وسى ورايدا قر دەنساۋلىق ساقتاۋ مينيسترلىگىنىڭ شتاتتان تىس باس نەوناتولوگى ءارى قازاقستان اكۋشەر-گينەكولوگتارى مەن نەوناتولوگتارى كونگرەسىنىڭ پرەزيدەنتى بەكتۇرعان كارين ەلدەگى نارەستەلەر ءولىم-ءجىتىمىنىڭ ەداۋىر ازايۋى – بۇل جاڭا تۋعان, اسىرەسە شالا تۋعان سابيلەرگە كورسەتىلەتىن كەشەندى كومەكتىڭ جاقسارۋىنىڭ ارقاسىندا ەكەندىگىن ايتادى.
«پەريناتالدىق ورتالىقتار مەن پەرزەنتحانالاردىڭ مىڭداعان دارىگەرلەرى مەن مەدبيكەلەرىن بىرىكتىرەتىن ەلىمىزدىڭ نەوناتالدىق قىزمەتىنىڭ نەگىزگى ماقساتى – مەديتسينالىق كومەكتىڭ ساپاسىن ۇدايى جەتىلدىرۋ. ال ساپا ءبىرىنشى كەزەكتە دارىگەرلەردىڭ دە, ورتا مەديتسينالىق قىزمەتكەرلەردىڭ دە بىلىمىنە, تاجىريبەسى مەن ماشىقتارىنا تاۋەلدى. ەكىنشى ورىنعا پەريناتالدىق ورتالىقتاردىڭ ەڭ وزىق الەمدىك تەحنولوگيالارعا, جاڭا تۋعان نارەستەلەرگە كۇتىم جاساۋ تاجىريبەلەرى مەن ادىستەرىنە جاۋاپ بەرەتىن مەديتسينالىق جابدىقتارمەن جابدىقتالۋىن سەنىمدى تۇردە قويۋعا بولادى. وسى باستامادا بىزگە AYALA قايىرىمدىلىق قورى كوپتەن بەرى كومەكتەسىپ كەلەدى. بۇل – ەلىمىزدە 17 جىلدان بەرى نەوناتولوگيا مەن پەريناتولوگياعا ماماندانعان جالعىز ۇيىم. بارلىق سۇرانىستارىمىز بەن پروبلەمالارىمىزدى جاقسى بىلەدى, سوندىقتان ارقاشان جابدىقتار مەن وقىتۋ تۇرىندە ناقتى كومەكتەسىپ كەلەدى», دەيدى شتاتتان تىس باس نەوناتولوگ.
سونىمەن 2007 جىلدان بەرى AYALA قايىرىمدىلىق قورى قازاقستان بويىنشا 2,3 ميلليارد تەڭگەدەن استام سوماعا 67 مەديتسينالىق مەكەمەنى جاراقتاندىرعان ەكەن. بەكتۇرعان كاريننىڭ ايتۋىنشا, قور جوبالارىنىڭ ارقاسىندا ەلىمىزدىڭ بىرقاتار پەريناتالدىق ورتالىقتارى العاش رەت ءوز رەانيماتسيالارىنا CPAP اپپاراتتارىن, شالا تۋعان نارەستەلەرگە ارنالعان ينكۋباتورلار, اۆتوماتتى گيپوتەرميا اپپاراتتارىن, رەتينوپاتيانى دياگنوستيكالاۋ مەن ەمدەۋگە ارنالعان رەتينالدى كامەرالار مەن لازەرلەردى ساتىپ العان.
«مەملەكەت ءتۇرلى سەبەپتەرگە بايلانىستى بارلىق مەكەمەلەردى بىردەن زاماناۋي جابدىقتارمەن قامتاماسىز ەتە المايتىندىقتان, اتالعان قايىرىمدىلىق قورى مەن دەنساۋلىق ساقتاۋ مينيسترلىگىنىڭ ءوزارا ءىس-قيمىلى نەوناتالدىق قىزمەتتەگى وتكىر پروبلەمالاردى بارىنشا جەدەل ءارى ءتيىمدى شەشۋگە كومەكتەسىپ وتىر», دەيدى ساراپشى.
سول سياقتى «شەۆرون» كومپانياسىنىڭ قولداۋىمەن ءۇش جىل ىشىندە وبلىستىق پەريناتالدىق ورتالىقتاردىڭ بارلىق رەانيماتسيالارىن ارنايى ينكۋباتورلارمەن, تىنىس الۋ اپپاراتتارىمەن جاراقتاندىرۋعا قول جەتكىزىلسە, وسىنىڭ ارقاسىندا ەلىمىزدە ءبىر ايلىق نارەستەلەردىڭ ءولىم-ءجىتىمى ءۇش ەسەگە ازايعان.
