اتالعان باعىتتاعى اۋقىمدى جۇمىستاردىڭ بارىسىن كوپشىلىككە قۇلاعدار ەتۋ ماقساتىنداعى ءىس-شارالار دا بەلسەندى ءجۇرىپ جاتىر. بۇگىندە وبلىستىڭ التى اۋدانىندا 971 تۇرعىن ءۇي تەحنيكالىق تەكسەرۋدەن ءوتىپ, 356 ءۇي تۇرۋعا جارامسىز دەپ تانىلعان. 615 ءۇيدىڭ جوندەۋگە كەلەتىنى انىقتالىپ وتىر.
ارنايى كوميسسيا ماماندارى قوستاناي قالاسىنىڭ ىرگەسىندەگى ساياجاي بىرلەستىكتەرىن دە ارالاپ, وندا تۇرىپ جاتقان 97 وتباسىنىڭ ءۇي-جايىن تەحنيكالىق تەكسەرىستەن وتكىزىپ جاتىر.
26 ساۋىردە قوستاناي قالاسى اكىمىنىڭ مىندەتىن اتقارۋشى المات يسماعۇلوۆ قالا شەتىندەگى سايدا ورنالاسقان «كولەسنىە ريادى» شاعىن اۋدانىنىڭ تۇرعىندارىمەن كەزدەسىپ, تابيعي اپاتتان كەلگەن شىعىندى وتەۋ تەتىكتەرى مەن ارنايى باعالاۋ كوميسسيالارىنىڭ جۇمىس ءتارتىبىن ءتۇسىندىردى. تاسقىن سۋدان كەلگەن ماتەريالدىق شىعىندى باعالاۋ جانە وتەۋ جونىندەگى كوميسسيا وبلىس ورتالىعىندا 8 ساۋىردەن بەرى كۇن سايىن جۇمىس ىستەپ جاتقانىن ايتا كەتۋ كەرەك.
ارنايى كوميسسيانىڭ مالىمەتىنشە, قالا اكىمدىگى بۇگىنگە دەيىن قالا شەتىندەگى نەمەسە ساياجاي اۋماعىنداعى جالعىز باسپاناسىن سۋ باسقان 210 وتباسىنان ءوتىنىم قابىلداپ العان.
ال قوستاناي اۋدانىندا سۋ كىرگەن 97 ءۇيدىڭ 55-ءى تەكسەرىلگەن. قازىر تۇرعىن ۇيلەردىڭ جوندەۋگە كەلەتىن-كەلمەيتىنى انىقتالىپ, باعالاۋ جۇمىستارى ءجۇرىپ جاتىر. وڭىردە 14 ساۋىردەن بەرى بەلسەندى جۇمىس جۇرگىزىپ جاتقان قوعامدىق شتاب وكىلدەرى دە تاسقىن سۋدىڭ زاردابىن تارتىپ وتىرعان ەلدى مەكەندەردى ارالاپ, حالىقتىڭ تۇرمىسىمەن تانىسىپ, وڭىردە قولعا الىنىپ جاتقان وڭالتۋ شارالارىنىڭ ءتارتىبى مەن رەتىن ءتۇسىندىرىپ ءجۇر.
«قوعامدىق شتاب سۋ تاسقىنى بولعان قوستاناي, ارقالىق قالالارىندا, قوستاناي, امانگەلدى, جانگەلدين اۋداندارىندا بەلسەندى جۇمىس ىستەدى. شتاب قۇرامىندا ءماسليحات دەپۋتاتتارى, جاستار, قوعام بەلسەندىلەرى, جەرگىلىكتى كاسىپكەرلەر, زاڭگەرلەر, ءدىن قىزمەتكەرلەرى, قۇقىق جانە قارجى سالاسىنىڭ ماماندارى بار. ماقسات – تابيعي اپاتتىڭ زاردابىن جويۋ, ەلدىڭ قالىپتى تىرشىلىگىنە ورالۋىنا كومەكتەسۋ جۇمىستارىنىڭ بارىسى جونىنەن حالىقتى حاباردار ەتۋ. بۇگىنگە دەيىن شامامەن 132 ەلدى مەكەندە كەزدەسۋ ۇيىمداستىرىلدى. شامامەن 1 600 اداممەن كەزدەستىك», دەيدى وبلىستىق قوعامدىق شتابتىڭ توراعاسى باتىربەك احمەتوۆ.
ونىڭ ايتۋىنشا, حالىقپەن كەزدەسۋ بارىسىندا قوعامدىق شتاب وكىلدەرى تۇرعىنداردى كوبىرەك مازالايتىن كوكەيكەستى ماسەلەلەردىڭ ءتىزىمىن جاساعان. اپات زاردابىن تارتىپ وتىرعان تۇرعىندار ءۇي-جايىن قالپىنا كەلتىرۋگە بولىنەتىن قارجىنىڭ رەتىن, جوعالعان قۇجاتتارىن رەسىمدەۋ جايىن, گاز, جارىق, ۇيالى بايلانىسپەن قامتاماسىز ەتۋ ماسەلەسىن, مال شىعىنىن وتەۋ, جول جوندەۋ جايىن كوبىرەك قوزعاعان. شتاب وكىلدەرى تۇرعىنداردىڭ ساۋالىنا ورنىقتى جاۋاپ بەرىلىپ, قاجەت بولعان جاعدايدا قۇقىقتىق كەڭەس بەرۋ, ءتۇسىندىرۋ جۇمىستارى جۇرگىزىلىپ جاتقانىن ايتادى.
قوستاناي وبلىسى
