تارتىنىپ قالماي, ۋاقىتپەن ساناسپاي ەڭبەك جاساعانى ءۇشىن اۋدان اكىمىنىڭ العىس حاتى بەرىلدى.
ەڭ ۇلكەن شارالار ارينە, ورال قالاسىندا ءوتتى. وبلىس ورتالىعىنداعى ەڭ ۇلكەن الاڭدا مەملەكەتتىك تۋ جوعارى كوتەرىلىپ, سالتاناتتى جيىن ۇستىندە جاس سارباز ۇلاندارى قازاقستان رەسپۋبليكاسىنىڭ مەملەكەتتىك رامىزدەر كۇنىمەن قۇتتىقتادى. بارلىق ءبىلىم بەرۋ ۇيىمدارىندا مەرەكەگە ارنالعان شارالار ۇيىمداستىرىلعان.
