شاراينا
حورۆاتيانىڭ ءىس باسىنداعى پرەزيدەنتى يۆو يوسيپوۆيچ پرەزيدەنتتىك سايلاۋدىڭ ەكىنشى تۋرى قورىتىندىلارى بويىنشا ءوزىنىڭ جەڭىلىسىن مويىندادى. ءسويتىپ, حورۆاتيادا ەلدى العاش رەت ايەل پرەزيدەنت باسقاراتىن بولدى. ول – كوليندۋ گرابار-كيتاروۆيچ.
گرابار-كيتاروۆيچ بيلىككە وپپوزيتسياداعى وڭشىلتسەنتريستىك «حورۆات دەموكراتيالىق دوستاستىعى» پارتياسىنىڭ وكىلى بولىپ تابىلادى. ال سايلاۋ بارىسىنا كەلسەك, حورۆاتيا مەملەكەتتىك سايلاۋ كوميسسياسى حابارلاعانداي, ەكىنشى تۋردا ءىس باسىنداعى پرەزيدەنت يوسيپوۆيچ گرابار-كيتاروۆيچكە ءسال عانا باسىمدىقپەن جول بەرگەن. ناقتىلاي تۇسسەك, گرابار-كيتاروۆيچ سايلاۋشىلاردىڭ 50,42 پايىز داۋىسىن جيناسا, يوسيپوۆيچ 49,58 پايىز داۋىس العان. ايىرماشىلىق بولماشى عانا.
قوس كورەيا پرەزيدەنتتەرى كەزدەسە مە؟
وڭتۇستىك كورەيا پرەزيدەنتى پاك كىن حە كحدر كوسەمى كيم چەن ىنمەن ەشقانداي الدىن الا شارت قويۋسىز كەزدەسۋگە كەلىسىمىن بەرەتىنىن حابارلادى. پاك كىن حەنىڭ سوزىنە قاراعاندا, ول كىممەن بولسا دا كەزدەسۋگە دايىن, تەك ەكىگە بولىنگەن ءبىر حالىقتىڭ جان ازابىن جەڭىلدەتىپ, بەيبىت بىرلەسۋىنە قول جەتكىزۋگە العىشارت جاسالسا بولعانى.
بىراق وڭتۇستىك كورەيا پرەزيدەنتى ۇلتتىق قاۋىپسىزدىك تۋرالى زاڭنىڭ ساقتالۋى قاجەتتىگىن اتاپ كورسەتتى. سوناۋ 1948 جىلى قابىلدانعان بۇل قۇجات سولتۇستىك كورەيانى انتيمەملەكەتتىك ۇيىم رەتىندە ايقىندايدى جانە وعان كەز كەلگەن ىقپال ەتۋ قىلمىستىق جازالانۋدى مەڭزەيدى. ال ءوزىنىڭ جاڭاجىلدىق سوزىندە كحدر كوسەمى كيم چەن ىن دا 2015 جىلى پاك كىن حەمەن كەزدەسۋ نيەتى بار ەكەنىن جەتكىزگەن بولاتىن.
نەتانياحۋ ەۆرەيلەردى ەلىنە شاقىردى
يزرايل پرەمەر-ءمينيسترى بەنيامين نەتانياحۋ فرانتسياداعى ەۆرەي قوعامىنىڭ مۇشەلەرىنە يزرايلگە تۇراقتى تۇرۋ ءۇشىن كوشۋ ۇسىنىسىمەن قايىرىلدى. بۇل رەتتە ول رەپاتريانتتاردى مەملەكەتتىك دەڭگەيدە قولداۋعا ۋادە بەردى.
«يزرايل مەملەكەتى – تەك سىزدەر شوقىنۋ كەزىندە قايىرىلاتىن ورىن ەمەس, يزرايل مەملەكەتى – بۇل سىزدەردىڭ ۇيلەرىڭىز. يزرايلگە كوشكىسى كەلەتىن بارلىق ەۆرەي مۇندا قۇشاق جايا قارسى الىنادى. سونداي-اق, ءبىزدىڭ جانە سىزدەردىڭ دە ەلدەرىڭىز بولىپ تابىلاتىن مەملەكەتتە بەيىمدەلۋلەرىڭىزگە كومەكتەسەتىن بولامىز», دەدى ءوز سوزىندە ب.نەتانياحۋ. جاقىن كۇندەرى فرانتسيادان جانە ەۋروپانىڭ باسقا دا ەلدەرىنەن كەلەتىن ەۆرەيلەردى قوسىمشا قولداۋ بويىنشا شارالار تىزبەگى تۇزىلمەك ەكەن. ال بىلتىر يزرايلگە تۇراقتى تۇرۋعا كوشىپ كەلگەندەر سانى 26,5 مىڭ ادامدى قۇراپتى.
