جۇرتتىڭ دەلەبەسىن قوزدىرعان ءدۇبىرلى دودادا قوستاناي, اقمولا, قاراعاندى وبلىستارى مەن رەسەيدىڭ ىرگەلەس جاتقان وڭىرلەرىنەن كەلگەن 80-گە جۋىق سايگ ۇلىك بايگەگە ءتۇستى. رەسپۋبليكالىق «بايگە» فەدەراتسياسى مەن قوستانايداعى ۇلتتىق ات سپورتى فەدەراتسياسى ۇيىمداستىرعان ايتۋلى سپورت ءىس-شاراسىندا قازاقتىڭ ەجەلدەن كەلە جاتقان قىز قۋ, تەڭگە ءىلۋ, اۋدارىسپاق, كوكپار ويىندارى مەن الامان, قۇنان جارىستارى ۇيىمداستىرىلدى. بايگەنىڭ جالپى جۇلدە قورى – 19 ملن تەڭگە. جارىس ناتيجەسىندە بەس بىردەي جۇلدەلى ورىنعا اقشالاي سىيلىق تابىس ەتىلدى.
ات سپورتى مەرەكەسىنىڭ اشىلۋ سالتاناتى مەملەكەتتىك انۇرانمەن باستالدى. ودان كەيىن ات سپورتىن دامىتۋعا اتسالىسىپ جۇرگەن ازاماتتار مىنبەرگە كوتەرىلىپ, اتالعان ءىس-شارانىڭ باستى ماقساتى قوستاناي جىلقىسىن ناسيحاتتاۋ ەكەنىن, بۇگىندە وسى تۇقىمدى كوبەيتۋ جولدارى قاراستىرىلىپ, وعان مەملەكەت تاراپىنان ۇلكەن قولداۋ كورسەتىلىپ, قوماقتى قارجى ءبولىنىپ وتىرعانىن ايتتى.
«بيىل – ءۇشىنشى جىل. وسى قوستاناي جىلقىسىن دامىتۋعا مەملەكەت تاراپىنان قارجى ءبولىنىپ, قولداۋ كورسەتىلىپ جاتىر. بيىل بايقاساڭىزدار, بايگە اتىنىڭ سانى دا كوپ, ساپاسى دا جاقسارعان. جازعى ماۋسىمعا قىس بويى دايىندىق جۇرگىزىلدى. قوستاناي جىلقىلارىنان بولەك تازا قاندى اعىلشىن جىلقىلارىن ۇستاپ وتىرعان ازاماتتار بار. ماۋسىماشار بولعان سوڭ, مۇنداي اۋقىمدى ءىس-شارادان شەت قالماسىن دەگەن نيەتپەن ءوزىمىز قارجى شىعارىپ, ولاردى دا بايگەگە قوسىپ وتىرمىز. ولار دا 1000, 1 800, 12 000 مەترگە شابادى. بيىل جىل سوڭىنا دەيىن 5 بايگە وتەدى. سونىڭ بارىنە 96 ملن تەڭگە قارجى بولىنگەن. قوستاناي جىلقىسىنىڭ بۇلايشا حالىقارالىق دەڭگەيگە كوتەرىلۋى عالىمدارىمىزدىڭ ءجۇز جىل بويى جۇرگىزگەن تاباندى ىزدەنىسى مەن ەڭبەگىنىڭ ناتيجەسى دەپ ايتۋعا بولادى. قوستاناي تۇقىمىنىڭ سانى 1965 جىلى 45 مىڭعا دەيىن جەتكەن. وكىنىشكە قاراي, قازىر سودان 278 تازا قاندى جىلقى عانا قالىپ وتىر. سوندىقتان ۇكىمەتتىڭ قولداۋىمەن, سەنات دەپۋتاتتارىنىڭ ۇيىتقى بولۋىمەن قوستاناي جىلقىسىن دامىتۋ تۋرالى زاڭ جوباسى ازىرلەنىپ, ءماجىلىس تالقىسىنا ۇسىنىلعان ەدى. اتالعان زاڭ جوباسىن 22 مامىردا ءماجىلىس ءبىرىنشى وقىلىمدا ماقۇلداپ, سەناتقا جىبەردى. رەسپۋبليكالىق كوميسسيانىڭ شەشىمىمەن قوستاناي جىلقىسىن ءوسىرىپ وتىرعان شارۋاشىلىقتاردى سۋبسيديالاۋعا 5 جىلعا 600 ملن تەڭگەگە جۋىق قاراجات ءبولىندى», دەدى ۇلتتىق سپورت قاۋىمداستىعى ۆيتسە-پرەزيدەنتى تاستانبەك ەسەنتاەۆ.
