فوتو: gov.kz
زاڭ جوباسى مەملەكەت باسشىسىنىڭ تۇركىستان وبلىسىنا جۇمىس ساپارى بارىسىندا بەرگەن تاپسىرمالارىن ىسكە اسىرۋ ماقساتىندا ازىرلەنگەن.
قۇجات تۇركىستان قازاقستاننىڭ رۋحاني-مادەني جانە تاريحي ورتالىعى رەتىندە قالىپتاسۋى مەن دامۋى, سونداي-اق ونىڭ مەملەكەتتىك ماڭىزىن تانۋدىڭ قۇقىقتىق نەگىزدەرىن بەلگىلەيدى.
زاڭ قابىلدانۋى قالانىڭ تاريحي-مادەني ماڭىزى بار ەسكەرتكىشتەرى مەن وبەكتىلەرىن, ونىڭ ىشىندە, قوجا احمەت ياساۋي كەسەنەسىنىڭ بۇكىلالەمدىك مۇرا وبەكتىسى رەتىندەگى قورعاۋ اۋماعىندا ورنالاسقان ەسكەرتكىشتەردى باسقارۋدىڭ, ساقتاۋدىڭ, ولاردىڭ تۇتاستىعىن قولداۋدىڭ وڭتايلى جۇيەسىن قۇرۋعا مۇمكىندىك بەرەدى. بۇدان بولەك, كەسەنە اۋماعىندا عىلىمي ارحەولوگيالىق زەرتتەۋلەر مەن عىلىمي-رەستاۆراتسيالاۋ جۇمىستارىن جوسپارلاۋ مەن باسقارۋعا مۇمكىندىك جاسايدى.
«سونداي-اق زاڭ جوباسى مادەني مۇرانى ساقتاۋ جانە جاڭعىرتۋ, ءداستۇرلى قولونەردى دامىتۋدى, تۇركىستان قالاسىن رۋحاني-مادەني, تاريحي جانە تۋريستىك ورتالىق رەتىندە دامىتۋ جانە ىلگەرىلەتۋدى كوزدەيدى.
قوجا احمەت ياساۋي كەسەنەسىنىڭ بىرەگەيلىگىن ساقتاۋ, ونىڭ اينالاسىندا بوتەن قۇرىلىس ەلەمەنتتەرىنە, كوشە جەلىلەرىن وزگەرتۋگە جول بەرمەۋ ماقساتىندا تاريحي ورتالىقتىڭ قۇرىلىسىن رەتتەۋ ايماعىندا بيىكتىگى 7 مەتردەن اساتىن, سونداي-اق تاريحي ەسكەرتكىشتەرمەن اۋقىمى, ءتۇسى جانە قۇرىلىس ماتەريالدارىمەن ۇيلەسپەيتىن وبەكتىلەردىڭ قۇرىلىسىنا جول بەرىلمەيدى», دەلىنگەن ۇكىمەت حابارلاماسىندا.
قۇجات شەڭبەرىندە تۇركىستان قالاسىنىڭ تاريحي-مادەني مۇرا وبەكتىلەرىن ساقتاۋ جانە قورعاۋ ءۇشىن ءاربىر وبەكتىگە تاريحي-مادەني مۇرا وبەكتىلەرىن قورعاۋ جانە پايدالانۋ سالاسىنداعى قورعاۋ ايماقتارى بەلگىلەنەدى. بۇدان بولەك, قالانىڭ باس جوسپارىنا ەنگىزىلەتىن تاريحي-ساۋلەت تىرەك جوسپارلارى مەن تاريحي-مادەني مۇرا وبەكتىلەرىنىڭ ءتيىستى جەرگىلىكتى جەردىڭ كارتا-سحەمالارى جاسالادى.
زاڭ قابىلدانعاندا قالا اۋماعىندا تاريحي-مادەني مۇرا وبەكتىلەرىنە قاۋىپ توندىرەتىن قۇرىلىس, شارۋاشىلىق قىزمەتتى جۇرگىزۋگە تىيىم سالىنادى.
ارحەولوگيا ەسكەرتكىشتەرىنىڭ تۇتاستىعىن, تۇپنۇسقالىعىن, قۇندىلىعىن بولاشاق ۇرپاق ءۇشىن ساقتاۋ ماقساتىندا تۇركىستان قالاسىنىڭ ارحەولوگيا ەسكەرتكىشتەرىنىڭ رەزەرۆاتى قۇرىلادى. ارحەولوگيا ەسكەرتكىشتەرىنىڭ رەزەرۆاتىنا ەنگىزىلگەن ەسكەرتكىشتەرگە قاتىستى قورعاۋ ساياساتى ارحەولوگيا ەسكەرتكىشىن تۇراقتى ينسپەكتسيالاۋ, ونى الدىن الا كۇتىم جاساۋ جانە ونى قولداۋ باعدارلامالارىن پايدالانۋعا نەگىزدەلەدى.
«زاڭ جوباسى تۇركىستان قالاسىنىڭ قازاقستان رەسپۋبليكاسىنىڭ رۋحاني-مادەني جانە تاريحي ورتالىعى رەتىندە دامۋىن قامتاماسىز ەتۋگە مۇمكىندىك بەرەتىن ءتيىمدى ينستيتۋتسيونالدىق ورتا قۇرۋ ءۇشىن ۋاكىلەتتى ورگانداردىڭ, سونداي-اق جەرگىلىكتى وكىلدى جانە اتقارۋشى ورگانداردىڭ قۇزىرەتتەرىن كەڭەيتۋگە باعىتتالعان.
زاڭ جوباسى شەڭبەرىندە جەر پايدالانۋ قۇقىعىن بەرۋ, تۋريستىك قىزمەتتى جۇزەگە اسىرۋ, تۇركىستان قالاسىنىڭ ارحەولوگيا ەسكەرتكىشتەرىنىڭ رەزەرۆاتىن قالىپتاستىرۋ جانە باسقا دا ماسەلەلەر بويىنشا قوسىمشا قۇزىرەتتەر بەرۋ ۇسىنىلادى», دەلىنگەن ۇكىمەت حابارلاماسىندا.
ەسكە سالا كەتەيىك, 2021 جىلى تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي ءسامميتىنىڭ قورىتىندىسى بويىنشا تۇركىستان قالاسىن تۇركى الەمىنىڭ رۋحاني استاناسى دەپ تانۋ تۋرالى شەشىم قابىلدانعان بولاتىن.
