ۇكىمەت باسشىسى: بقو-نى تاسقىن سۋدان ساقتاي الدىق. كەلەسى مىندەت – اتىراۋدى قورعاۋ

ۇكىمەتكە باتىس قازاقستان وبلىسىندا جۇرگىزىلگەن جۇمىستى اتىراۋدا دا جان-جاقتى ۇيىمداستىرۋ تاپسىرىلدى, وندا سۋ تاسقىنىنا قارسى الدىن الۋ ءىس-شارالارىن, جەتكىزىلگەن ينجەنەرلىك تەحنيكالاردى ەسكەرە وتىرىپ, 14 وڭىردەن جۇمىلدىرىلعان اسكەري قىزمەتشىلەر مەن قۇتقارۋشىلار اۋقىمدى شىعىنعا جول بەرمەي, سۋ تاسقىنىن ەڭسەرۋگە مۇمكىندىك بەرگەن ەدى.

بقو-داعى جۇمىسقا 11 مىڭنان استام ادام مەن 2 مىڭعا جۋىق تەحنيكا تارتىلىپ, ۇزىندىعى شامامەن 150 كم بولاتىن قورعانىس بوگەتتەرى سالىندى, 1,3 ملن قۇم تولتىرىلعان قاپشىق توسەلدى.

ورال قالاسىندا 18 تۇرعىن ءۇي الابىن بويلاي تۇرعىزىلعان بوگەتتەر قاۋىپسىزدىكتى تولىق قامتاماسىز ەتىپ, قالانىڭ تۇرعىن ۇيلەرى مەن الەۋمەتتىك نىساندارىنا سۋ جەتكەن جوق. سۋ باسقان باۋ-باقشا سەرىكتەستىكتەرى مەن جايىق وزەنى القابىندا ورنالاسقان بىرقاتار ءۇيدىڭ تۇرعىندارى الدىن الا قاۋىپسىز جەرگە كوشىرىلگەنى ءمالىم. 

باتىس قازاقستان وبلىسى اكىمدىگىنىڭ مالىمەتىنشە, بۇگىندە 909 ءۇيدىڭ تۇرعىندارى ءوز ۇيلەرىنە قايتا ورالدى. 5 مىڭنان استام مال باسى قاۋىپسىز جەرلەرگە ايدالعان.

بۇگىنگى تاڭدا وبلىستىق جەدەل شتاب پەن سۋ تاسقىنى سالدارىن جويۋ جونىندەگى كوميسسيا 8 مىڭعا جۋىق ءوتىنىم جيناپ, مىڭنان استام ۇيگە باعالاۋ جۇمىستارىن جۇرگىزگەن. 1672 وتباسى 100 اەك مولشەرىندە بىرجولعى تولەم الدى. زارداپ شەككەندەرگە كومەك كورسەتۋ جۇمىستارى جالعاسىپ جاتىر.

«سۋ تاسقىنى جاعدايى تۇراقتالىپ كەلەدى. باتىس قازاقستان وبلىسىندا سۋ تاسقىنىنىڭ شارىقتاۋ شەگى بولىپ ءوتتى. مۇندا جۇمىسقا تارتىلعان بارلىق بولىمشەلەردىڭ ۇيلەسىمدى جۇمىسىن اتاپ وتكەن ءجون. بىرلەسكەن ءىس-ارەكەتتەردىڭ ارقاسىندا 84 ەلدى مەكەندى سۋ باسۋعا جول بەرىلمەدى, سونداي-اق وڭىردەگى سۋ تاسقىنى سالدارى بارىنشا ازايتىلدى. قازىر ۇيلەردى قايتادان سۋ باسۋ قاۋپى سەيىلدى», دەگەن ولجاس بەكتەنوۆ توتەنشە جاعدايلار, قورعانىس, ىشكى ىستەر مينيسترلىكتەرى مەن ۇلتتىق قاۋىپسىزدىك كوميتەتىنىڭ جانە جەرگىلىكتى اتقارۋشى ورگانداردىڭ, ۇيىمداردىڭ بارلىق قىزمەتكەرلەرى مەن اسكەري قىزمەتشىلەرىنە, ەرىكتىلەرگە, تاسقىنعا قارسى شارالارعا قاتىسقان بارلىق جاناشىر ازاماتتارعا العىسىن ءبىلدىردى.

