الەكساندرا – ورىس, رومان – كورەي ۇلتىنىڭ وكىلى, ەكەۋى دە – كاسىبي فوتوگراف. وسىدان ەكى جىل بۇرىن شاڭىراق كوتەرگەن جاس وتباسى ۇيدە جاڭا جىل, ناۋرىز, پاسحا ءتارىزدى ءداستۇرلى مەرەكەلەردىڭ ءبارىن اتاپ وتەتىندەرىن ايتادى.
«داستارقان ۇستىنەن كورەي حالقىنىڭ ءبالىشى پيگودي مەن كۇرىش ۇنىنان پىسىرىلگەن قىتىرلاق نانى كاديۋري ۇزىلمەيدى. ويتكەنى بۇلار – روماننىڭ ەڭ جاقسى كورەتىن تاعامدارى. كۇندەلىكتى ورىس اسحاناسىنا ءتان تاعامداردى دا ازىرلەيمىن. ال مەرەكە كۇندەرى مىندەتتى تۇردە ەت اسىپ, باۋىرساق پىسىرەمىز», دەيدى الەكساندرا.
پلاتوننىڭ 1 جاسقا تولۋ قۋانىشىنا ەرلى-زايىپتىلاردىڭ جاقىن تۋىستارى مەن جورا-جولداستارى شاقىرىلدى. داستارقان جايىلىپ, ورتاعا ەت كەلگەن سوڭ, جاس وتباسىنىڭ جاراسىمدى تۇرمىسى دارىپتەلىپ, اق تىلەكتەردىڭ تيەگى اعىتىلدى. وتباسى قۋانىشىنىڭ ەڭ قىزىقتى ءساتى بالانىڭ تۇساۋىن كەسەتىن كەزدە باستالدى.
ء«وزىم كاسىبي فوتوگراف بولعان سوڭ, جۇرت وتباسىلىق جيىن-تويلارعا ءجيى شاقىرادى. ماعان اسىرەسە تۇساۋكەسەر ءراسىمىن فوتوسۋرەتكە ءتۇسىرۋ قاتتى ۇنايتىن. اق كىلەمنىڭ ۇستىندە اياعىن اپىل-تاپىل باسىپ كەلە جاتقان ءسابيدى سۋرەتكە تۇسىرگەننەن ارتىق ەشتەڭە جوق. قازاقتىڭ تۇساۋكەسەر ءداستۇرىنىڭ ۇناعانى سونشالىق, تۇرمىسقا شىققان سوڭ, ءوزىمنىڭ دە كىشكەنتاي بوپەمنىڭ تۇساۋىن كەستىرەمىن دەپ شەشتىم. بۇگىن, مىنە, سول قۋانىشىمىزدى اتاپ ءوتىپ جاتىرمىز. تۇساۋكەسەر ءداستۇرىنىڭ ءمانى تەرەڭدە. تاڭەرتەڭ ءبىز قوناقتارىمىزعا «اسياندي» اسىن بەردىك. كورەي حالقىندا بالانىڭ ەڭ العاشقى تۋعان كۇنىن اسياندي دەپ اتايدى, ءداستۇر بويىنشا ونى ساعات ون ەكىگە دەيىن وتكىزۋ كەرەك. «ا» – بالا, «سياندي» تۋعان كۇن دەگەن ۇعىمدى بىلدىرەدى», دەيدى پلاتون باتىردىڭ اناسى.
اتا-اناسى ءسابيدىڭ تۇساۋىن وسى كىسىدەي سابىرلى, ەلگە قادىرلى, باي بول دەپ ىرىمداپ, روماننىڭ ەڭ ۇلكەن اعاسىنا كەستىردى. ودان كەيىن شاشۋ شاشىلدى. رومان مەن الەكساندرا بالانى ەكى جاعىنان جەتەلەپ, اق كىلەمشەنىڭ ۇستىمەن الىپ ءوتىپ, اق جولعا سالدى. كىلەمشەنىڭ ەكىنشى باسىنا وتىرا كەتكەن پلاتون شاشىلىپ جاتقان زاتتاردىڭ ىشىنەن اۆتوكولىك كىلتى مەن تەننيس دوبىن تاڭداپ الدى.
«مەن ەلىمدى, تۋىپ-وسكەن قالامدى وتە جاقسى كورەمىن. ۇلىمنىڭ دا العاشقى تۋعان كۇنى مەن تۇساۋكەسەرىن وسى بالامنىڭ الدى اشىق, جولى جەڭىل بولسا ەكەن, ەلىمىزدى بىرلىك-ىنتىماعىنان, بۇگىنگى بەرەكەسىنەن ايىرماسا ەكەن دەپ ىرىمداپ, حالىق بىرلىگى مەرەكەسىنە ورايلاستىرىپ وتكىزدىك», دەيدى الەكساندرا.
قوستاناي وبلىسى
