جەتىسۋ جولى جاقسارا تۇسەدى

مەملەكەت باسشىسى 2022 جىلى وبلىسقا كەلگەن ساپارىندا وبلىس اكى­مىنە ءۇش جىل ىشىندە اپاتتى 15 كوپىرگە كۇردەلى جوندەۋ جۇمىسىن جۇرگىزۋدى, سونىمەن قاتار بالقاش كولىنە دەيىنگى اۆتوموبيل جولدارىن جون­دەۋ جۇمىسىن اياقتاۋدى تاپسىرعان ەدى.

«بىلتىر وبلىستىق ماڭىزى بار اۆتوجولداردىڭ بويىنا ورنالاسقان 5 كوپىرگە كۇردەلى جوندەۋ جۇمىسى باس­تالىپ, 2 كوپىر پايدالانۋعا بەرىلسە, 3-ەۋى بيىل قولدانىسقا بەرىلەدى. 10 كوپىردىڭ قۇجاتىنا قايتا تۇزەتۋلەر ەنگىزۋ بو­يىنشا جۇمىس جۇرگىزىلىپ جاتىر», دەيدى وبلىستىق جولاۋشى كولىگى جانە اۆتوموبيل جولدارى باسقارماسىنىڭ باسشىسى عالىمجان دارىباەۆ.

سول ساپارىندا مەملەكەت باسشىسى وبلىستىڭ تۋريستىك كلاستەرىن دامىتۋ ماقساتىندا ىسكە اسىرىلاتىن بالقاش كولىنىڭ جاعاسىنا اپاراتىن 137 شاقىرىم اۆتوجولدى قايتا جاڭارتۋ جۇمىسىنا دا نازار اۋدارعان. «الماتى – وسكەمەن – لەپسى – اقتوعاي» اۆتوجولىنىڭ قۇرىلىسىن «جول» جشس, «لەپسى – بالقاش كولى» اۆتوجولىنىڭ قۇرىلىسىن «قازسترويتسەنتر» جشس جۇرگىزىپ جاتىر. بۇگىندە اسفالت-بەتون جابىنىن توسەۋ تولىعىمەن اياقتالىپ, جول بويىن اباتتاندىرۋ جۇمىسى باس­تالدى. بيىلعى شومىلۋ ماۋسىمىنا دەيىن جول قۇرىلىسى تولىعىمەن اياقتالادى دەپ كۇتىلىپ وتىر.

اۆتوجولداردى قىسقى كۇتىپ ۇستاۋ دا – وزەكتى ماسەلە. بىلتىر جەرگىلىكتى بيۋدجەتتەن قوماقتى قارجى قاراستىرىلىپ, جول قاۋىپسىزدىگىن قامتاماسىز ەتۋ ماقسا­تىن­دا جەرگىلىكتى 8 مەكەمە, 84 مەردىگەر ۇيىم جۇمىس اتقاردى. وبلىستىڭ مارشرۋتتىق جەلىسى 72 اۆتوبۋس باعىتىن قامتيدى. وعان 18 تاسىمالداۋشى, 330 جىلجىمالى قۇرام قىزمەت كورسەتەدى. سونداي-اق 31 الەۋمەتتىك ماڭىزى بار قاتىناس تيەسىلى. ولاردىڭ ءبارى جەرگىلىكتى كاسىپكەرلىك نىساندارى ارقىلى جۇزەگە اسادى.

وسى تۇستا قوعامدىق كولىكتە كوپبا­لالى انالارعا جەڭىلدىك بەرىلگەنىن, ستۋدەنتتەر مەن وقۋشىلاردىڭ وبلىس ورتالىعىنىڭ قالاىشىلىك باعىتتارىندا تەگىن جول جۇرەتىنىن دە ايتا كەتەيىك. كورۋ جانە ەستۋ قابىلەتى بۇزىلعان I جانە II توپتاعى مۇگەدەكتىگى بار تۇلعالارعا, اۋعان-تاجىك سوعىسىنىڭ جانە تاۋلى قاراباق سوعىسىنىڭ ارداگەرلەرىنە وتكەن جىلى 600 تەگىن جول ءجۇرۋ بيلەتى ۇلەستىرىلسە, بيىل 735 بيلەت ۇسىنىلدى. بۇل دا وتاندىق كاسىپكەرلەردىڭ تۇرعىندارعا كورسەتكەن ۇلكەن قولداۋى. «الماتى – ءۇشارال – الماتى», «استانا – ءۇشارال – استانا», «تالدىقورعان – ءۇشارال – تالدىقورعان» باعىتىنداعى اۋە جولدارىندا «سكات», «قازاق ەير» سياقتى وتاندىق كومپانيالار جولاۋشىلاردى تاسىمالدايدى.

بىلتىردان بەرى «مويىنتى – دوستىق» تەمىرجول ۋچاسكەسىنىڭ ەكىنشى جولىنىڭ قۇرىلىسى باستالدى. وبلىس اۋماعىنان وتەتىن ۋچاسكەنىڭ ۇزىندىعى – 451 شاقىرىم. ينۆەستيتسيا كولەمى 293 ملرد تەڭگەنى قۇرايدى. وسى جوبانىڭ قۇرىلىس جۇمىسىن وتاندىق كومپانيالار اتقارسا, جۇمىسشىلارى – جەر­گىلىكتى تۇرعىندار. پايدالانۋعا بەرىل­گەن سوڭ دا جەرلەستەرىمىز جۇمىسقا ورنا­لاسپاق.

وبلىستىق جولاۋشى كولىگى جانە اۆتوموبيل جولدارى باسقارماسىنىڭ اقپاراتىنشا, وبلىستىق ماڭىزى بار اۆتوجولداردىڭ قۇرىلىسى مەن جوندەۋ جۇمىسىنا «جول» جشس, «ابز كارەر درسۋ» جشس, «الاكول جولدارى» جشس, «تالدىقورعان جولدارى» جشس, «قازقۇرىلىسورتالىعى» جشس, «گوردورستروي» جشس جانە باسقا دا جەرگىلىكتى كومپانيالار اتسالىسادى. جول قۇرىلىسىنا وتاندىق كاسىپورىندار وندىرگەن ماتەريالدار قولدانىلادى.

«مەردىگەر ۇيىمداردىڭ ورىندايتىن جۇمىس ساپاسىن باقىلاۋ باسقارما, مەردىگەر مەكەمە, تەحنيكالىق قاداعالاۋ, اۆتورلىق باقىلاۋ جانە «جول اكتيۆ­تە­رىنىڭ ۇلتتىق ساپا ورتالىعى» رمك في­ليا­لىنىڭ قاتىسۋىمەن جۇزەگە اسادى. وتكەن جىلدان باستاپ ورتاشا جوندەۋ جۇمىسىنا تەحنيكالىق قاداعالاۋ ۇيىمدارى قاتىستىرىلدى. بۇدان بولەك, اۋداندىق ماڭىزى بار جولدار مەن ىشكى كوشەلەردىڭ تەحنيكالىق قۇجاتتاماسى ۇلتتىق ساپا جول اكتيۆتەرى ورتالىعى ارقىلى تەكسەرىستەن ءوتىپ, ۆەدومستۆولىق ساراپتامانىڭ قورىتىندىسىن الادى. بۇل ءوز كەزەگىندە جوبانىڭ نەگىزسىز قىمباتتاۋىنىڭ جولىن كەسەدى», دەيدى ع.دارىباەۆ

جەتىسۋ وبلىسى