ماتەماتيك

ءبىز جانەتپەن قازپي-ءدىڭ ماتەماتيكا فاكۋلتەتىنىڭ تابال­دىرىعىن بىرگە اتتاپ, ءتورت جىل قاتارىنان بىرگە ءدارىس الدىق. قىزىققا تولى ستۋدەنتتىك جىلداردى دا بىرگە وتكىزدىك. ول ونەرلى جىگىت رەتىندە بىردەن كوزگە ءتۇستى. قولىنا دومبىراسىن الىپ كۇي تارتقاندا ارقالانىپ كەتەتىن. اسىرەسە, مۇقاعالي اقىننىڭ ولەڭدەرىنە جازىلعان اندەردى كەرەمەت شىرقايتىن. جاتاقحانا بولمەلەرىندە تۋعان كۇن بولسا, سول جەردە دومبىراسىن شەرتىپ جانەت وتىراتىن. وقۋ ءبىتىرىپ, ۇلكەن ومىرگە جولداما العاننان كەيىن دە ءبىزدىڭ ەڭبەك جولىمىز بىرگە جالعاستى. جانەت كەرىمقۇلوۆ ەڭبەك جولىن سول كەزدەگى كەگەن اۋدانى, ساتى اۋىلىنداعى ا.تۇركەباەۆ اتىنداعى ورتا مەكتەپتە ماتەماتيكا ءپانىنىڭ مۇعالىمى بولىپ باس­تادى. كەيىن ۇيعىر اۋدانىنداعى قىرعىزساي ورتا مەكتەبىندە مۇعالىم بولعان جىلداردا ءوز ىسىنە ماقساتتى ءارى ويلى كوزبەن قارايتىن, شاكىرت الدىندا جاۋاپتى تۇلعا بولىپ قالىپتاستى. جاس مامان اراعا جىلدار سالىپ, ءوز كاسىبىنىڭ شەبەرى, ويلاۋ قابىلەتى جوعارى, ءوز ءبىلىمىن ۇتىمدى ۇيىمداستىرا بىلەتىن ۇلگىلى ماتەماتيك رەتىندە تانىلدى. وسىلايشا, ول ماتەماتيكانىڭ قىر-سىرىن ۇيرەتىپ ءجۇرىپ, شاكىرتتەرىنىڭ جانە ارىپتەستەرىنىڭ قۇرمەتىنە بولەنە باستادى. ءبىلىمدى مامان اۋدانعا دا قاجەت. 1984 جىلى اۋداندىق ءبىلىم ءبولىمىنىڭ ينسپەكتورى قىزمەتىنە شاقىرىلدى. وندا جانەت اۋدان مەكتەپتەرىندە مۇعالىمدەردىڭ ءبىلىم بەرۋىنىڭ عىلىمي جانە وقۋ-ادىستەمەلىك ۇيىمداستىرۋشىلىق جۇمىستارىنا تالداۋ جاساۋمەن اينالىستى. وقۋشىلاردىڭ ءبىلىمدى مەملەكەتتىك ءبىلىم ستاندارتى دەڭگەيىنە قولجەتكىزۋىن قاداعالاپ, نۇسقاۋ بەرىپ وتىردى. ج.كەرىمقۇلوۆ بىرقاتار جىل ۇيعىر اۋداندىق ءبىلىم ءبولىمىن دە باسقاردى. ودان كەيىن №4 شونجى ورتا مەكتەبىندە ماتەماتيكا ءپانىنىڭ مۇعالىمى, ج.قۇداي­بەرگەنوۆ اتىنداعى ورتا مەك­تەپتە ديرەكتوردىڭ وقۋ ءىسى جونىندەگى ورىنباسارى, ءسۇم­بە ورتا مەكتەبىنىڭ ديرەك­تورى قىزمەتتەرىن اتقارىپ, وقۋشى­لاردىڭ ويداعىداي ءبىلىم الۋىنا جاعدايلار جاسادى. ال 2008 جىلدان بەرى ول بىرلىك-سۇمبە ورتا مەكتەبىندە وقۋشىلارعا ماتەماتيكا پانىنەن ساباق بەرىپ كەلەدى. جانەت كەرىمقۇلوۆ اۋدان تۇرعىندارىنىڭ, مۇعالىمدەر مەن وقۋشىلاردىڭ كەيبىر وزەكتى دەگەن ماسەلەلەرىن شەشۋدە دە ءتيىستى جەردە ءوز پىكىرىن اشىق ايتىپ وتىرادى. ولاردىڭ شەشىمىن تابۋىنا ىقپال ەتەدى. سونداي-اق, ول وسىدان بەس جىلداي بۇرىن اۋداندىق «ۇرپاق پارىزى» قوعامدىق بىرلەستىگىنىڭ توراعاسى بولىپ سايلاندى. ۇلاعاتتى ۇستازدان ماتەماتيكا عىلىمىنا قىزىققان كوپتەگەن شاكىرت ءبىلىم الدى, تالاي جاس مامانعا جول كورسەتتى. اۋدان جاستارىنىڭ ءتۇرلى بايقاۋلار مەن كونكۋرستارعا, باسقا دا ءىس-شارالارعا قاتىسۋلارىنا مۇرىندىق بولدى. ونىڭ شاكىرت تاربيەلەۋدەگى ەڭبەگى ەسكەرۋسىز قالعان جوق. «قا­زاق كسر-ءى اعارتۋ ءىسىنىڭ ۇزدىگى» توسبەلگىسىمەن, «قازاقستان رەسپۋب­لي­كاسىنىڭ تاۋەلسىزدىگىنە 20 جىل» مەرەكەلىك مەدالىمەن, سونداي-اق, وبلىس اكىمىنىڭ, اۋدان اكىمىنىڭ, ءبىلىم ءبولىمىنىڭ قۇرمەت گراموتالارىمەن ماراپاتتالدى. جان-جاقتىلىعىمەن ەرەكشە­لەنەتىن جانەت زامانداسىمىز ءبىر­دە قازاقى ءازىل-قالجى­ڭىمەن بارشامىزدى كۇلكىگە كەنەلتسە, ەندى بىردە بي-شەشەندەردىڭ ۇلاعاتتى سوزدەرىن ايتىپ, جىگەرىڭدى قايرايدى. ۇتقىرلىعى مەن تاپ­قىرلىعىنا كوڭىل سۇيسىنەدى. ادام­دى جاتسىنبايتىن جايدارى جان ۇلكەندى دە, كىشىنى دە وزىنە باۋراپ الاتىن كىشىپەيىل. جانەت پەن مايراش بۇگىندە ۇلىن ۇياعا قوندىرىپ, قىزىن قياعا ۇشىرعان ۇلگىلى وتباسى. ماي­راش – اۋدانعا بەلگىلى ماتەماتيك مۇعالىم. ال ۇل-قىزدارىنىڭ بار­­لىعى جوعارى ءبىلىمدى ماماندار, اكەلەرى سياقتى ونەرلى جاندار. رايسا قويشىباەۆا, شونجى مەديتسينالىق كوللەدجىنىڭ اتقارۋشى ديرەكتورى. الماتى وبلىسى, ۇيعىر اۋدانى.