سونىمەن قاتار ول پرەزيدەنتتىڭ بىرقاتار ۇلتتىق سپورت ءتۇرىن وليمپيادالىق سپورت دەڭگەيىنە دەيىن كوتەرۋ تۋرالى تاپسىرما بەرگەنىن العا تارتتى.
«وسى ماقساتتا ەلىمىزدە V دۇنيەجۇزىلىك كوشپەلىلەر ويىنى وتەيىن دەپ وتىر. مىنە, وسىنىڭ ءبارى ءبىزدىڭ ۇلتتىق سپورتىمىزدىڭ ءارى قاراي دامۋىنا سەپتىگىن تيگىزەدى. قوستاناي جىلقىسىن ايتپاعاندا, قازىر جالپىۇلتتىق سپورتتى دامىتۋ جونىندەگى زاڭ جوباسىن ازىرلەۋ كەرەك دەگەن ۇسىنىس ايتىلىپ جاتىر. سوندىقتان بولاشاقتا ۇلتتىق سپورتتى دامىتۋدىڭ زاڭدىق نەگىزى جاسالادى. قوستاناي جىلقىسىنىڭ ىشىنەن كەلەشەكتە كوكپارعا, تەڭگە ءىلۋ, اۋدارىسپاق, جامبى اتۋ, ات بايگەسى سەكىلدى ات سپورتى تۇرلەرىنە ات دايىنداۋ كەرەك دەگەن ويدامىز. ءبىزدىڭ الدىمىزدا ءۇش ماقسات تۇر: ءبىرىنشىسى – ماماندار دايارلاۋ, ەكىنشىسى – ينفراقۇرىلىمدى دامىتۋ, ءۇشىنشىسى – سپورتتىق يندۋستريانى دامىتۋ. ءماجىلىس دەپۋتاتتارى ماقۇلداعان زاڭ جوباسى وسى مىندەتتەردىڭ شەشىم تابۋىنا سەپتىگىن تيگىزەدى. ەگەر وسى يندۋستريانى مىقتاپ قولعا الىپ, ءوزىمىزدىڭ قوستاناي جىلقىسىن دامىتار بولساق, كەلەشەكتە ات سپورتى تۇرلەرىنە باسقا جاقتان ات ىزدەمەيمىز, قوستاناي تۇلپارلارى كوپتەگەن حالىقارالىق جارىسقا قاتىسىپ, الەمدىك دەڭگەيدە تانىلۋعا مۇمكىندىك الادى», دەدى ت.ەسەنتاەۆ.
جەرگىلىكتى جانكۇيەرلەردىڭ قۋانىشىنا وراي, قىسقا قاشىقتىقتاعى 1 000 مەترلىك بايگەدە قوستاناي جىلقى زاۋىتىندا تۋعان تاكتيكا اتتى ۇشقىر سايگ ۇلىك ءبىرىنشى بولىپ كەلدى.
«بۇل – ەكى جاسار تاكتيكانىڭ العاشقى جەڭىسى. مىڭ مەترلىك قاشىقتىقتا باسەكە وتە جوعارى. جۇلدەلى ورىننان ۇمىتتەنگەنىم راس, بىراق تاكتيكا بۇلايشا توپ جارادى دەپ كۇتكەن جوقپىن. وسى ماۋسىمدا تاعى بىرنەشە رەت جەڭىسكە جەتەمىز دەگەن ءۇمىت وياندى», دەيدى شاباندوز ماريا كاريەۆا.
2 000 مەترلىك جارىستا اقمولا وبلىسىنان كەلگەن بايقۇرمان سابىرجان مىنگەن باربارا مارەنى ءبىرىنشى بولىپ كەسىپ ءوتتى.