التى ادام زالالسىزداندىرىلدى
قحر-دىڭ شىڭجاڭ-ۇيعىر اۆتونوميالى اۋدانىندا جارىلعىش قۇرىلعىلاردى ىسكە قوسۋعا ارەكەتتەنگەن التى ادام زالالسىزداندىرىلعان. بۇل تۋرالى «سينحۋا» اگەنتتىگى حابارلادى. قاماۋعا الىنعانداردىڭ ءبىرىن جەرگىلىكتى تۇرعىندار شۋلە ۋەزىنىڭ ساۋدا ورامىندا كورسە كەرەك.
اتالعان ەر ادامدى ۇستاۋعا كىرىسكەن ساتتە ول ءتارتىپ ساقشىلارىنا قولىنداعى بالتاسىمەن تاپ بەرگەن جانە جارىلعىشتى ىسكە قوسۋعا ارەكەت جاساعان. جارىلعىش قۇرىلعىنىڭ قانداي ۇلگىدە ەكەندىگى تۋرالى ايتىلمايدى. العاشقى كۇدىكتىنى ۇستاۋ كەزىندە سول ماڭدا جۇرگەن تاعى بەس جانكەشتى دە وزدەرىنىڭ دەنەلەرىنە جاسىرىلعان بومبالاردى جارۋعا تىرىسقان. پوليتسيا قىزمەتكەرلەرى ولاردى دا زالالسىزداندىرىپتى. ءتارتىپ ساقشىلارى مەن بەيبىت تۇرعىندار اراسىندا قۇرباندىقتار تۋرالى اقپارات جوق.
تەررورشىنىڭ زايىبى سيرياعا قاشىپتى
9 قاڭتار كۇنى پاريجدەگى سۋپەرماركەتتىڭ ءبىرىن باسىپ العان تەررورشى امەدي كۋليباليدىڭ ىقتيمال سەرىكتەسى تۇركيا اۋماعى ارقىلى سيرياعا قاشقانعا ۇقسايدى. بۇل تۋرالى تۇركيا سىرتقى ىستەر ءمينيسترى مەۆليۋت چاۆۋشوعلى حابارلادى.
ءمينيستردىڭ سوزىنە قاراعاندا, حايات بۋمەدەن مادريدتەن ىستامبۇلعا 2 قاڭتار كۇنى كەلسە, 8 قاڭتاردا تۇركيا-سيريا شەكاراسىن قيىپ وتكەن. لاڭكەستىك جاسالعان ۋاقىتتا اتالعان ايەل فرانتسيا اۋماعىنان تىس جەردە بولسا دا ەلدىڭ ىشكى ىستەر مينيسترلىگى ونى قىلمىسقا دايىندىققا قاتىسى بار دەپ ەسەپتەپ وتىر. ەسكە سالا كەتسەك, 9 قاڭتار كۇنى كالاشنيكوۆ اۆتوماتىمەن قارۋلانعان امەدي كۋليبالي پاريجدەگى سۋپەرماركەتكە باسا-كوكتەپ كىرىپ, كەپىلدىككە ادامدار العان ەدى. ۇستاۋ كەزىندە ول 4 كەپىلدىكتەگى ادامدى اتىپ ولتىرسە, كەيىن ءوزى دە جان تاپسىرعان بولاتىن.
زورلىقتان كوز جۇمعان بالا سانى – 650
امەريكانىڭ تەحاس شتاتىنىڭ باسشىلىعى وتباسىنداعى ءجۇردىم-باردىم قاتىناس پەن زورلىق-زومبىلىق سالدارىنان جۇزدەگەن بالا قازا تاپقانىن جاريا ەتتى. ماسەلەن, 2010-2014 جىلدار ارالىعىندا اتالعان شتاتتا 655 بالانىڭ كوز جۇمعانى بەلگىلى بولىپ وتىر.
