كوپبالالى انا ءمادينا ابىلعازيەۆانى وسىدان ەكى-ءۇش جىل بۇرىن قىزىلجۇلدىز اۋلىنىڭ تۇرعىندارى بالا سانى تولماي جاتقان جەرگىلىكتى مەكتەپتى ساقتاپ قالۋ ءۇشىن ارنايى شاقىرتىپ العان. بولاشاعى ب ۇلىڭعىرلاۋ بولىپ, جابىلىپ قالايىن دەپ تۇرعان ءبىلىم وشاعىنا ءمادينانىڭ ءوزى مۇعالىم, جولداسى وت جاعۋشى بولىپ ورنالاسادى. بۇعان قوسا ءتورت بالاسى بىردەي وسى مەكتەپتىڭ وقۋشىسى اتانىپ, سيرەپ قالعان بالالاردىڭ قاتارىن كوبەيتەدى. جاڭا ورىنعا ءبىرجولا تۇراقتاپ قالۋدى ۇيعارعان كوپبالالى وتباسى اۋىلدىڭ بايىرعى تۇرعىنىنان 300 مىڭ تەڭگەگە ءۇي ساتىپ الادى. بىراق ونى زاڭداستىرماعان. سول ءۇيى سۋعا كەتكەن ءمادينا امالسىز ارقالىق قالاسىنداعى قوعامدىق شتابقا كەلىپ جۇگىنەدى. شتاب اتقارىپ جاتقان سان-سالالى جۇمىستىڭ ءبىر باعىتى دا وسى: ءمادينا سەكىلدى نە ءۇيى, نە قۇجاتى جوق تۇرعىنداردىڭ قامىمەن زاڭگەرلەرمەن, قايىرىمدى كاسىپكەرلەرمەن سويلەسىپ, مۇقتاج بولىپ قالعان وتباسىلاردى تىعىرىقتان شىعاراتىن جول ىزدەيدى.
نەمىس ۇلتتىق ورتالىعىنىڭ باسشىسى, كاسىپكەر سەرگەي بلوك تا ءمادينانىڭ وتباسىنداعى جاعدايدى وڭىرلىك شتاب ارقىلى ەستىپ بىلگەن. اتىمتاي جومارت كاسىپكەر كوپ ويلانباستان كوپبالالى وتباسىمەن كەزدەسىپ, ارقالىق قالاسىنان ءۇش بولمەلى جايلى پاتەر ساتىپ اپەردى.
«جاعدايىمىزدى ايتىپ, الدارىنا بارعاندا مەسەلىمىزدى قايتارماعان, جان-جاقتى ناقتى كومەك بەرىپ جاتقان وبلىس, قالا باسشىلىعىنا, قايىرىمىن تيگىزىپ, وسىنداي كەڭ ءۇيدى الىپ بەرىپ جاتقان سەرگەي يۆانوۆيچكە زور العىسىمدى بىلدىرەمىن», دەيدى بەس بالانىڭ اناسى م.ابىلعازيەۆا.
قوستاناي وبلىسى
