فوتو: سەناتتىڭ ءباسپاسوز قىزمەتى
سەنات توراعاسىنىڭ ورىنباسارى جاقىپ اسانوۆ: «ەلدەرىمىز ءبىر-بىرىنە ارقاشان نەگىزگى ستراتەگيالىق ارىپتەس بولاتىنىنا كۇمان جوق. ەكىجاقتى قاتىناستار بارلىق سالادا جانە بارلىق دەڭگەيدە دامي بەرەدى. ەل مۇددەسىن ءوزارا قۇرمەتتەۋ باستى قاعيدات بولىپ تابىلادى. مەملەكەتتەرىمىزدىڭ باسشىلارى ىنتىماقتاستىقتى تەرەڭدەتۋدى باعدار ەتەدى. كوشباسشىلارىمىز بيىلدىڭ وزىندە, جارتى جىلعا جەتپەي بىرقاتار كەزدەسۋ وتكىزدى. پالاتالار توراعالارىنىڭ ارقاسىندا سەنات پەن فەدەراتسيا كەڭەسىنىڭ اراسىنداعى پارلامەنتارالىق ىنتىماقتاستىق ساپالى تۇردە ورىستەپ كەلەدى», دەدى.
رەسەي فەدەراتسياسى فەدەرالدىق جينالىسى فەدەراتسيا كەڭەسى توراعاسىنىڭ ءبىرىنشى ورىنباسارى اندرەي ياتسكين مەن ومبى وبلىسىنىڭ گۋبەرناتورى ۆيتالي حوتسەنكو ءوز كەزەگىندە رەسەي قازاقستانمەن ىنتىماقتاستىقتى جوعارى باعالايتىنىن, سونداي-اق ەكىجاقتى قارىم-قاتىناستى نىعايتۋعا بەلسەندى ىقپال ەتۋگە دايىن ەكەنىن اتاپ ءوتتى.
سەناتور تالعات ءجۇنىسوۆ رەسەي مەن قازاقستان اراسىنداعى مادەني-گۋمانيتارلىق ىنتىماقتاستىق بەلسەندى دامىپ كەلە جاتقانىن اتاپ, قازاقستاندا جەڭىستىڭ 80 جىلدىعىن مەرەكەلەۋگە دايىندىق بويىنشا ارداگەرلەرگە جانە تاريحي وقيعالاردىڭ ۇمىتىلماۋىنا ەرەكشە نازار اۋدارىلىپ جاتقانىن, ءتۇرلى شارالار مەن اسكەري شەرۋ جوسپارلانىپ وتىرعانىن تىلگە تيەك ەتتى.
سەنات دەپۋتاتى ەرنۇر ايتكەنوۆ ەكونوميكا, مادەنيەت, ءبىلىم, دەنساۋلىق ساقتاۋ سالالارىنداعى ىنتىماقتاستىقتى تەرەڭدەتۋدىڭ ماڭىزدىلىعىن اتاپ, سونداي-اق يننوۆاتسيالار, ەكولوگيالىق ورنىقتى دامۋ جانە كولىك ينفراقۇرىلىمىن ودان ءارى جاقسارتۋ تۇرعىسىنداعى ءوزارا ءىس-قيمىلدىڭ ەلەۋلى الەۋەتىن اتاپ ءوتتى.
