قازاقستاننىڭ قايىرىمدىلىق كومەگى

ۋكراينانىڭ وڭتۇستىك-شىعىس وڭىرلەرى حالقى تاراپىنان ۇلكەن ريزاشىلىق سەزىمدەرىن تۋعىزدى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تاپسىرماسىنا سايكەس, ەل ۇكىمەتى تاراپىنان ۋكراينانىڭ وڭتۇستىك-شىعىس وڭىرلەرىنە رەسمي گۋمانيتارلىق كومەك كورسەتۋ ءۇشىن اقشالاي جانە ماتەريالدىق رەسۋرستار ءبولىنىپ وتىر, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى. ماسەلەن, قازاقستان رەسپۋبلي­كاسىنان ۋكرايناعا جالپى سوماسى 69 727 875 تەڭگەنىڭ ازىق-ت ۇلىك ونىمدەرى جونەلتىلگەن بولسا, ول ۇستىمىزدەگى جىلدىڭ 10 قاڭتارىندا تاپسىرىلدى. اتاپ ايتقاندا, 127 875 قالبىر ەت كونسەرۆىلەرى, 40 توننا قانت, 150 توننا قاراقۇمىق جانە 36 000 ليتر وسىمدىك مايى بەرىلگەن بولاتىن. گۋمانيتارلىق جۇكتى ۋكراي­نانىڭ توتەنشە جاعدايلار ءجو­نىندەگى مەم­لە­كەتتىك قىزمەتىنىڭ وكىل­دەرىنە لۋگانسك وبلىسىنىڭ سە­ۆەرودونەتسك قالا­سىندا لۋگانسك وبلىستىق مەم­لە­كەتتىك اكىمشى­لىگى باسشىسىنىڭ ورىن­باسار­لا­رى ۆ.ە.گريتسيشين مەن و.پ.ليش­نيكتىڭ, ۋكراينا توتەن­شە جاعدايلار جونىندەگى مەم­لەكەت­تىك قىزمەت باسشىسىنىڭ ءبىرىن­شى ورىن­باسارى ا.پ.بويكونىڭ, حا­لىقارالىق ۇيىمدار وكىلدەرى, اتاپ ايتقاندا, حالىقارالىق قىزىل كرەست كوميتەتىنىڭ, بۇۇ-نىڭ, «حالىقارالىق كومەك جانە دامۋ» ۇيىمىنىڭ, «الەكساندر رومانوۆسكي» قورىنىڭ, سونداي-اق, ۋكراينا مەن قازاقستاننىڭ بۇقارالىق اقپارات قۇرالدارى وكىلدەرىنىڭ قاتىسۋلارىمەن ءوتتى. قازاقستان تاراپىنان شاراعا قازاقستاننىڭ ۋكرايناداعى ەلشى­لىگى مەن قازاقستان رەسپۋب­­­لي­كاسى ۇلت­تىق ەكونوميكا مي­نيسترلىگىنىڭ مەملە­كەتتىك ماتەريالدىق رەزەرۆتەر ءجونىن­دەگى «رەزەرۆ» رمك وكىلدەرى قاتىستى. قازاقستان رەسپۋبليكاسى ەلشى­لىگىنىڭ ۋكرايناداعى كەڭەسشى-ەلشىسى ا.وسپانوۆ ۋكراينا تاراپىنا سىيلىق سەرتيفيكاتىن تاپسىرىپ تۇرىپ بىلاي دەپ اتاپ ءوتتى: «بۇگىن ۋكراينا ءوزىنىڭ قالىپتاسۋى مەن دامۋىنداعى كۇردەلى كەزەڭدى باسىنان وتكەرۋدە. وسىنداي جاعدايدا قازاقستان سىرتتا قالا المايدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تاپسىرماسىنا سايكەس, ۋكراينانىڭ وڭتۇستىك-شىعىس وڭىرلەرىندەگى مۇقتاج ادامدارعا جالپى سوماسى 380 000 اقش دوللارى تۇراتىن تەك ازىق-ت ۇلىك ونىمدەرى جىبەرىلدى». ا.وسپانوۆ ۋكراينانىڭ توتەنشە جاعدايلار جونىندەگى مەملەكەتتىك قىزمەتى مەن لۋگانسك وبلىسى اكىمشىلىگىنىڭ ۇيلەسىمدى جانە جەدەل جۇمىسىن اتاپ كورسەتە كەلىپ, اتالعان گۋمانيتارلىق كومەكتى ءبولۋ ۇدەرىسىندە حالىقارالىق ۇيىمداردىڭ ناقتى كومەك قولىن سوزاتىنىنان ۇمىتتەنەتىنىن جەتكىزدى. ۋكراينا تاراپى قازاقستان حالقىنا كورسەتىلگەن كومەگى ءۇشىن شىن كوڭىلدەن شىققان ريزاشىلىقتارىن ءبىلدىردى. اتاپ ايتقاندا, لۋگانسك وبلىستىق مەملەكەتتىك اكىمشىلىگى باسشىسىنىڭ ورىنباسارى ۆلاديمير گريتسيشين بىلاي دەپ اتاپ ءوتتى: «ريزاشىلىق سەزىمى ەرنەۋىنەن اسىپ-توگىلىپ تۇر. قازاقستان پرەزيدەنتى نۇرسۇلتان نازارباەۆقا, قازاق حالقىنا قيىندىقتاردى تۇسىنگەندەرى ءۇشىن ريزاشىلىق بىلدىرگىمىز كەلەدى... ءبىز سىزدەردىڭ كومەكتەرىڭىزگە قۋانىشتىمىز, قازاق حالقىنىڭ قولداۋى بىزگە قازىرگىدەي كۇردەلى كەزەڭدە وتە ماڭىزدى. بۇل ۋكريانالىقتاردىڭ جالعىز ەمەستىگىن, ءوزارا تۇسىنىستىك بار جەردە ءىستىڭ وڭعارىلاتىنىن اڭعارتادى. ءبىز وتە ريزامىز». ءوزىنىڭ ريزاشىلىعىن, سونداي-اق, لۋگانسك وبلىستىق مەملەكەتتىك اكىمشىلىگى باسشىسىنىڭ ورىنباسارى ولگا ليشيك تە ءبىلدىردى: «بۇگىن ۋكراينا قازاقستان رەسپۋبليكاسىنان قايىرىمدىلىق كومەگىن الىپ وتىر, بۇل ءبىز ءۇشىن, ونىڭ ىشىندە قازىرگى كەزدە بەلسەندى ۇرىس-قيمىلدارى جۇرگىزىلىپ جاتقان, بەيبىت تۇرعىندار زارداپ شەگىپ وتىرعان ءبىزدىڭ دونەتسك جانە لۋگانسك وبلىستارى ءۇشىن ايتارلىقتاي قولداۋ بولىپ تابىلادى. وسىنداي كومەككە باستاماشىلىق تانىتقانى ءۇشىن نۇرسۇلتان نازارباەۆقا العىسىمدى بىلدىرەمىن», دەدى ول. 2014 جىلدىڭ 6 قازانىندا قازاقستان رەسپۋبليكاسى ۇكىمەتىنىڭ تاراپىنان ۋكراينانىڭ گۋمانيتارلىق قاجەتتىلىكتەرى ءۇشىن حالىقارالىق قىزىل كرەست كوميتەتىنە 30 000 اقش دوللارى كولەمىندە اتاۋلى مۇشەلىك جارنا اۋدارىلعان بولاتىن.