ولگەن بالالاردىڭ جارتىسىنا جۋىعى بيلىك تالاي مارتە نارازىلىق بىلدىرگەن وتباسىلارىنىكى ەكەن. بۇل اقپاراتتاردى شتاتتىڭ وتباسى ىستەرى جونىندەگى دەپارتامەنتى تاراتتى. 2009 جىلدان بەرى 50-دەن استام الەۋمەتتىك سالانىڭ قىزمەتكەرلەرى پروكۋراتۋرا ورگاندارىنا اقپاراتتاردى ءدال بەرمەگەنى بەلگىلى بولىپ وتىر. وسىلايشا كەم دەگەندە دەپارتامەنتتىڭ بۇرىنعى 4 قىزمەتكەرىنە لاۋازىمدىق قىلمىس جاسادى دەگەن ايىپ تاعىلعان. ستاتيستيكا دەرەكتەرىنە سۇيسەنسەك, 2012 جىلى بۇكىل اقش بويىنشا زورلىق-زومبىلىق پەن ءجۇردىم-باردىم قاتىناستان 1640 بالا كوز جۇمىپتى.
قىسقا قايىرىپ ايتقاندا:
*جەمقورلىق جاسادى دەگەن كۇدىكپەن قىتاي حالىق رەسپۋبليكاسى مەملەكەتتىك قاۋىپسىزدىك ءمينيسترىنىڭ ورىنباسارى ما تسزيان قاماۋعا الىندى. ازىرشە وعان ناقتى قانداي كۇدىك كەلتىرىلىپ وتىرعانى بەلگىسىز. بەلگىلىسى – ونىڭ قاۋىپسىزدىك ورگاندارىندا 30 جىلدان استام جۇمىس ىستەگەنى.
*اقش پرەزيدەنتتىگىنە رەسپۋبليكالىق پارتيادان بۇرىنعى كانديدات ميتت رومني 2016 جىلعى مەملەكەت باسشىسى سايلاۋىنا تۇسۋگە دە دايىن ەكەنىن مالىمدەدى. بۇل ونىڭ ەلدى باسقارۋعا دەگەن ءۇشىنشى ارەكەتى بولماق. رومني پرەزيدەنت بولعىسى كەلەتىنىنىڭ سەبەبىن حالىقارالىق جاعدايدىڭ ناشارلاۋىمەن جانە اقش ەكونوميكاسىنىڭ تومەندەۋىمەن ءتۇسىندىردى.
*ماماندار 28 جەلتوقسان كۇنى اپاتقا ۇشىراعان AirAsia اۋە كەمەسىنىڭ ەكىنشى «قارا جاشىگى» قاي جەردە جاتقانى بەلگىلى ەكەنىن حابارلادى. يندونەزيا كولىكتەگى قاۋىپسىزدىك جونىندەگى ۇلتتىق كوميتەتىنىڭ باس تەرگەۋشىسى ماردجونو سيسۆوسۋۆارنونىڭ سوزىنە قاراعاندا, اپپارات ۇشاقتىڭ وزىندە جاتىر. جاقىندا عانا ءبىرىنشى «قارا جاشىك» تابىلعان ەدى.
*يسپانيا ۇكىمەتى شەنگەن كەلىسىمىن وزگەرتىپ, ەلدەر اراسىندا شەكارالىق باقىلاۋ ەنگىزۋ قاجەت دەپ ەسەپتەپ وتىر. بۇل تۋرالى كورولدىكتىڭ ىشكى ىستەر ءمينيسترى حورحە فەرناندەس دياس مالىمدەدى. ونىڭ سوزىنە قاراعاندا, سوڭعى كەزدەرى ەۋروپا ەلدەرىنە كۇدىكتى ادامدار ەمىن-ەركىن كىرىپ-شىعاتىن بولعان. مۇندايعا الداعى ۋاقىتتا مۇلدەم جول بەرۋگە بولمايدى.
ينتەرنەت ماتەريالدارى نەگىزىندە ازىرلەندى.
