جۇك كولىگىنە تيەلگەن كومەك الماتىدان ورال قالاسىنا ءساۋىردىڭ 17-ءسى كۇنى كەلىپ جەتتى.
«الاتاۋدىڭ باۋرايىنان ات تەرلەتىپ ارنايى كەلدىك. قۇرمانعازى وركەسترى ۇجىمى ەلىمىزدە بولىپ جاتقان جاعدايعا بايلانىستى اعايىندى سابىرعا شاقىرادى. سونىڭ ىشىندە ءبىز ءۇشىن اقجايىق ءوڭىرىنىڭ ورنى ەرەكشە عوي. ونەركاسىپپەن, ساۋدامەن اينالىساتىن ءىرى فيرما, كومپانيا ەمەسپىز, سوندا دا بولسا تاسقىن سۋدان زارداپ شەگىپ جاتقان حالىققا نيەتىمىزدىڭ بىرلىگىن ءبىلدىرىپ, كومەگىمىزدى جەتكىزىپ وتىرمىز», دەيدى وركەستر ءارتيسى جانە ينسپەكتورى رۋسلان بايمۇحاتوۆ.
گۋمانيتارلىق كومەكتىڭ ىشىندە سۋ باسقان وڭىرگە اسا قاجەتتى قاپشىق, كۇرەك, قايىق, گەنەراتور, سورعى قۇرالدارى, توسەك-ورىن, بالالار جايالىقتارى سەكىلدى 18 تەكشەمەتر جۇك بار ەكەن. بارلىعى قاتتالىپ تىركەلىپ, قويماعا ءتۇسىرىلدى. وسى جەردەن تابيعات اپاتىنان زارداپ شەگىپ جاتقان تۇرعىندارعا, ەۆاكۋاتسيالىق بەكەتتەرگە, قورعانىس الاڭدارىنا ءبولىنىپ جونەلتىلەتىن بولادى.
«قازاق حالقىنىڭ بىرتۇتاستىعىنىڭ دالەلى – ەلدىڭ ءبىر شەتىندە قيىندىق تۋىنداپ جاتسا, كەلەسى قيىرىنداعىلار بۇل ماسەلەدەن شەت قىلماي, كومەك قولىن سوزىپ جاتادى. اقجايىق وڭىرىنە سۋ ستيحياسى سالماق سالعاندا, سوناۋ جەتىسۋدەن ات ارىتىپ كەلىپ گۋمانيتارلىق كومەك كورسەتىپ جاتقان قۇرمانعازى اتىنداعى ۇلتتىق اسپاپتار وركەسترى ۇجىمىنىڭ قولداۋىنا قالاي رازى بولمايسىڭ! مادەنيەت سالاسىنىڭ جاعدايى اسا شىلقىپ تۇرماعانىن بىلەمىز. سوندىقتان قالتاسىنان قاراجات شىعارىپ, كومەك كورسەتىپ جاتقان ونەر ۇجىمىنا العىسىمىز شەكسىز», دەيدى باتىس قازاقستان وبلىستىق قوعامدىق كەڭەس مۇشەسى, پارلامەنت ءماجىلىسىنىڭ دەپۋتاتى ابزال قۇسپاننىڭ سەنىمدى وكىلى نۇرلان ءسادىر.
باتىس قازاقستان وبلىسى