بۇگىنگى كۇننىڭ باستى مىندەتى — اتىراۋ وبلىسىن سۋ تاسقىنىنان قورعانۋعا دايىنداۋ. كۇن سايىن جايىق وزەنىنىڭ سۋ دەڭگەيى كوتەرىلىپ كەلەدى. قاۋىپتى بەلگىگە دەيىن شامامەن 100 سم قالدى.

«قازىر ۇلكەن سۋ كولەمى اتىراۋ وبلىسىنا قاراي اعىپ جاتىر, الداعى كۇندەرى شارىقتاۋ شەگى كۇتىلىپ وتىر. بارلىق كۇشتەردى جۇمىلدىرىپ, باسقا وڭىرلەردەن قوسىمشا كۇش تارتقان باتىس قازاقستان وبلىسىنىڭ تاجىريبەسىن پايدالانعان ءجون. سۋ دەڭگەيىنىڭ ساعاتتىق مونيتورينگىن قامتاماسىز ەتىپ, قورعانىس بوگەتتەرىنىڭ ۇزىندىعى مەن بيىكتىگىن ۇلعايتۋ قاجەت. ءبىز ءوڭىردى قورعاپ, سۋ تاسقىنىنا جول بەرمەۋىمىز كەرەك», دەپ اتاپ ءوتتى ۇكىمەت باسشىسى.

بۇگىندە اتىراۋ وبلىسىندا اپاتتىق-قۇتقارۋ جۇمىستارىن جۇرگىزۋ ءۇشىن 13 مىڭنان استام ادام جانە 1 200-دەن استام تەحنيكا جۇمىلدىرىلعان. وڭىردە 500 كم-دەن استام بوگەت سالىندى, ونىڭ ىشىندە اتىراۋ قالاسىنداعى تۇرعىن الاپتاردىڭ بويىندا – 242 كم, 4,8 ملن-نان استام قاپشىقتار پايدالانىلدى. وزەن ساعاسىندا, كاسپي تەڭىزىندە تەرەڭدەتۋ جۇمىستارى جالعاسىپ جاتىر: 1 408 م قازىلىپ, 11 538 م3 توپىراق الىپ تاستالدى.

قورىتىندىلاي كەلە, ۇكىمەت باسشىسى نەگىزىنەن ەل بويىنشا سۋ تاسقىنى قاۋپى سەيىلگەنىن اتاپ ءوتتى.

«پرەزيدەنت تابيعي اپاتتان قيراعان ۇيلەردى قالپىنا كەلتىرۋ, زارداپ شەككەن ازاماتتاردى قالىپتى ومىرگە قايتارۋ بويىنشا باسىم مىندەت قويدى. ءبىز بارلىق كۇش-جىگەرىمىزدى الەۋمەتتىك نىسانداردى, تۇرعىن ۇيلەر مەن ينفراقۇرىلىمدى سالۋعا جانە جوندەۋگە, ادامدارعا وتەماقى تولەۋگە باعىتتاۋىمىز كەرەك. بارلىق اتقارىلاتىن شارالار ناقتى ءارى ۇيلەسىمدى تۇردە جاسالۋى كەرەك. اكىمدىكتەر تۇراقتى ءتۇسىندىرۋ جۇمىستارىن جۇرگىزىپ, زارداپ شەككەن تۇرعىندارمەن كەزدەسۋى كەرەك», دەپ قورىتىندىلادى پرەمەر-مينيستر.