«شامامەن 700 مەترگە دەيىن تىزگىندى تارتىڭقىراپ وتىردىم. ودان كەيىن بىرتىندەپ قارقىندى ۇدەتە ءتۇستىم, سوڭعى اينالىمدا باربارا بارىن سالدى. ابىروي بولعاندا, مارەگە ءبىرىنشى بولىپ كەلدىك. وسى سپورتقا 10 جاسىمدا اكەمنىڭ ايتۋىمەن كەلدىم. سودان بەرى اتتان تۇسكەن جوقپىن», دەيدى 18 جاستاعى شاباندوز.
5 مىڭ مەترلىك قۇنان بايگەدە قوستانايدىڭ سارما اتتى سايگ ۇلىگى ءبىرىنشى بولىپ كەلدى. بايگەنىڭ بۇل تۇرىنە تۋريزم جانە سپورت مينيسترلىگىنىڭ جۇلدەسى بەرىلدى. سارمانىڭ شاباندوزى – تەمىرلان زاستەجكو, باپكەرى – ۆيتالي پۋگاچەۆ, ات يەسى – دانيار ەلەمەسوۆ.
21 مىڭ مەترلىك الامان بايگەگە شاپقان 16 اتتىڭ 12-ءسى عانا مارەدەن كورىندى. قاراعاندى وبلىسىنىڭ تايفۋن اتتى تۇلپارى بۇل جولعى الاماندا دا الدىنا قارا سالدىرمادى. تايفۋن وسىمەن قاتارىنان 11-رەت جەڭىمپاز اتانىپ وتىر. 13 جاستاعى شاباندوز جانبولات ءمىناسىپتىڭ جاتتىقتىرۋشىسى ەربولات جازعىبەكوۆتىڭ ايتۋىنشا, تايفۋن – تىنىسى شاپقان سايىن اشىلا تۇسەتىن ناعىز الاماننىڭ الدىن بەرمەس قاس تۇلپاردىڭ ءوزى.
«مارەگە جاقىنداعان سايىن شابىسىن ۇدەتە تۇسەدى. تەك شەشۋشى ساتكە دەيىن تىزگىندى بوساتپاي ۇستاي ءبىلۋ كەرەك. شامامەن سوڭعى 500 مەتر قالعاندا ەركىنە جىبەرەمىز, جانۋار جەبە بولىپ زۋلاي جونەلەدى. بارىنە ريزامىز. ماۋسىماشار بايگە جوعارعى دەڭگەيدە ۇيىمداستىرىلعان. ءبىزدىڭ ەندىگى ماقساتىمىز – الماتىدا وتەتىن دۇنيەجۇزىلىك كوشپەلىلەر ويىندارىنا قاتىسۋ», دەيدى اتبەگى.
بايگە قورىتىندىسى بويىنشا جالپى ەسەپتە اقمولا وبلىسى كوش باستاپ تۇر. ات جارىسىنىڭ حاتشىسى ايگۇل اماندىقوۆانىڭ ايتۋىنشا, قوستاناي وبلىسىنىڭ ارعىماقتارى دا جوعارى ناتيجە كورسەتىپ وتىر.
«قازاق تۇلپارى» جىلقى زاۋىتىنىڭ جۇيرىكتەرى ءارتۇرلى قاشىقتىقتا ءبىرىنشى جانە ءۇشىنشى ورىن الدى. بۇل – كەيىنگى ءۇش جىل ىشىندە جۇرگىزىلگەن سەلەكتسيالىق جۇمىستاردىڭ جەتىستىگى. بىرنەشە شاباندوزىمىزدى الماتىداعى شاباندوزدار كلۋبىنا وقۋعا جىبەرۋدى جوسپارلاپ وتىرمىز», دەدى ا.اماندىقوۆا.
مامانداردىڭ ايتۋىنشا, قوستاناي جىلقىسى ۇشقىرلىعىمەن قوسا الىسقا ەنتىكپەي شابا الاتىن توزىمدىلىگىمەن ەرەكشەلەنەدى. سونىمەن قاتار كونكۋرعا دا ەپتى, ياعني بيىكتىككە دە سەكىرەدى. سوندىقتان كەلەشەكتە وسى قاسيەتىن ەسكەرە وتىرىپ دامىتار بولساق, وليمپيا ويىندارىنا دا قاتىسادى.
قوستاناي وبلىسى
