ادامدارعا سىلەۋسىن شابۋىل جاسادى

قوستاناي وبلىسىنىڭ قاراسۋ اۋدانىنداعى قارامىرزا اۋى­لىنا كادىمگى سىلەۋسىن كىرىپ كەتىپ, تۇرعىنداردىڭ زارە-قۇتىن قاشىرعان. ابىروي بولعاندا, ەشكىم زارداپ شەككەن جوق. ءتۇز تاعىسى ەلدى مەكەنگە كىرگەن كەزدە الدىمەن اۋلا يتىنە, سودان كەيىن وسىنداعى «رامازان-قاراسۋ» جشس كولىك اۋلاسىنىڭ كۇزەتشىسىنە شابۋىل جاساماق بولىپتى. ازۋلى جىرتقىشتى جاقىن جەردەن كورە­مىن دەپ ويلاماعان كۇزەتشى جالما-جان باسقالاردى كومەككە شاقىرادى. ادامدار جينالىپ قالعان سوڭ, سىلەۋسىن سەسكەنىپ, اۋلاداعى جۇك كولىكتەرىنىڭ بىرىنە بارىپ جاسى­رىنعان. كەيىن وقيعا ورنىنا اڭشىلار كەلەدى. جىرتقىش ولارعا دا ازۋىن اقسيتىپ, ايبات شەگەدى. سەرىكتەستىكتىڭ اۋلاسىنا جينالعان تۇرعىندار شاپشاڭ قيمىلدى سىلەۋسىن كۇتپەگەن جەردەن شابۋىل جاساسا, بىرەۋمىزدى جازىم ەتۋى مۇمكىن دەپ, جانۋاردى اتىپ الۋدى ۇيعارادى. وسىلايشا ولتىرىلگەن جانۋاردىڭ دەنەسى اۋدان ورتالىعىنا جىبەرىلگەن. اۋداندىق مۇراجايعا قويۋ ءۇشىن ول تاكسيدەرميا ۇردىسىنەن وتكىزىلۋى مۇمكىن. ايتا كەتەيىك, وقيعا كۋاگەرلەرى بۇل جابايى اڭ قازاق دالاسىنا رەسەيمەن شەكارالاس ورمان ايما­عىنان كەلىپ, اداسىپ قالعان سوڭ اۋىلعا كىرىپ, وزىنە ازىق ىزدەگەن بولار دەپ جورامالداپ وتىر. جولدىباي بازار, «ەگەمەن قازاقستان».