فوتو: وبلىس اكىمدىگى
اتىراۋ ءوڭىرىن تاسقىننان قورعاۋ ءۇشىن قورعانىس مينيسترلىگىنىڭ №30212, №5571, №6655, №82796 اسكەري بولىمدەرىنىڭ, ماڭعىستاۋ, اقتوبە, تۇركىستان, الماتى, قىزىلوردا وبلىسىنان, شىمكەنت قالاسىنىڭ توتەنشە جاعدايلار دەپارتامەنتىنىڭ, توتەنشە جاعدايلار مينيسترلىگى №52859 اسكەري ءبولىمىنىڭ جانە ۇلتتىق ۇلان قىزمەتكەرلەرى ەكى اي تاسقىننىڭ الدىن الۋ شارالارىنا كومەكتەستى.
جيىنعا جينالعاندار جىلىوي اۋدانى قۇلسارى قالاسىندا قىزمەتتىك مىندەتىن اتقارۋ كەزىندە قازا تاپقان اتىراۋ وبلىسى تجد ء«ورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ» №1 مامانداندىرىلعان ءورت ءسوندىرۋ ءبولىمىنىڭ بولىمشە كومانديرى, ازاماتتىق قورعاۋ سەرجانتى راحىم بەيبارىس جالعاسباي ۇلىن مينۋتتىق ۇنسىزدىكپەن ەسكە الدى.
وبلىس باسشىسى كومەككە كەلگەندەرگە العىس ءبىلدىردى.
«سىزدەر حالىقپەن بىرگە جايىقتىڭ بويىندا جۇدىرىق بوپ جۇمىلىپ, جانكەشتىلىكپەن ەڭبەك ەتتىڭىزدەر.
جىلىوي جۇرتىنا جاردەم بەرىپ, ميالى اۋىلىن امان الىپ قالۋعا جانە كۇنى-ءتۇنى زالالدىڭ زاردابىن جويۋ ءۇشىن تەر توكتىڭىزدەر.
بۇل كۇندەرى ءبىز اتا-بابالارىمىزدان جالعاسقان قۇندىلىعىمىز – بىرلىك پەن ىنتىماقتىڭ ناعىز ۇلگىسىن كوردىك.
سونىمەن رۋحتاندىق, جىگەرلەندىك. بىرلىگىمىزدىڭ جاڭا قازاقستاننىڭ دىڭگەگى بوپ قالا بەرەرىنە كوز جەتكىزدىك. سىزدەرگە اتىراۋ جۇرتشىلىعىنىڭ شەكسىز ريزاشىلىعىن جەتكىزىپ العىس ايتامىن», دەدى س.شاپكەنوۆ.
اساۋ تولقىندى اۋىزدىقتاۋ جۇمىستارىنا بەلسەنە قاتىسقان بىرقاتار قىزمەتكەرگە توتەنشە جاعداي ءمينيسترىنىڭ, وبلىس اكىمىنىڭ العىس حاتى جانە وبلىستىق ارداگەرلەر كەڭەسىنىڭ مەدالى تابىستالدى.
