ءىرى كاسىپورىندار ءۇي سالىپ بەرەدى

وڭىرگە جۇمىس ساپارىمەن كەلگەن پرەمەر-ءمينيستردىڭ ورىنباسارى قانات بوزىمباەۆ وسىنداي ىزگى نيەت تانىتقان بىر­قاتار الپاۋىت كومپانيانىڭ وكىل­دەرىمەن جۇزدەسىپ, «ADD Capital» حول­دينگىنىڭ نەگىزىن قالاۋشى دانيار ابىل­عازين, «ERG» كومپانياسى ديرەكتورلار كەڭەسىنىڭ مۇشەسى شۋحرات يبراگيموۆ, «الليۋر» جانە «اگروماشحولدينگ» كومپانيالارى ديرەكتورلار كەڭەسىنىڭ توراعاسى اند­رەي لاۆرەنتەۆ, سونداي-اق «RG Brands» باس­قارما توراعاسى تيمۋر قالتاەۆ ءتارىزدى كاسىپك­ەرلەرمەن جۇزدەسىپ, ولاردى الدا ات­قا­رى­لاتىن جۇمىس كولەمىمەن تانىس­تىردى.

قوستاناي, ارقالىق قالالارى مەن امانگەلدى, جانگەلدين, قاراسۋ, قوستاناي اۋداندارىندا جاريالانعان جەرگىلىكتى اۋقىمداعى توتەنشە جاعداي ءالى كۇشىن جوي­عان جوق. وڭىردەگى 2 ەۆاكۋاتسيا پۋنك­تىن­دە 160 ادام تۇرىپ جاتىر. ولارعا تابي­عي اپاتتان كەلگەن شىعىندى وتەۋ, ونىڭ ىشىندە سۋ استىندا قالعان ساياجاي با­سپاناسى ءۇشىن وتەماقى تولەۋ ءتارتىبى ءتۇسىندىرىلدى.

التىنسارين اۋىلىندا 300 ءۇيدىڭ 151-ىنە سۋ كىرگەن. 52 ءۇي قالپىنا كەلتىرۋگە جارامايدى. ەندى بۇل ۇيلەردىڭ ورنىنا جاڭا ءۇي سالىنادى نەمەسە حالىقتىڭ قالاۋىمەن باسقا جەردەن پاتەر بەرىلەدى. قازىردىڭ وزىندە وبلىس ورتالىعىنان جاڭا پاتەر الۋعا 30 تۇرعىنمەن كەلىسىمشارت جاسالعان. تۇرعىندارعا كاسىپكەر دانيار ابىلعازيننىڭ «ايالا» قورى كومەك كورسەتىپ جاتىر. د.ابىلعازين قوستاناي اۋدانى مەن ارقالىق قالاسىنداعى 65 وتباسىنا 1,5 ملرد تەڭگە جەكە قاراجاتىنا پاتەر ساتىپ الىپ بەرگەن. مۇنىڭ سىرتىندا, «دەمەۋ» قورىنا تاعى 500 ملن تەڭگە اۋدارادى.

«التىنسارين اۋىلىندا جارتىلاي سۋ استىندا قالعان ءۇيىمدى كوميسسيا تۇرۋعا جارامسىز دەپ تانىدى. بىزگە بىردەن كومەك كورسەتىلىپ, قاجەت دۇنيەنىڭ بارىمەن قامتاماسىز ەتتى. ءۇش بالام بار, بۇگىن, مىنە, جاڭا ۇيدەن ءۇش بولمەلى پاتەر بەرىلىپ جاتىر. قاتتى قۋانىپ تۇرمىز. وسىنداي قيىن ساتتە قاسىمىزدان تابىلعان ۇكىمەت ادامدارىنا العىسىمىز شەكسىز» دەيدى قوستاناي وبلىسىنىڭ تۇرعىنى اسەم كامالوۆا.

جالپى, وبلىس تۇرعىندارىنان بىرجولعى تولەم الۋعا 3 مىڭنان اسا ءوتىنىش كەلىپ تۇسكەن. بۇگىندە 2 مىڭعا جۋىق وتباسىنا 705,2 ملن تەڭگە كولەمىندە قارجىلىق كومەك كورسەتىلدى. زارداپ شەككەن ازاماتتاردىڭ بارىنە 100 اەك كولەمىندە وتەماقى تولەۋ – اكىمدىكتەر مەن ءماسليحاتتاردىڭ قۇزىرىندا. سونداي-اق سۋ تاسقىنىنان زارداپ شەككەن تۇرعىندار جوعالعان نەمەسە ب ۇلىنگەن مۇلكى ءۇشىن 150 اەك-كە دەيىنگى مولشەردە وتەماقى الۋعا قۇقىلى. مۇنداي م ۇلىكتەر تىزىمىنە تاماق ساقتاۋعا جانە دايىنداۋعا ارنالعان زاتتار, ءاسۇي جيھازى, جاتىن جيھاز, ازاماتتاردى اقپاراتتاندىرۋ قۇرالدارى, سۋمەن جابدىقتاۋ جانە جىلىتۋ قۇرالدارى كىرەدى. ۆيتسە-پرەمەر ارنايى كوميسسيالارعا سۋ تاسقىنىنان كەلگەن شىعىندى باعالاۋ جۇمىسىن 10 مامىرعا دەيىن اياقتاۋدى تاپسىردى. ەڭ باس­تىسى, جەرگىلىكتى اتقارۋشى بيلىك كۇن سۋىت­پاي تۇرىپ ءۇيسىز قالعان جۇرتتىڭ ءبارىن جايلى باسپانامەن قامتاماسىز ەتۋى كەرەك.

