اتالعان ەلدى مەكەندە وتكەن جىلدان بەرى ات سپورتىنا ارنالعان جابىق ارەنا جۇمىس ىستەپ جاتىر. ەندى, مىنە, تاعى ءبىر جاڭا سپورت كەشەنى ەل يگىلىگىنە تاپسىرىلىپ وتىر. كەشەننىڭ اشىلۋ راسىمىنە قوستاناي اۋدانىنىڭ ايتۋلى سپورتشىلارى, سالا ارداگەرلەرى, جەرگىلىكتى سپورت مەكتەپتەرىنىڭ شاكىرتتەرى قاتىستى. سالتاناتتى ءىس-شاراعا ارنايى كەلگەن وبلىس اكىمى جاڭا سپورت نىسانىنىڭ تەك كاسىبي سپورتشىلار ءۇشىن عانا قىزمەت ەتىپ قويماي, وسى اۋدانداعى جالپى بۇقارالىق سپورتتىڭ دامۋىنا دا زور ىقپال ەتەتىنىن اتاپ ءوتتى.
«پرەزيدەنت قاسىم-جومارت توقاەۆ بۇقارالىق سپورتتى دامىتۋ, سالاماتتى ءومىر سالتىن قالىپتاستىرۋ جونىندە تاپسىرما بەرىپ, ارنايى باعدارلاما بەكىتىپ, سونىڭ اياسىندا قوماقتى قارجى بولىنگەن ەدى. مىنەكي, سونىڭ ناتيجەسىندە بىلتىر اۋليەكول, مەڭدىقارا, ناۋىرزىم اۋداندارىندا زاماناۋي سپورت ورتالىقتارى اشىلدى. بيىل دەنيسوۆ اۋدانىنىڭ ورتالىعىندا جاڭا كەشەن بوي كوتەردى. قازىر وبلىس بويىنشا تاعى وسىنداي 8 نىسان سالىپ جاتىرمىز. ونىڭ بىرەۋى – قوستاناي قالاسىندا, قالعانى شالعاي اۋىلداردا بوي كوتەرەدى. بۇل نىسانداردىڭ ءبارى جىل سوڭىنا دەيىن ەل يگىلىگىنە تاپسىرىلادى. بۇگىنگى وقيعانىڭ دا ورنى ەرەكشە. بالالار مەن جاستاردى سپورتقا تارتۋعا بۇل كەشەننىڭ زور پايدا تيگىزەرى ءسوزسىز», دەدى ق.اقساقالوۆ.
زاماناۋي سپورت كەشەنىنىڭ اۋدانى 1 700 شارشى مەتر بولادى. ىشىندە 23 ءبولىم جۇمىس ىستەپ تۇر. اتاپ ايتقاندا, فۋتبول, ۆولەيبول, باسكەتبول ويىندارىنىڭ زالى, كۇرەس زالدارى, توعىزقۇمالاق بولمەسى, كيىم اۋىستىرۋ, جۋىنۋ بولمەلەرى, مەديتسينا قىزمەتكەرلەرىنىڭ بولمەسى, وزگە دە سپورت تۇرلەرىنەن جاتتىعۋ ورىندارى قاراستىرىلعان.
جاڭا نىساننىڭ اشىلۋى اسىرەسە, جەرگىلىكتى جاستار ءۇشىن ۇلكەن وقيعا, ەرەكشە قۋانىش. ويتكەنى اۋىل تۇرعىندارىنىڭ دەنى سالاماتتى ءومىر سالتىن ۇستانادى. ماسەلەن, بۇل ەلدى مەكەندە 180 بالا قازاق كۇرەسىمەن اينالىسادى. زارەچنىيدا ۇلتتىق زياتكەرلىك سپورت ويىنى توعىزقۇمالاق شەبەرلەرى دە كوپ. سپورت كەشەنىندە وسى سپورت ءتۇرىن دامىتۋعا ارنالعان ارنايى ءبولىم جۇمىس ىستەيدى. بۇل بولىمدەگى 4 توپتا 7 جاس پەن 15 جاس ارالىعىنداعى 54 وقۋشى زياتكەرلىك ويىننىڭ قىر-سىرىن مەڭگەرىپ جاتىر. ولاردى توعىزقۇمالاقتان سپورت شەبەرى, ازيا چەمپيونى ايىم ەرمۇحانوۆا جاتتىقتىرىپ ءجۇر.
«شاكىرتتەرىم وبلىستىق جارىستاردا جوعارى ناتيجەلەرگە جەتىپ, جۇلدەلى ورىندارعا يە بولىپ ءجۇر. بىزگە جاڭا كەشەننەن ارنايى ورىن بەرگەنىنە وتە قۋانىشتىمىز. بۇعان دەيىن مەكتەپتىڭ جەرتولەسىندە جۇمىس ىستەپ كەلدىك. بالالاردىڭ ىنتاسى وتە زور. توعىزقۇمالاقتىڭ ءوزى – اتا-بابامىزدان جالعاسىپ كەلە جاتقان ءداستۇرلى ويىن. بالالاردىڭ لوگيكاسىن دامىتۋعا, وي قابىلەتىنىڭ كەڭەيۋىنە كوپ كومەكتەسەدى. اتا-انالار دا بالاسىنىڭ ساباق ۇلگەرىمى وسى ۇيىرمەگە قاتىسا باستاعان سوڭ ەداۋىر جاقسارعانىن ايتىپ, العىس ءبىلدىرىپ جاتادى», دەيدى جاتتىقتىرۋشى.