«وسىلايشا AYALA قايىرىمدىلىق قورى مەن ونىڭ ءىرى سەرىكتەس كومپانيالارىنىڭ ىنتىماقتاستىعى قازاقستاننىڭ بالالار دەنساۋلىق ساقتاۋ سالاسىنداعى بىرقاتار پروبلەمالاردى قىسقا مەرزىمدە شەشۋگە مۇمكىندىك بەردى. مۇنداي سەرىكتەستىك بولماسا, وعان ءالى تالاي جىل كەتەر ەدى دەپ سەنىممەن ايتا الامىن. ماسەلەن, شالا تۋعان نارەستەلەردىڭ رەتينوپاتياسىن مىسالعا كەلتىرەيىن: 2,5 جىل ىشىندە قور ەل اۋقىمىندا شالا تۋعان نارەستەلەردىڭ زاعيپتىعىن نولگە دەيىن تۇسىرۋگە كومەكتەستى. وسى جوبانىڭ ارقاسىندا, نەوناتولوگياداعى باسقا دا جوبالار ءۇشىن دە مەملەكەت بيۋدجەتىنىڭ جۇزدەگەن ميلليون تەڭگە قاراجاتى ۇنەمدەلدى. مىسالى, 300-دەن استام بىرلىك مەديتسينالىق تەحنيكا: وكپەنى جاساندى جەلدەتۋ اپپاراتتارى, ينكۋباتورلار, رەانيماتسيالىق ۇستەلدەر, فەتالدىق مونيتورلار, شپريتستىك جانە ينفۋزيالىق سورعىلار, فوتوتەراپيا اپپاراتتارى, وتتەگى كونتسەنتراتورلارى, ەلەكترلىك سورعىشتار, گيپوتەرميا اپپاراتى, ەەگ مونتيتورينگى اپپاراتى, وفتالموسكوپتار, رەتينالدى كامەرا, ساراپشىلىق سىنىپتى ۋدز-اپپارات, بيوحيميالىق تالداعىش جانە ميكروسكوپ – وسىنىڭ ءبارى AYALA قورىنىڭ سەرىكتەسى «شەۆرون» كومپانياسىنىڭ قولداۋىمەن ساتىپ الىندى, مەملەكەتتىك مەديتسينالىق مەكەمەلەرگە بەرىلدى جانە كۇن سايىن بالالاردىڭ ءومىرى مەن دەنساۋلىعىن تابىستى ساقتاپ قالادى», دەيدى بەكتۇرعان كارين.
ساراپشىنىڭ پىكىرىنشە, مەديتسينالىق قىزمەتتىڭ ساپاسىن ارتتىرۋدا نەوناتولوگتاردىڭ, پەريناتالدىق ورتالىقتار مەن پەرزەنتحانالاردىڭ ورتا مەديتسينالىق قىزمەتكەرلەرىنىڭ دە ۇزدىكسىز كاسىبي وقىتۋدان ءوتۋى وتە ماڭىزدى.
– «AYALA ونلاين اكادەمياسى» بەينە-كۋرستارى بار پلاتفورما – ءوزىنىڭ تۇراقتى كاسىبي دامۋىنا مۇددەلى بارلىق دارىگەرلەر مەن مەدبيكەلەر ءۇشىن تاماشا قۇرال. جەتەكشى پراكتيكتەردىڭ كۋرستارىن كەز كەلگەن جەردەن كورۋگە بولادى. 15 جىل ىشىندە «شەۆروننىڭ» بەلسەندى قاتىسۋىنىڭ ارقاسىندا وتاندىق جانە شەتەلدىك مامانداردى تارتا وتىرىپ, ونداعان تەگىن وفلاين ترەنينگتەر, سەمينارلار مەن كونفەرەنتسيالار وتكىزىلدى. بۇل ءبىزدىڭ جۇزدەگەن ارىپتەستەرىمىزگە كاسىبي تۇرعىدا سەرپىلىس اكەلدى, – دەيدى شتاتتان تىس باس نەوناتولوگ.
قازىرگى تاڭدا قازاقستاننىڭ نەوناتالدىق رەانيماتسيالارى زاماناۋي شەتەلدىك جابدىقتاردى پايدالانىپ وتىرعاندىقتان, ونىمەن دارىگەرلەر عانا ەمەس, ورتا مەديتسينالىق پەرسونال دا دۇرىس جۇمىس ىستەي ءبىلۋى ءتيىس.
