«جانۇيا» بالالار ۇيىندە بۇگىندە 7 تاربيەشىنىڭ قاراۋىندا 3 جاس پەن 18 جاس ارالىعىنداعى 45 بالا تۇرىپ جاتىر. ولاردىڭ تورتەۋى كوللەدجدە وقىپ ءجۇر. ولاردىڭ اراسىندا سپورت, ونەر سالاسىندا جاقسى جەتىستىكتەرگە جەتىپ, جوعارى ناتيجدە كورسەتىپ جۇرگەن تالانتتى جاستار دا بار.
«ەرگاشۆوي ەرماتوۆيچ باستاعان ەتنوبىرلەستىك وكىلدەرى بىزگە ءجيى كەلىپ, دەمەۋشىلىك كومەك كورسەتىپ تۇرادى. مىسالى, وتكەن جولى كوپتەگەن ازىق-ت ۇلىك, جەمىس-جيدەك, كوكونىستەر اكەپ بەرىپ كەتتى. ول كىسىنىڭ ءبىر كەلگەنى بالالار ءۇشىن ۇلكەن مەرەكە, ءبارى قۋانىسىپ, ءماز بولىپ قالادى. تاۋەلسىزدىك كۇنى قارساڭىندا دا ارنايى كەلىپ, بالالارمەن اڭگىمەلەسىپ, جاعدايىمىزدى سۇراپ, تاجىك-وزبەك ۇلتىنىڭ اتىنان سالەم-ساۋقاتىن بەرىپ كەتتى. ۇنەمى جانىنا ءبىراز ادامداردى ەرتىپ كەلىپ, وسىندا داستارقان جايىپ, شىعىس تاعامدارىنىڭ مەرەكەسىن جاساپ كەتەدى. تاشكەنتتەن كەلگەن حوش ءيىستى قاۋىن-قاربىز, جەمىستەردەن دە جىل سايىن ءبىزدىڭ بالالار ءبىرىنشى بولىپ ءدام تاتادى», دەيدى بالالار ءۇيىنىڭ باسشىسى ايناش جاقانوۆا.
«شارق» ءسوزىنىڭ قازاقشا بالاماسى شىعىس دەگەندى بىلدىرەدى. اتالعان ۇلتتىق ورتالىق جىلدا قالا ورتالىعىندا ۇيىمداستىرىپ تۇراتىن ءداستۇرلى تاجىك-وزبەك مادەنيەتىنىڭ دۋماندى كۇندەرى دە شىرايلى شىعىستىڭ بۇتىندەي ءبىر شاھارىن كوشىرىپ اكەلگەندەي وتە اسەرلى وتەدى. مۇندايدا مەرەكە الاڭىنا وزبەك, تاجىك حالىقتارىنىڭ ءدامى ءتىل ۇيىرەتىن ءداستۇرلى تاعامدارىنان مول داستارقان جايىلىپ, اينالانى سازدى مۋزىكا مەن كەرنەي اۋەنى كەرنەپ كەتەدى. قالا تۇرعىندارى كوزدىڭ جاۋىن الاتىن نەشە ءتۇرلى قولونەر بۇيىمدارىن تاماشالاپ, ايگىلى قوجا ناسىر مەن بابا ديحاندى قىزىق كورىپ, بىرگە فوتوسۋرەتكە ءتۇسىپ شاتتانىسىپ جاتادى.
