كولىك قۇراستىرۋ ورتالىعىنىڭ دانەكەرلەۋ, سىرلاۋ جانە اۆتوكولىك قۇراستىرۋ تسەحى بار. تاجىريبە ورتالىعىن قاجەتتى زاماناۋي قۇرىلعىلارمەن جابدىقتاۋعا «Allur» زاۋىتى 140 ملن تەڭگە قارجى جۇمساعان. جالپى, سوڭعى جىلدارى اۆتوكولىك ءوندىرىسى قارقىندى دامي باستاعان قوستاناي وبلىسىندا اتالعان سالاعا بىلىكتى كادرلاردى دايارلاۋ ماسەلەسى ءبىرىنشى كەزەكتە تۇر. جىلىنا مىڭداعان اۆتوكولىك شىعارىپ جاتقان ءىرى كاسىپورىننىڭ تەحنيكا ماماندارىن دايارلايتىن وقۋ مەكەمەسىنە ءبىرىنشى رەت قوماقتى قارجى سالۋى دا وسى ماسەلەنى شەشۋ ماقساتىندا بولىپ جاتقان جاعداي.
«بۇعان دەيىن ستۋدەنتتەر ۇساق بولشەكتى ماشينا قۇراستىرۋ وندىرىسىمەن تەك وقۋ تاجىريبەسىنە بارعاندا عانا تانىسا الاتىن. ەندى وقۋدان قول ۇزبەي-اق, وسى كوللەدجدىڭ عيماراتىندا ءجۇرىپ تاجىريبەلىك داعدىلارىن قالىپتاستىرۋعا مۇمكىندىك الىپ وتىر. بۇعان دەيىن ەلىمىزدىڭ ەشبىر ءبىلىم مەكەمەسىندە مۇنداي ورتالىق بولعان ەمەس. قوستاناي اۆتوكولىك ترانسپورتى كوللەدجىن تامامداعان تۇلەكتەر ەندى بىزگە دايىن مامان بولىپ كەلەدى. كوللەدج ستۋدەنتتەرى دە وقۋىن اياقتاعان سوڭ بىردەن جۇمىسقا ورنالاسا الادى», دەيدى «Allur» زاۋىتى وندىرىستىك وقىتۋ ءبولىمىنىڭ باسشىسى ماحاببات ەرماعانبەتوۆا.
ارنايى كاسىپىك ءبىلىم بەرەتىن وقۋ ورنىنداعى كولىك قۇراستىرۋ الاڭى «Allur» كاسىبي قۇزىرەتتىلىك ورتالىعى» دەپ اتالادى. كوللەدج بەن اۆتوكولىك زاۋىتىنىڭ اراسىندا تىعىز بايلانىس ورناعالى بەرى وقۋ ورنىنداعى ءبىلىم ساپاسىن ارتتىرۋ باعىتىندا دا ءبىرتالاي شارۋا اتقارىلعان.
«زاۋىت ءبىزدىڭ كوللەدجدى 2021 جىلدان بەرى قاناتىنىڭ استىنا الىپ, جان-جاقتى قولداۋ كورسەتىپ كەلەدى. سوندىقتان مۇنداعى وقۋ ۇدەرىسى اۆتوموبيل جاساۋ سالاسىنداعى وندىرىستىك تەحنولوگيامەن تىعىز بايلانىستا ءوربيدى. وسىنىڭ ناتيجەسىندە, بىزدە ساپالى تەحنيكالىق مامانداردى دايارلاۋعا قاجەتتى جاعدايدىڭ ءبارى بار. ماسەلەن, 2023 جىلى كوللەدج «ماشينا جاساۋ» ماماندىعى بويىنشا ليتسەنزيا الدى. قۇزىرەتتىلىك ورتالىعىندا ءبىز بالالاردى وسى باعىتتا وقىتىپ, ۇيرەتىپ, كاسىپكە باۋليمىز. مۇندا كىرگەن ستۋدەنت كادىمگى زاۋىتقا كىرگەندەي اسەردە بولادى. ويتكەنى بۇل ورتالىقتا اۆتوموبيل زاۋىتىندا بار قۇرىلعىنىڭ ءبارى بار. زاۋىتتىڭ شاعىن كوشىرمەسى دەسەك تە بولادى. وسى جەردە تاجىريبە العان تۇلەكتەر كەيىن كاسىپورىنعا بارعاندا كاسىپكە تەز توسەلەدى», دەيدى قوستاناي اۆتوموبيل ترانسپورتى كوللەدجىنىڭ ديرەكتورى دميتري پاۆلەنكو.
ستۋدەنتتەردىڭ تاجىريبەسىن زاۋىتتىڭ بىلىكتى ماماندارى مەن كوللەدج وقىتۋشىلارى ۇشتايتىن بولادى. جاڭا ورتالىققا ورناتىلعان دانەكەرلەۋ, بوياۋ اپپاراتتارى مەن قۇراستىرۋ جەلىسى, جۇك كوتەرگىش ءتارىزدى قۇرىلعىلاردىڭ ءبارى – ءدال «Allur» زاۋىتىنداعىداي.
ء«بىز قۇرىلعىلاردىڭ ءبارىن ىسكە قوسىپ كورىپ, تەكسەرىپ شىقتىق. الداعى وقۋ جىلى 3-كۋرس ستۋدەنتتەرىن وسى جەردە وقىتاتىن بولامىز. زاۋىتقا جاڭا ورنالاسقان جاس ماماندار دا وسى جەردە العاشقى تاجىريبەدەن وتەتىن بولادى. ويتكەنى مۇندا ەڭبەك قاۋىپسىزدىگىنە قاتىستى ماسەلەنىڭ ءبارى جان-جاقتى قاراستىرىلعان. تاعىلىمدامادان وتۋشىلەر قاۋىپسىز جاعدايدا ءوندىرىس الىپبيىمەن تانىسىپ, تاجىريبە الىپ شىعادى. وسى جەردەن شىققان ستۋدەنتتەر مەن ۇيرەنۋشىلەردىڭ ءبارى زاۋىتقا جۇمىسقا الىنادى», دەيدى «Allur» كاسىبي قۇزىرەتتىلىك ورتالىعىنىڭ باستىعى دەنيس ناگوۆيتسىن.
مامانداردىڭ ايتۋىنشا, جاڭا جوبا ەلىمىزدىڭ اۆتوموبيل جاساۋ سالاسى بويىنشا ساپالى مامانداردى دايارلاۋدىڭ تولىققاندى جۇيەسىن قالىپتاستىرادى.
قوستاناي وبلىسى