«نەوناتالدىق قىزمەتتى دامىتۋدا ەلىمىزدەگى سابيلەردىڭ ءولىم-ءجىتىمى كورسەتكىشىن ودان ءارى تومەندەتۋ ءۇشىن نەوناتالدىق مەيىربيكەلەردىڭ كاسىبي قۇزىرەتتەرىن جەتىلدىرۋمەن اينالىسۋ وتە ماڭىزدى. سوندىقتان ءبىز ءار سارسەنبى سايىن ءبىلىم بەرۋ كۋرستارىن ونلاين فورماتتا وتكىزەمىز. بۇل ءۇشىن مەدبيكەلەردىڭ وزدەرى قىزىقتىراتىن تاقىرىپتاردى دايىندايدى. وتكەن جىلى AYALA قورىنىڭ, «شەۆرون» كومپانياسىنىڭ جانە قر دەنساۋلىق ساقتاۋ مينيسترلىگىنىڭ قولداۋىمەن العاش رەت حالىقارالىق نەوناتالدىق مەدبيكەلەر فورۋمى ءوتىپ, ناتيجەسى تاماشا بولدى: كاسىبي قاۋىمداستىق قۇرىلدى, ءبىزدىڭ تاجىريبەمىز كورشى قىرعىزستاندا قولداۋ تاپتى. وعان ورتالىق ازيانىڭ باسقا دا ەلدەرى مۇددەلى», دەيدى سپيكەر.
قازاقستان رەسپۋبليكاسىنداعى نەوناتالدىق قىزمەتتىڭ دامۋ دەڭگەيى مەن ساپاسىن ءبىزدىڭ ماماندارىمىزدان وزگە ەلدەردەگى ارىپتەستەرى كومەك پەن كەڭەس سۇراپ, دارىگەرلەرىمىزدى شەتەلدەگى سەمينارلار مەن كونفەرەنتسيالارعا شاقىرىپ جاتقاندىعى ايعاقتايدى.
«تاجىكستان مەن رەسەيلىك نەوناتولوگتار نەوناتالدىق ءولىم-ءجىتىمنىڭ قۇپيا ءاۋديتى بويىنشا ونلاين-وتىرىستارعا قاتىستى. ءبىز بۇل تالقىلاۋلاردى دارىگەرلەر قاۋىمداستىعىندا ەرتە ءسابي ءولىم-ءجىتىمىن قالا مەن مەديتسينالىق مەكەمەگە بايلانىستىرماي, مۇقيات جاسىرىن تالداۋ جاساۋ ءۇشىن جۇرگىزەمىز. مۇنداي ءتاسىل پراكتيكادا وقىتۋدان باسقا, دارىگەرلەرگە وزدەرىنىڭ كاسىبي قابىلەتتەرىن, بالانى باقىلاۋ تاكتيكاسى مەن دياگنوستيكانى, ەمدەۋ ءىسىن جەتىلدىرۋگە مۇمكىندىك بەرەدى. اپتا سايىنعى تالقىلاۋلارعا جاس دارىگەرلەرمەن بىرگە, 50-100 شاقتى مامان قاتىسادى. ءبىز وسىناۋ كەزدەسۋلەردى وتكىزۋدە قارجىلىق دەمەۋ كورسەتىپ وتىرعان AYALA قورىنا العىس ايتامىز», دەيدى بەكتۇرعان كارين.
سونداي-اق قوردىڭ قولداۋىمەن قازاقستاندا اپتا سايىن نەوناتولوگ دارىگەرلەر الەمنىڭ جەتەكشى مەديتسينالىق باسىلىمدارىندا اعىلشىن تىلىندە جاريالانعان عىلىمي ماقالالارعا تالداۋ جۇرگىزىلەدى. نەوناتولوگتاردىڭ «جۋرنال كلۋبىنىڭ» وتىرىستارىنا 5 ەلدىڭ دارىگەرلەرى قاتىسادى.
«بارلىق نەوناتولوگ دارىگەرلەردىڭ الدىندا تۇرعان باستى ماقسات, ارينە, جاڭا تۋعان بالالارعا كومەك كورسەتۋ ساپاسىن جاقسارتۋ ەكەندىگى ايان. وعان مامانداردىڭ تۇراقتى دامۋىنسىز, پەريناتالدىق ورتالىقتاردى وزىق جابدىقتارمەن جاراقتاندىرماي قول جەتكىزۋ مۇمكىن ەمەس. سوندىقتان «شەۆرون» كومپانياسىنىڭ AYALA قايىرىمدىلىق قورىنىڭ نەوناتولوگيا جانە پەريناتولوگيا سالاسىنداعى جوبالارىنا بەلسەندى قاتىسۋى ەلىمىز ءۇشىن ماڭىزدى كورسەتكىشتى – نارەستە ءولىمىن تومەندەتۋگە كومەكتەسەدى», دەيدى بەكتۇرعان كارين.
