فوتو: ا.بايجۇمانوۆ
«عىلىم جانە تەحنولوگيالىق ساياسات تۋرالى» زاڭ جانە وعان ىلەسپە «قر-نىڭ كەيبىر زاڭنامالىق اكتىلەرىنە عىلىم جانە تەحنولوگيالىق ساياسات, پلاتفورمالىق جۇمىسپەن قامتۋ جانە مەملەكەتتىك باقىلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ عىلىمدى دامىتۋعا قولايلى جاعداي جاساۋدى جانە ەلىمىزدىڭ باسەكەگە قابىلەتتىلىگىن قامتاماسىز ەتۋدە عىلىمي جەتىستىكتەردىڭ ناتيجەسىن ەنگىزۋ ءۇشىن تەحنولوگيالىق ساياساتتى جۇزەگە اسىرۋدى, عىلىمدى دامىتۋداعى نەگىزگى باعىتتار مەن ۇستانىمداردى, عىلىمي جانە عىلىمي-تەحنيكالىق قىزمەت سۋبەكتىلەرىن مەملەكەتتىك قولداۋ تەتىكتەرىن ايقىنداۋدى كوزدەيدى. زاڭداردا ۇلتتىق عىلىم جۇيەسىن دامىتۋ تەتىكتەرى بار, عىلىمي قىزمەت سۋبەكتىلەرى, ولاردىڭ قۇقىقتارى بەلگىلەنگەن. ۇلتتىق عىلىم اكادەمياسىنىڭ قۇقىقتىق مارتەبەسى, عىلىم قورىنىڭ قىزمەتى جانە عىلىمي قىزمەتتى قارجىلاندىرۋ تەتىكتەرى دە بەكىتىلەدى.
پارلامەنتشىلەر «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قر-نىڭ كودەكسىن (سالىق كودەكسى) قولدانىسقا ەنگىزۋ تۋرالى» قر-نىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» قر-نىڭ زاڭىن دا قارادى. زاڭنىڭ مىندەتى عىلىمدى دامىتۋ ءۇشىن قولايلى جاعدايلار جاساۋ جانە كاسىپكەرلىك سۋبەكتىلەرىن عىلىمي جانە يننوۆاتسيالىق قىزمەتكە تارتۋ, عىلىمي-زەرتتەۋ, عىلىمي-تەحنيكالىق جانە تاجىريبەلىك-كونسترۋكتورلىق جۇمىستارعا جەكە ينۆەستيتسيا سالۋ ءۇشىن سالىقتىق جانە ينۆەستيتسيالىق پرەفەرەنتسيالار بەرۋ بولىپ تابىلادى.
سەناتورلاردىڭ ايتۋىنشا, زاڭداردى قابىلداۋ عىلىمنىڭ ەلىمىز ەكونوميكاسىنا قوساتىن ۇلەسىنە وڭ اسەر ەتەدى جانە عىلىمي الەۋەتتىڭ باسەكەگە قابىلەتتىلىگىن ارتتىرادى.
كوميتەت مۇشەلەرى تالقىلاۋ قورىتىندىسى بويىنشا زاڭداردى پالاتا وتىرىسىندا قاراۋعا جىبەرۋ تۋرالى شەشىم قابىلدادى.
