كوللاجدى جاساعان – قونىسباي شەجىمباي, «EQ»
جايىقتىڭ جايىلعان سۋىنان ەڭ كوپ زارداپ شەككەن ساياجاي اۋماعىنداعى ۇيلەر بولدى. سوڭعى ەسەپكە قاراعاندا ورال قالاسىنىڭ وزىندە 14 839 ساياجاي ءۇيىن سۋ باسقان. سونداي-اق ءبورلى اۋدانىندا – 245, بايتەرەك اۋدانىندا – 112, تەرەكتى اۋدانىندا 16 ساياجاي سۋ تاسقىنى استىندا قالعان.
ناۋرىز ايىنىڭ سوڭعى كۇندەرى قالدىعايتى وزەنىنىڭ تاسۋىنان بىرنەشە كوپىر ءب ۇلىنىپ, قاراتوبە اۋدانىنىڭ 9 ەلدى مەكەنىنە جول قاتىناسى ۇزىلگەن ەدى. قازىر ول جەردە ۋاقىتشا جول قاتىناسى قالپىنا كەلتىرىلدى. شىڭعىرلاۋ اۋدانىنداعى اقتاۋ اۋىلى عانا قاتىناسسىز قالىپ تۇر.
وبلىس بويىنشا تاسقىن كەزىندە 1 292 تۇرعىن ۇيگە سۋ كىرگەن بولاتىن. قازىر بۇل ۇيلەرگە تەحنيكالىق ساراپتاما جاسالىپ, كەيبىرىن جوندەۋ, كەيبىرىن قايتادان سالۋ جونىندە شەشىم شىعارىلىپ جاتىر. ول جونىندە بۇرىن حابارلادىق. وڭىردە سۋ تاسقىنى كەزىندە 13 939 ادام قاۋىپتى جەردەن كوشىرىلگەن ەدى. قازىر 2 441 ادام ەۆاكۋاتسيالىق بەكەتتەردە جاتىر. 3 729 ادام ۇيىنە قايتا ورالدى. ءومىر بىرتە-بىرتە قالىپتى ارناسىنا ءتۇسىپ كەلە جاتىر.
ءساۋىردىڭ 5-ىنەن بەرى باتىس قازاقستان وبلىسىنا ەلىمىزدىڭ ءار ايماعىنان 863,4 توننا گۋمانيتارلىق كومەك كەلگەن ەكەن.
قازىر جايىق وزەنىنىڭ دەڭگەيى ورال قالاسىنىڭ تۇسىندا 1957 جىلدان كەيىنگى ەڭ جوعارى شەگىنە جەتىپ, 863–864 سم بولىپ تۇر. بۇل – قاۋىپتى دەڭگەيىنەن 13–14 سم جوعارى دەگەن ءسوز. ءساۋىر ايىنىڭ 1-ىندە وبلىس بويىنشا توتەنشە جاعداي جاريالانىپ, وزەن جاعالاۋىنداعى ەلدى مەكەندەردى, ورال قالاسىن قورعاۋ شارالارى قاۋىرت ءجۇردى. ەلىمىزدىڭ ءار ايماعىنان 4 مىڭنان اسا قۇتقارۋشىلار, توتەنشە جاعدايلار دەپارتامەنتى ماماندارى, اسكەريلەر كەلدى. وسىنىڭ ناتيجەسىندە وبلىس بويىنشا 150 شاقىرىمعا جۋىق قورعانىس بوگەتى سالىندى. بۇرىنعى بوگەتتەر بيىكتەتىلىپ, نىعايتىلدى. وسىنىڭ ارقاسىندا جايىق وزەنىنىڭ جايىلعان سۋى ەلدى مەكەندەردى قورشاپ, قاۋىپ توندىرگەنىمەن, تۇرعىن ۇيلەر مەن ستراتەگيالىق نىساندار نەگىزىنەن امان قالدى.
قازىر بوگەتتەر سۋدى ۇستاپ تۇرعانىمەن, قاۋىپ ءالى سەيىلگەن جوق. قاۋىپتى تۇستار تاۋلىك بويى باقىلاۋدا تۇر. ورال قالاسىنىڭ وزىندە سۋ بۇزىپ كەتۋى مۇمكىن 24 نۇكتەدە, اسىرەسە قالانىڭ «كۇرەن», «جاس ناتۋراليستەر ستانساسى», «ازاۋلى», «كومينتەرن», «اقجۇنىس» اۋداندارى, رەچنيك, قۇرىلىسشى باۋ-باقشا سەرىكتەستىكتەرىندە 24 ساعات كەزەكشىلىك ۇيىمداستىرىلىپ, قاتاڭ قاداعالانىپ وتىر. قالا ماڭىندا جاعالاۋدى نىعايتۋ, قاپ توسەۋ جۇمىستارى جالعاسىپ جاتىر. توتەنشەلىكتەر مەن پوليتسيا, اسكەريلەر تاۋلىك بويى قوعامدىق ءتارتىپتى قاداعالاپ, پاترۋلدە ءجۇر. حابارلاما جاساۋ, ەۆاكۋاتسيا, مونيتورينگ جۇرگىزۋ, اپاتتان قۇتقارۋ جانە شۇعىل جۇمىستار – وسى توپتىڭ مىندەتىندە.
وسى كۇندەرى «قازسۋشار» مەكەمەسىنىڭ جەرگىلىكتى ماماندارى جايىق سۋىن وبلىس اۋماعىنداعى سۋ قويمالارىنا تولتىرىپ الۋ قامىمەن ءجۇر. ءساۋىردىڭ 24-ىندەگى مالىمەتكە قاراعاندا, وڭىردەگى سۋ قويمالارى 86% تولعان, 438 ملن تەكشە مەتر سۋ جينالىپ الىنعان. قازىر جايىق وزەنىنەن جايىق-كوشىم جۇيەسىنە سەكۋندىنا 118 تەكشە مەتر سۋ قۇيىلىپ جاتىر. 2024 جىلدىڭ باسىنان بەرى وسى جۇيەگە 242 ملن تەكشە مەتر سۋ الىنعان ەكەن. قازىرگى تاڭدا سۋ قويمالارىنا سۋ جينالىپ, كەيىنگى جىلدارى كەۋىپ قالعان كولدەرگە, كولتاباندار مەن تابيعي شابىندىقتارعا سۋ شىعىپ جاتىر.
جايىق وزەنىنىڭ دەڭگەيى سوڭعى ءبىر تاۋلىكتە 1 سم-گە ءتۇسىپ, 863 سم بولدى. جالپى, سۋ تاسقىنى باستالعالى جايىق وزەنىنىڭ دەڭگەيى 7 مەترگە كوتەرىلگەن.
باتىس قازاقستان وبلىسى