زارەچنىيداعى زاماناۋي سپورت كەشەنى سياقتى جاڭا نىساندار كوبەيگەن سايىن وبلىستا بۇقارالىق سپورتپەن اينالىسۋشىلاردىڭ دا سانى ارتا تۇسكەن. وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەلەنا كيرەەۆانىڭ ايتۋىنشا, وڭىردە سپورتتى جانىنا سەرىك ەتكەندەردىڭ قاتارى جىل سايىن كوبەيىپ كەلەدى. ماسەلەن, بۇگىندە وبلىس تۇرعىندارىنىڭ 43,3%-ى سپورتپەن بەلسەندى تۇردە اينالىسادى. 2029 جىلعا دەيىن بۇل كورسەتكىشتى ءبىز 50%-عا جەتكىزۋدى كوزدەپ وتىرمىز. بيىل وبلىستا سالىناتىن 8 دەنە شىنىقتىرۋ-ساۋىقتىرۋ كەشەنىنىڭ جەتەۋى اۋىلدى جەردە بوي كوتەرەدى.
سپورت كەشەنىنىڭ كۇرەس زالىنا ەكى كىلەم توسەلگەن. مۇندا ءبىر ۋاقىتتا 40 بالا جاتتىعۋ جاساي الادى. باپكەر ماماندار جاڭا نىساننىڭ, اسىرەسە, ۇلتتىق سپورت تۇرلەرىنىڭ دامۋىنا ۇلكەن ىقپال ەتەتىنىن ايتىپ وتىر.
«بۇگىندە ءدال وسىنداي سپورت كەشەنى سوناۋ شالعايدا جاتقان جانگەلدين اۋدانىنىڭ 3 اۋدانىنا سالىنايىن دەپ جاتىر. مۇنىڭ پايداسى وتە كوپ. مىسالى, بۇگىن اشىلىپ جاتقان سپورت كەشەنىن الايىق, بۇعان دەيىن وسى ەلدى مەكەننىڭ بالالارى مەكتەپتىڭ جەرتولەسىندە, مادەنيەت ءۇيىنىڭ حولىندا جاتتىعىپ كەلدى. ەشقانداي جاعداي بولعان جوق. سونىڭ وزىندە قوستاناي اۋدانى قازاق كۇرەسىنەن 3-4 قازاقستان چەمپيونىن تاربيەلەپ شىعاردى. مۇنىڭ سىرتىندا, كۇرەستىڭ باسقا تۇرلەرى بويىنشا ءوتىپ جاتاتىن رەسپۋبليكالىق, وبلىستىق جارىستاردىڭ جەڭىمپازدارى مەن جۇلدەگەرلەرى شىعىپ جاتىر. قازىر ۇلتتىق كۇرەس بويىنشا وبلىس كولەمىندە قوستاناي اۋدانى ءبىرىنشى ورىندا تۇر. قازاق كۇرەسىنىڭ مەكتەبى دامىعان قوستاناي, ارقالىق قالالارى مەن امانگەلدى, جانگەلدين اۋداندارىنان دا وزىپ كەتتى. وسىندا قازىرگى ۇلتتىق مەكتەپتىڭ سەرىك دارمەنباەۆ باستاعان بەس مىقتى جاتتىقتىرۋشى جۇمىس ىستەپ جاتىر. قوستاناي وبلىسىن العا سۇيرەپ جاتقان – وسى ازاماتتاردىڭ شاكىرتتەرى. زارەچنىي قازاق كۇرەسىنەن باسقا, اسىق ويىنى, توعىزقۇمالاق, كوكپاردان دا وبلىس بويىنشا ءبىرىنشى ورىندا تۇر. سوندىقتان قوستاناي اۋدانىنىڭ كەلەشەگى وتە زور. ەڭ باستىسى, جاڭا سپورت كەشەنى مەكتەپكە جاقىن تۇر. سول جاعىندا 500 مەتردەي جەردە تاعى ءبىر ۇلكەن مەكتەپ سالىنىپ جاتىر. جالپى, مۇندا تۇرىپ جاتقاندار نەگىزىنەن كەزىندە امانگەلدى, جانگەلدين, ناۋىرزىم اۋداندارىنان كوشىپ كەلگەن اۋىلدىڭ بالالارى عوي. سوندىقتان بۇل اۋداننىڭ بولاشاعىنان كوپ ءۇمىت كۇتىپ وتىرمىز. رەسپۋبليكا, ازيانى ايتپاعاندا, الەم, وليمپيادا چەمپيوندارى شىعاتىنىنا سەنەمىز», دەيدى قوستاناي قالاسىنىڭ اعا باپكەرى جۇماقان قاسىمحانوۆ.
سپورت كەشەنىنىڭ اشىلۋ سالتاناتىنان كەيىن جاڭا نىساندا ۆولەيبولدان وبلىس بىرىنشىلىگىنىڭ جالاۋى كوتەرىلدى. ءىس-شارا اياسىندا ءتۇرلى حالىقارالىق جارىستاردا ەل نامىسىن قورعاپ, جەڭىس تۇعىرىنان كورىنىپ جۇرگەن سپورتشىلار ماراپاتتالىپ, ءار سالادا ەسەلى ەڭبەك ەتىپ جۇرگەن كانىگى ماماندارعا «قوستاناي اۋدانىنىڭ قۇرمەتتى ازاماتى» اتاعى بەرىلدى.
قوستاناي وبلىسى
