فوتو: gov.kz
«وتكەن جىلى تابيعاتتى قورعاۋ ۇيىمدارى ءۇشىن شامامەن 9 ملرد تەڭگەگە 25 ءورت ءسوندىرۋ ماشيناسى, 51 شاعىن ورمان ءورت ءسوندىرۋ كەشەنى, 154 تراكتور, 73 پاترۋلدىك كولىك جانە 655 بىرلىك ءورت ءسوندىرۋ تەحنيكاسى (ديسكىلى تىرمالار, سوقالار, تىركەمەلەر جانە ت.ب.) ساتىپ الىندى», دەدى ەرلان نىسانباەۆ.
ءمينيستردىڭ حابارلاۋىنشا, جەرگىلىكتى اتقارۋشى ورگاندار جالپى سوماسى 6,6 ملرد تەڭگەگە 20 ءورت ءسوندىرۋ ماشيناسى, 127 تراكتور جانە 76 پاترۋلدىك كولىك ساتىپ العانىن اتاپ ءوتتى. سونداي-اق وسى ۋاقىتقا دەيىن ورمان شارۋاشىلىعىن ماتەريالدىق-تەحنيكالىق جاراقتاندىرۋعا مۇنداي كولەمدە قاراجات بولىنبەگەنىن تىلگە تيەك ەتتى.
«بيىلعى جازدا سەمەي ورمانىندا الاپات ءورت بولعانىن بارشاڭىز بىلەسىزدەر. ورمان سالاسىنىڭ 15 قىزمەتكەرى ءتىلسىز جاۋدىڭ قۇربانى بولدى. ۇلكەن القاپتا بولعان ءورتتىڭ بىردەن ءبىر سەبەبى تابيعاتتى قورعاۋ جانە ورمان شارۋاشىلىعى مەكەمەلەرىن تەحنيكامەن قامتاماسىز ەتۋدىڭ تومەن دەڭگەيى, اتاپ ايتقاندا 70% دەڭگەيىندە عانا قامتاماسىز ەتىلگەن. ال قولدانىستاعى تەحنيكانىڭ 60%-دان استامى ەسەپتەن شىعارۋعا جاتادى», دەدى مينيستر.
سونىمەن قاتار ورماندى قورعاۋ شارالارىن جۇزەگە اسىرۋ اياسىندا ءورت قاۋپى جوعارى ورمان القاپتارىندا ءورتتى ەرتە انىقتاۋ جۇيەسى ورناتىلادى. وسىعان بايلانىستى مينيسترلىك ورمان مونيتورينگى مەن ءورتى ەرتە انىقتاۋ ءۇشىن احۋالدىق ورتالىق قۇرۋدى جوسپارلاپ وتىر.
قىرمىزى جۇماعاليقىزى,
ەۇۋ ستۋدەنتى
