فوتو: gov.kz
قۇجاتتارعا قول قويۋ راسىمىنە اتالعان سالا ءمينيسترى نۇرجان نۇرجىگىتوۆ, ءبىرىنشى ۆيتسە-مينيستر بولات بەكنياز جانە نيدەرلاند مەملەكەتىنىڭ قازاقستانداعى توتەنشە جانە وكىلەتتى ەلشىسى نيكولااس سحەرمەرس قاتىستى.
العاشقى قۇجات – سۋ رەسۋرستارى جانە يرريگاتسيا مينيسترلىگى مەن نيدەرلاند سىرتقى ىستەر مينيسترلىگى اراسىنداعى ءوزارا تۇسىنىستىك تۋرالى مەموراندۋم. قۇجات سۋ شارۋاشىلىعى قۇرىلىستارىن سالۋ جانە پايدالانۋ, سۋ تاسقىنىن بولجاۋ جانە قارسى ءىس-شارالاردى جوسپارلاۋ ماسەلەلەرىندە ىنتىماقتاستىقتى كوزدەيدى. كەلىسىم تاسقىن سۋىن رەتتەۋ مەن پايدالانۋدا تاجىريبە الماسۋ, سونداي-اق وزەن اعىندارىن باسقارۋ بولىگىندە نيدەرلاندىنىڭ تاجىريبەسىن زەرتتەۋدى كوزدەيدى.
دەلفت سۋ ءبىلىمى ينستيتۋتىمەن (IHE Delft) قول قويىلعان ەكىنشى مەموراندۋمدا سۋ سالاسى ماماندارىن دايارلاۋ, سۋ سالاسىندا عىلىم مەن يننوۆاتسيالىق تەحنولوگيالار سالاسىنداعى ءوزارا ءىس-قيمىل قاراستىرىلعان.
«بۇگىنگى كەزدەسۋ – نيدەرلاند مەملەكەتىمەن قارىم-قاتىناسىمىزدىڭ ماڭىزدى كەزەڭى. ىنتىماقتاستىعىمىز اۋقىمدى جانە پەرسپەكتيۆالى جوبالاردى ىسكە اسىرۋعا كومەكتەسەتىنىنە, ال تاجىريبە مەن تەحنولوگيا الماسۋ وتاندىق سۋ سالاسىنىڭ الەۋەتىن اشۋعا مۇمكىندىك بەرەتىنىنە سەنىمدىمىن», دەدى مينيستر نۇرجان نۇرجىگىتوۆ.
