فوتو: كازۇۋ
سالتاناتتى ءىس-شارانى باسقارما مۇشەسى – عىلىمي-يننوۆاتسيالىق قىزمەت جونىندەگى پرورەكتورى ءجاميلا نۇرماتقىزى ايتجانوۆا قۇتتىقتاۋ سوزبەن اشىپ, العاش رەت وتكەن فەستيۆال جۇمىسىنا تابىس تىلەپ, تۇركىتىلدەس ەلدەردىڭ كينو جانە ونەر ماماندىعى بويىنشا ءبىلىم الىپ جۇرگەن ستۋدەنتتەردىڭ ەتنوگرافيالىق دەرەكتى فيلم, كينوەسسە, كينو-باقىلاۋ, پورترەت, ەكسپەريمەنتالدى فيلم, دوكۋفيكشەن, دوكۋمەنتالدى انيماتسيا جانرلارى بويىنشا 70-كە جۋىق تۋىندىلارى قابىلدانعانىن اتاپ ءوتتى.
«تۇركسوي» تۇركى مادەنيەتى ۇيىمى باس حاتشىسىنىڭ ورىنباسارى سايد يۋسۋف اتالعان ۋنيۆەرسيتەتتىڭ 90 جىلدىق مەرەيتويىمەن قۇتتىقتاي كەلە, تۇركى وركەنيەتى ءبىزدىڭ عانا ەمەس, تۇتاس ادامزاتتىڭ وركەنيەتى, سوندىقتان تۇركى تىلدەس مەملەكەتتەر كينوونەرى ارقىلى ءتىلىن, تاريحىن, مادەنيەتىن, سالت-ءداستۇرىن الەمگە تانىتۋى ءتيىس دەپ تۇجىرىمدادى. وش مەملەكەتتىك ۋنيۆەرسيتەتى كينواكادەميا ءبولىمىنىڭ وقىتۋشى-وپەراتورى اكيمباي كاپاروۆ اتالعان فەستيۆالدىڭ جالعاسىن تاۋىپ, ورتالىق ازيادا قاناتىن كەڭگە جايۋىنا تىلەكتەستىك ءبىلدىردى.
ءىس-شارا بارىسىندا جەڭىمپازدار تۇركسوي جانە ءال-فارابي اتىنداعى قازۇۋ اتىنان سىيلىقتار مەن ديپلومدارمەن ماراپاتتالدى. تۇركمەنستان كينوفاكۋلتەتى ستۋدەنتتەرىنىڭ جەتەكشىسى-رەجيسسەر يسكاندەرمۋحامەد اننامۋحامەدوۆ «دۋتار اۋەزى» ءفيلمى ءۇشىن تۇركسوي-دىڭ باس جۇلدەسىن يەلەندى. فەستيۆال نوميناتتارى بويىنشا قازاقستان, تۇركيا, ازەربايجان, وزبەكستان وكىلدەرى جەڭىمپاز اتاندى.
«اقشامداعى قوڭىراۋ» ءفيلمى ءۇشىن قازۇۋ-دىڭ باس جۇلدەسىن العان قىرعىز-تۇرىك ماناس ۋنيۆەرسيتەتىنىڭ ستۋدەنتى ساادات كازاكباەۆا: «ستسەناريمەن ۇزاق وتىردىم. ءفيلمىم جاي عانا ماحاببات تۋرالى ەمەس, جالعىزدىقتى قالاي جەڭىپ شىعۋعا بولاتىن جولدى ىزدەۋ ەدى. ناتيجەسىندە كوپتەگەن جالعىزباستى ادامداردىڭ تاعدىرىن بەينەلەيتىن حيكايا تۋىندادى. ءومىردىڭ ءمانى مەن ماعىناسىن ىزدەگەن جانداردىڭ ءبىرىن-ءبىرى تابۋى باياندالدى. جۇمىسىمدى ادىلقازىلار جوعارى باعالانىنا باقىتتىمىن», دەدى.
ءال-فارابي اتىنداعى قازاق ۇلتتىق ۋنيۆەرسيتەتى ستۋدەنتتەرى دياس يۋسۋفتىڭ «Boyau», ادنان ءال-حاتتابتىڭ «Hasib Untold Story», ولجاس پاۆليكتىڭ «قازۇۋ: تاريح پەن ءبىلىم مەكەنى» اتتى فيلمدەرى ەرەكشە دەپ تانىلدى. 2021 جىلى قازۇۋ-دا اشىلعان «كينو&مەديا» ءبىلىم بەرۋ باعدارلاماسى, شىعارماشىلىق شەبەرلىك, كرەاتيۆتى ءونىم جاساۋعا قابىلەتتى كينو جانە مەديا سالاسىنداعى سۇرانىسقا يە كادرلاردى دايارلاپ جاتىر.
فەستيۆال قوناقتارى مۇرات ەسجان, وتەگەن نارتاي, بەرتىس دياس, اكۋنوۆا ارۋنا, ۋۆالجانوۆا ءاليا سەكىلدى بەلگىلى كينەماتوگرافيستەر ستۋدەنتتەرگە ارناپ شەبەرلىك سىنىپتارىن وتكىزدى. فەستۆيالدىڭ مادەني باعدارلاماسى ءال-فارابي اتىنداعى قازۇۋ كامپۋسىنا, «قازاقفيلم» كينوستۋدياسىنا, الماتى قالاسى مۋزەيلەرىنە تۋرمەن جالعاستى.
كورەرمەننىڭ جۇرەگىنە جول تاپقان بىرقاتار تۋىندىلار تۇركى وركەنيەتىنىڭ ماڭگىلىك قۇندىلىعىنا اينالماق. اتالعان باستاما الداعى جىلدارى جالعاسىن تاۋىپ, دارىندى كينوگەرلەر مەن جاس رەجيسسەرلەردىڭ ونەردەگى العاشقى باسپالداعى بولارىنا سەنەمىز.
