فوتولار: اقوردا
پرەزيدەنتكە ورتالىقتىڭ زاماناۋي مەديتسينالىق اپپاراتتارمەن جابدىقتالعان دياگنوستيكا كابينەتتەرى, نارەستەلەرگە ارنالعان قارقىندى تەراپيا بولىمشەسى جانە وپەراتسيا بولمەلەرى تانىستىرىلدى.
الماتى قالاسى اكىمىنىڭ ورىنباسارى اسەم ءنۇسىپوۆانىڭ ايتۋىنشا, 1965 جىلى نەگىزى قالانعان قالالىق بالالار اۋرۋحاناسى س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى پەدياتريا كافەدراسىنىڭ كلينيكالىق بازاسى سانالادى.
اۋرۋحانادا تەك الماتى قالاسىنىڭ عانا ەمەس, بۇكىل قازاقستاننىڭ بالالارى جوسپارلى ەم-دوم الادى. رەسپۋبليكا بويىنشا تەك وسى كلينيكادا جاڭا تۋعان نارەستەلەردە كەزدەسەتىن اسقازان ارترەزياسى, كوكەت جارىعى (ديافراگمالنايا گرىجا), راحيشيزيس, گاستروشيزيس سەكىلدى ءتۋابىتتى دەرتتەردى حيرۋرگيالىق جولمەن ەمدەۋ تاسىلدەرى جولعا قويىلعان.
سوڭعى ءۇش جىلدا بۇل اۋرۋحانادا ەمدەلۋشىلەر سانى 30 پايىزعا ارتقان. سول سەبەپتى قازىر بالالار شۇعىل مەديتسينالىق جاردەم ورتالىعىنىڭ نەگىزگى عيماراتىن جاڭارتۋ جانە رەكونسترۋكتسيالاۋ جوسپارى ازىرلەنىپ جاتىر. سوعان سايكەس ەسكى كورپۋستاردىڭ ءبارى كۇردەلى جوندەۋدەن وتكىزىلىپ, قوسىمشا وڭالتۋ, وتولارينگولوگيا, ايماقتىق وفتولمولوگيا ورتالىقتارى جانە جاق-باس سۇيەك حيرۋرگياسى بولىمشەلەرى اشىلماق. ناتيجەسىندە ستاتسيونارداعى توسەك-ورىن سانى 350-دەن 470-كە دەيىن ارتادى. سونداي-اق كورسەتىلەتىن مەديتسينالىق قىزمەتتەردىڭ ءتۇرى كوبەيىپ, حالىقارالىق ستاندارتتار دەڭگەيىندەگى ساپانى قامتاماسىز ەتۋ مۇمكىندىگى پايدا بولادى.
مەملەكەت باسشىسى قاسىم-جومارت توقاەۆ مەديتسينالىق مەكەمەنىڭ قىزمەتىنە تابىس تىلەپ, 2 رەانيموبيل مەن ينتەراكتيۆتى تاقتانى سىيعا تارتتى.