قورىتا ايتقاندا, ءىرى كاسىپكەرلەر ءوڭىر تۇرعىندارىنا 378 ءۇي ساتىپ الىپ بەرەدى جانە 638 ۇيگە جوندەۋگە كومەكتەسەدى.

«مۇنداي قيىن ۋاقىتتا بيزنەس وكىلدەرى الەۋمەتتىك جاۋاپكەرشىلىك دەگەن ۇعىمدى شىنداپ سەزىنۋگە ءتيىس. قوستاناي وبلىسىندا ءبىزدىڭ بىرنەشە كاسىپورنىمىز بار. قىزمەتكەرلەرىمىز تابيعي اپاتقا قارسى كۇرەسكە, اۋىل تۇرعىندارىن, اتاپ ايتقاندا, بالالاردى سۋ باسۋ ايماعىنان شۇعىل ەۆاكۋاتسيالاۋعا بەلسەندى تۇردە قاتىستى. ارقالىق ماڭىنداعى اۋىلدارعا بوگەتتەر سالۋ ءۇشىن ارنايى تەحنيكا جىبەردىك. باسپاناسىز قالعان جاندار ءۇشىن ءبىز دا­يىن باسپانا ساتىپ الامىز», دەدى ERG كومپانياسىنىڭ وكىلى شۋحرات يبراگيموۆ.

«Eurasian Resources Group» كومپانيا­سىنىڭ اكتسيونەرلەرى سۋ تاسقىنىنىڭ العاشقى كۇندەرىندە 400 ملن تەڭگە, سونداي-اق اپات سالدارىن جويۋعا جانە تۇرعىندارعا قولداۋ كورسەتۋگە 40 ملرد تەڭگە قارجى بولگەنىن ايتا كەتكەن ءجون. اتالعان قاراجات جول سالۋعا, ينجەنەرلىك ينفراقۇرىلىمدى قايتا جاڭعىرتۋعا جانە مەكتەپتەردى كۇردەلى جوندەۋدەن وتكىزۋگە جۇمسالادى.

كاسىپكەر اندرەي لاۆرەنتەۆ تە تاسقىن زاردابىن جويۋعا 3 ملرد تەڭگە بولەتىنىن ايتتى. بۇل قارجىعا 140 ءۇي سالىنادى نەمەسە 96 پاتەر ساتىپ الىنادى. سونداي-اق 400 ءۇي كۇردەلى جوندەۋدەن وتەدى. ا.لاۆرەنتەۆ باسقاراتىن كومپانيا بۇعان دەيىن اپاتقا قارسى كۇرەس شارالارىن قولداۋ ماقساتىندا «دەمەۋ قازاقستان قورىنا» 500 ملن تەڭگە اۋدارعان ەدى.

«بىرلىكتىڭ كۇشى ادەتتە وسىنداي قيىندىقتا تانىلادى. قوستاناي وبلىسىندا سۋ تاسقىنى باستالعاندا مىڭنان اسا قىزمەتكەرىمىز اكىمدىك پەن ارنايى قىز­مەتتەردىڭ ماماندارىمەن بىرگە دامبىلاردى كۇشەيتۋمەن اينالىسىپ, تۇرعىنداردى ەۆاكۋاتسيالىق پۋنكتتەرگە جەتكىزۋگە كومەكتەستى. قوستاناي – ءوزىمىزدىڭ تۋعان ولكەمىز, ءبىزدىڭ بارلىق كاسىپورىندارىمىز وسىندا. بولىنگەن قاراجاتقا پاتەرلەر ساتىپ الىنادى, ءۇي سالىنادى. ءبىز مەملەكەت باسشىسىنىڭ ۇندەۋىن تولىق قولدايمىز جانە ۇكىمەتپەن بىرلەسە وتىرىپ وزىمىزگە جۇكتەلىپ وتىرعان مىندەتتى ابىرويمەن اتقارىپ, اياعىنا دەيىن جەتكىزەمىز دەگەن ويدامىن», دەدى ا.لاۆرەنتەۆ.

«RG Brands» كومپانياسى دا وڭىردە تۇرعىن ءۇي سالۋعا جانە ۇيلەردى قالپىنا كەلتىرۋگە 1,46 ملرد تەڭگە بولمەك.

قوستاناي وبلىسى