اتالعان فەستيۆالدا «جەر كۇنى – ۇماي» حالىقارالىق مەيرامىنا ارنالعان ۆەلوشەرۋ ۇيىمداستىرىلىپ, اعاش كوشەتتەرى وتىرعىزىلدى. ودان كەيىن اۋماقتى قوقىستان تازارتۋ جۇمىستارى قولعا الىندى. جالپى, ەكوفەستيۆالدىڭ ماقساتى – ەكولوگيالىق قۇندىلىقتار مەن مادەني مۇرانى ناسيحاتتاۋ. ودان بولەك, جەتىسۋ وڭىرىندە ەكولوگيالىق ءتۋريزمدى دامىتۋعا باعىتتالدى.
يگىلىكتى ءىس-شاراعا قالا اكىمى ەرنات ءبازىل قاتىسىپ, ەكو فەستيۆالدى ۇيىمداستىرىپ جاتقان ءاربىر جانعا, تابيعات جاناشىرلارى مەن ەرىكتىلەرگە العىسىن ءبىلدىرىپ, اعاش وتىرعىزۋ راسىمىنە قاتىستى. سونىمەن قاتار وبلىستىق مادەنيەت, ارحيۆ جانە قۇجاتتاما باسقارماسى جانە باسقارماعا قاراستى مەكەمە قىزمەتكەرلەرى دە بەلسەنە قاتىسىپ, اعاش كوشەتتەرىن ەگۋگە جاردەمدەستى. د.راقىشەۆ اتىنداعى فيلارمونيا انشىلەرى كونتسەرتتىك باعدارلامامەن جينالعان قاۋىمنىڭ كوڭىلىن كوتەردى.
ەكوفەستيۆال اياسىندا قاتىسۋشىلارعا قىزىل تاس – تاسباقا تاس پەتروگليفتەرىنە ەكسكۋرسيا جاسالىپ, مادەني ورىننىڭ تاريحى ايتىلدى. اشىق اسپان استىندا ءوڭىر قولونەرشىلەرىنىڭ كورمەسى قويىلدى. ارتىنان ءتۇرلى بايقاۋمەن جالعاسىن تاۋىپ, جينالعان قاۋىمدى ءبىر سەرپىلتىپ تاستادى.
ايتا كەتەيىك, جيىن اياسىندا تاسباقا تاس اۋماعىنا مىڭنان اسا ادام جينالىپ, 200 دانا اعاش كوشەتى وتىرعىزىلدى. قازىر وڭىردە «تازا قازاقستان» رەسپۋبليكالىق ەكولوگيالىق اكتسياسىنىڭ اياسىنداعى «جاسىل ايماق» اپتالىعى باستالدى. ءبىر كۇندە وبلىس كولەمىندە 1400-دەن اسا اعاش وتىرعىزىلدى.
وبلىستىق ەنەرگەتيكا جانە تۇكش باسقارماسىنىڭ مالىمەتىنە سۇيەنسەك, كوگالداندىرۋ شارالارى وبلىستىڭ بارلىق اۋدان-قالاسىندا بەلسەندى جۇرگىزىلىپ جاتىر. بۇگىنگى ءبىر كۇننىڭ وزىندە 1401 ءتۇپ اعاش وتىرعىزىلعان. ولار نەگىزىنەن جاپىراق تۇقىمداس, قىلقانجاپىراقتى جانە جەمىس اعاشتارى.
ماسەلەن, كەربۇلاق اۋدانى سارىوزەك اۋلىندا تۇرعىندار 850 ءتۇپ قاراعاي ەكسە, اقسۋ اۋدانى ەسەبولاتوۆ, قاراسۋ اۋىلدارىندا بارلىعى 150 ءتۇپ الما اعاشى وتىرعىزىلدى. سول سياقتى سارقان اۋدانى المالى, امانگەلدى اۋىلدىق وكرۋگتەرىندە شىرشا, الما, بورتەگۇل اعاشتارى ەگىلدى. بۇدان وزگە اۋدان-قالانىڭ بارلىعى دا اپتالىققا بەلسەندى قاتىسىپ, كوشەت وتىرعىزۋمەن قاتار اعاشتاردىڭ تۇپتەرىن اعارتىپ, پاركتەر مەن سكۆەرلەردىڭ, مەكەمە-ۇيىمداردىڭ اۋماعىنا تازارتۋ جۇمىستارىن جۇرگىزدى. بۇل جۇمىستار اپتا بويى جالعاسادى.
ايتا كەتەيىك, ءوڭىر بويىنشا «قازسۋشار» فيليالى بيىل 173,1 شاقىرىم كانالدى تازارتىپ, 54 گيدروتەحنيكالىق قۇرىلىستى جانە 10 گيدروپوستى جوندەۋدى جوسپارلاپ وتىر. بۇگىندە كانالدىڭ 40 شاقىرىمى تازارتىلدى, 1 گيدروتەحنيكالىق نىسان سالىندى جانە 4-ەۋى جوندەلدى.
سونىمەن قاتار 1060 شارۋا قوجالىعىمەن سۋ بەرۋ تۋرالى كەلىسىمشارتتارعا قول قويىلدى. شارۋالار 20 مىڭ گەكتارعا جۋىق القاپتى سۋارۋ ءۇشىن 174 ميلليون تەكشە مەتر سۋ الادى.
جەتىسۋ وبلىسى
