فوتو: polisia.kz
ەلدە ءىرى ترانزيتتىك مارشرۋتتاردىڭ بولۋى جانە مەملەكەتتىڭ تۇراقتى دامۋى شەتەلدىك ينۆەستورلاردى عانا ەمەس, شەتەلدىك كريميناليتەت مۇشەلەرىن دە قىزىقتىرادى.
سوندىقتان قازاقستاننىڭ قۇزىرلى ورگاندارى قوعامدىق ومىرگە تەرىس ىقپال ەتەتىن شەتەلدىكتەردىڭ ەلگە كىرمەۋىن باقىلاۋدا ۇستايدى.
ناتيجەسىندە, وتكەن جىلى قازاقستان اۋماعىنا جاقىن شەت ەلدەردەن كىرمەك بولعان قىلمىستىق توپتىڭ ءتورت وكىلى شەكارادا توقتاتىلدى.
«بيىل 19 مامىردا باتىس قازاقستان وبلىسى پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسى جانە ۇقكد جەدەل مالىمەتتەر بويىنشا قىلمىستىق ورتادا «زاڭداعى ۇرى» اتاعىنا يە 1963 جىلى تۋعان ىرگەلەس مەملەكەت ازاماتىنىڭ ەل اۋماعىنا كىرۋ فاكتىسىن انىقتادى. قولدا بار مالىمەتتەرگە سايكەس رەسەيدىڭ سوت ورگاندارى وعان قاتىستى رەسەي فەدەراتسياسى قىلمىستىق كودەكسىنىڭ 210.1-بابى «قىلمىستىق يەرارحيادا جوعارى دارەجەنى يەلەنۋ» بويىنشا ءىس قاراۋىنا العان», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
كۇدىكتى ورال قالاسىنىڭ پوليتسياسىنا جەتكىزىلدى. قاجەتتى تەكسەرۋ ءىس-شارالارىن وتكىزگەننەن كەيىن ەر ادام قازاقستان اۋماعىنان رەسەيگە جىبەرىلىپ, كورشى مەملەكەتتىڭ قۇقىق قورعاۋ ورگاندارىنا بەرىلەدى.
