فوتو: ا.بايجۇمانوۆ
جۇزدەسۋگە قاتىسۋشىلار ازاماتتاردىڭ دەنساۋلىق ساقتاۋ جۇيەسىن دامىتۋ, مەديتسينالىق قىزمەت كورسەتۋ ساپاسىن باقىلاۋ, حالىقتىڭ سانيتارلىق-ەپيدەميولوگيالىق سالاۋاتتىلىعى, سونداي-اق ازاماتتاردى مىندەتتى الەۋمەتتىك مەديتسينالىق ساقتاندىرۋدىڭ تيىمدىلىگى ماسەلەلەرىن تالقىلادى.
نۇرتورە ءجۇسىپ ەلىمىزدەگى دەنساۋلىق ساقتاۋ ماسەلەسىنە سەناتورلار ەرەكشە نازار اۋدارىپ وتىرعانىن اتاپ ءوتتى. ولاردىڭ قاتارىندا مەديتسينالىق قىزمەتتەردىڭ ساپاسى مەن ۋاقىتىندا كورسەتۋ پروبلەماسى, دارىلىك پرەپاراتتاردىڭ جەتىسپەۋشىلىگى جانە جاڭا تۇرپاتتاعى بىلىكتى مەديتسينا قىزمەتكەرلەرىن دايارلاۋ ماسەلەلەرى بار.
«مەديتسينالىق ساقتاندىرۋ جۇيەسىن قارجىلاندىرۋعا قاراماستان ونىڭ جۇمىسىنداعى تيىمدىلىك ماسەلەسىن پرەزيدەنت بىرنەشە رەت اتاپ وتكەن ەدى. دەپۋتاتتىق كورپۋس پرەزيدەنتتىڭ تاپسىرماسى مەن حالىقتىڭ ەرىك-جىگەرىن ساپالى ورىنداۋ ماقساتىندا ۇكىمەت اتىنان ءسىزدىڭ مينيسترلىك قولدانىستاعى نقا مەن مەديتسينالىق قىزمەت كورسەتۋ تەتىكتەرىن تۇبەگەيلى قايتا قاراۋى ءتيىس دەپ سانايدى. قاجەت بولعان جاعدايدا مەملەكەت باسشىسىنىڭ تاپسىرماسىن ساپالى جانە ۋاقتىلى ورىنداۋعا باعىتتالعان كەشەندى شارالاردىڭ ءبارى قامتىلعان ءتيىستى قۇجاتتار ازىرلەنۋى ءتيىس. سەناتورلار وسى مىندەتتەردى ىسكە اسىرۋدا جان-جاقتى كومەك كورسەتۋگە دايىن», دەدى نۇرتورە ءجۇسىپ.
اقمارال ءالنازاروۆا ءوز كەزەگىندە دەنساۋلىق ساقتاۋ مينيسترلىگىندە جۇزەگە اسىپ جاتقان ساپالى مەديتسينالىق كومەككە جاعداي جاساۋعا باعىتتالعان جۇمىستار تۋرالى ايتىپ بەردى. ولاردىڭ قاتارىندا فارماتسەۆتيكا سالاسىنداعى عىلىمي الەۋەتتى دامىتۋ, مەديتسينالىق قىزمەتتەردىڭ ساپاسى مەن جەدەلدىگىن جاقسارتۋ, سونداي-اق دەنساۋلىق ساقتاۋ سالاسىنداعى نورماتيۆتىك-قۇقىقتىق بازانى تۇراقتى جاقسارتۋدى كوزدەيتىن اۋقىمدى ىستەر بار.