«تاجىك-وزبەك ەتنومادەني ورتالىعىنا توراعالىق ەتكەن جيىرما ءبىر جىلدىڭ ىشىندە وسى وڭىردە كوپتەگەن يگى جۇمىستى اتقاردىق. 2006 جىلدان بەرى قاراي قازاقستان حالقى اسسامبلەياسىنىڭ مۇشەسىمىن. ءبىزدىڭ دوستىق ۇيىندە 18 مادەني ورتالىق بار. ءبىر-بىرىمىزبەن وتە جاقسى, تاتۋ تۇرامىز. «جانۇيا» بالالار ءۇيىن قامقورلىققا العانىمىزعا بيىل 21 جىل بولادى. «جەتىم كورسەڭ, جەبەي ءجۇر» دەگەن دانا ءسوز بار ەمەس پە, وسى يگى ىسكە ۇنەمى ءار جەردەگى كاسىپكەرلەردى دەمەۋشىلىككە تارتىپ, بالالارعا قۋانىش سىيلاپ وتىرۋدى داستۇرگە اينالدىردىق. بۇل ىستە بىزگە ۇلكەن قولداۋ كورسەتىپ جاتقان ابۋكاحور سافاروۆ, فاتوح ۆوسيەۆ سياقتى جىگىتتەرىمىز تاجىكستانعا ءجيى بارىپ تۇرادى. ول جاقتان ۇلتتىق قولونەر تۋىندىلارىن, ۇلتتىق مۋزىكا اسپاپتارىن, ودان وزگە دە قىزىقتى جادىگەرلەر الا كەلەدى. وسى وڭىرگە بەلگىلى اگروونەركاسىپ سالاسىنىڭ وكىلى, قازاقتىڭ ۇنى مەن سۇيىق مايىن ەكسپورتتاپ جاتقان «مەلاگروپروم» سەرىكتەستىگىنىڭ قۇرىلتايشىسى, ءىرى كاسىپكەر باۋىرىمىز تاليب ساناقۇلوۆ, «كوستانايسكيە زوري» حورەوگرافيالىق ءانسامبلىنىڭ ءبيشىسى تاحير شەرمەتوۆ سىندى ازاماتتار قايىرىمدىلىق شارالارىنا دەمەۋشىلىك جاساپ, ءبىزدىڭ باستامالارىمىزدى ۇنەمى قولداپ وتىرادى. قازاق حالقىندا «بىرلىك بار جەردە تىرلىك بار» دەيدى عوي, ءبارىمىز ءبىر جاعادان باس كوتەرىپ, قانداي مىندەت بولسا دا بىرىگىپ اتقارىپ جاتىرمىز. مىسالى, ەلدى ابىگەرگە سالعان سۋ تاسقىنىنا دا تاجىك-وزبەك بولىپ باس قوسىپ, ارقالىققا ون شاقتى جىگىتتى قول كومەككە جىبەردىك. وتكەندە شىمكەنتتەن ەكى جۇك كولىگى گۋمانيتارلىق كومەك الىپ كەلىپ ەدى, بۇگىن وزبەكستاننان گۋمانيتارلىق كومەك جەتتى. ونى جاڭا عانا قوستانايداعى گۋمانيتارلىق كومەك تاراتۋ پۋنكتىنە تۇسىردىك. ەندى ءبارىمىزدىڭ ماقساتىمىز ءبىر عوي. بىرلىگىمىز اجىراماسىن, سوعىس دەگەن پالە ەشقاشان توبەمىزدەن تونبەسىن. وسى ەلدىڭ ىنتىماعى ىدىراماسىن», دەيدى ەرگاشۆوي اعا.
جازدىڭ جايماشۋاق كۇندەرىنىڭ بىرىندە «شارق» ۇلتتىق ورتالىعىنىڭ ۇيىمداستىرۋىمەن وتەتىن ءارى قوستانايلىقتار ءۇشىن داستۇرگە اينالىپ كەتكەن مەرەكەنىڭ ءبىرى – «قاۋىن-قاربىز كۇنى» فەستيۆالى. فەستيۆال بارىسىندا قاۋىن-قاربىز كورمەسى اشىلىپ, قاۋىن-قاربىز جەۋدەن جانە قاربىز ءدانىن تەرۋدەن كوڭىلدى جارىستار باستالادى. ەرگاشۆوي اعانىڭ ايتۋىنشا, قاۋىن-قاربىز كۇنى وزبەكستاندا جىل سايىن اتالىپ ءوتىپ تۇرادى. مۇنداي مەرەكە اياسىندا وتەتىن قىزىقتى سايىستارعا ەرەسەكتەرمەن قاتار, بالاباقشا جاسىنداعى بۇلدىرشىندەر دە قاتىسىپ, ءتۇرلى سىيلىقتار ۇتىپ الىپ قۋانىسىپ جاتادى.
«جالپى, ەرگاشۆوي ەرماتوۆيچ بىزدە بۇرىننان جۇمىس ىستەپ كەلە جاتقان كىسى عوي. ول كىسىنى وسى اسسامبلەيانىڭ اينالاسىنا توپتاسقان ءتۇرلى ۇلتتىق بىرلەستىكتەردىڭ اقساقالى دەسەك تە بولادى. وسى وڭىردە ءوتىپ جاتقان ءتۇرلى مادەني-بۇقارالىق, قايىرىمدىلىق ءىس-شارالارىنا جان سالا اتسالىسىپ, ۇنەمى شاپقىلاپ جۇرەدى. وبلىستاعى ەكى بىردەي بالالار ۇيىنە ءجيى بارىپ, جىل بويى قايىرىمدىلىق ءىس-شارالارىن وتكىزىپ تۇرادى. مۇنىڭ سىرتىندا, سۋ تاسقىنى كەزىندە ەرگاشۆوي اعامىزدىڭ ارقاسىندا ەلىمىزدىڭ وڭتۇستىك وڭىرلەرىنەن كوپتەگەن گۋمانيتارلىق كومەك قابىلداپ الىپ, حالىققا تاراتىپ بەردىك», دەيدى دوستىق ءۇيىنىڭ باسشىسى ناتاليا رامازانوۆا.
قوستاناي وبلىسى
